Donostia Zinemaldiak, Desgaitasunari buruzko Errege Patronatuak, CESyAk eta Madrilgo Carlos III.a unibertsitateak elkarrekin egingo dute lan aurten ere jaialdiaren galak hiru hizkuntzatako azpitituluekin eskaintzeko. Horretaz gain, mahai-inguru bat antolatuko dute; bertan, sektoreko adituek zinema irisgarri egiteko premiari eta horren abantailei buruz hitz egingo dute. CESyAk, bestalde, El Apóstata filmaren emanaldi irisgarri bat eskainiko du, eta irisgarri egingo du, halaber, programazioa Zinemaldiaren webgunearen bitartez kontsultatzeko aukera.
Gala irisgarriak
Zortzigarren urtez jarraian, Donostia Zinemaldiak zentzumen-urritasunak dituen ikusleengana hurbiltzeko apustua egin du, inaugurazio-gala, Emily Watson aktoreari emandako Donostia sariaren gala eta amaierako gala zuzenean azpititulatuta hiru hizkuntzatan: gaztelania, euskara eta ingelesa, aldi berean eta agertokian integraturiko pantailen bitartez, eta UC3Mtitling teknologiari esker.
Mahai-ingurua
Desgaitasunari buruzko Errege Patronatua (RPD) eta Madrilgo Carlos III.a unibertsitatea, Azpitituluen eta Entzutezko Deskribapenaren Espainiako Zentroaren (CESyA) bitartez, Donostia Zinemaldian dira zortzigarren urtez jarraian, ikus-entzunezkoen sektorea irisgarri egiteko premiari buruz sentsibilizatzeko.
Bere 63. edizioan, Zinemaldiak honako mahai-inguru hau antolatuko du: «Oztoporik gabeko zinema: irisgarritasuna eta ikusle berriak», edizio honetako sentsibilizazio-neurri osagarri gisa. Mahaiak bi helburu izango ditu: alde batetik, zinemaren arloko profesionalak kontzientziatzea eta sentsibilizatzea, desgaitasuna duten pertsonei begira, zinema irisgarri egiteko zerbitzuei buruz. Bestetik, zinemaren irisgarritasunaren arloan Espainian egin diren aurrerapauso handiak aurkeztea.
Igandean izango da, irailaren 20an, 13:00etan, eta honako hauek parte hartuko dute:
1. Rafael de Muslera Maesso. Programen eta jardueren arloko burua. Desgaitasunari buruzko Errege Patronatua. Osasun, Gizarte Politika eta Berdintasun Ministerioa.
2. Guadalupe Melgosa. Zinematografiaren eta Ikus-entzunezko Arteen Institutuko (ICAA) zuzendariorde nagusia.
3. Álvaro Olalla, Zinemaldiaren Sail Ofizialean lehiatuko den El Apóstata filmeko protagonista.
4. Guadalupe Balaguer, El Apóstata filmaren ekoizlea.
* Norbaitek mahai-ingurura joateko interesa badu, mesedez, jarri CESyArekin harremanetan.
Emanaldi irisgarriak
CESyAren, Zinemaldiaren, Avalon banaketa-etxearen eta Cinekdoque eta Ferdydurke ekoiztetxeen lankidetzari esker, Sail Ofizialeko El Apóstata filmaren emanaldi irisgarri bat eskainiko da edizio honetan. Federico Veiroj zuzendariaren filmak gorrentzako azpitituluak izango ditu gaztelaniaz, euskaraz eta ingelesez, eta entzutezko deskribapena itsuentzat.
Lehen aldiz Zinemaldiaren barruan, Sail Ofizialeko emanaldi batean azpitituluak zer hizkuntzatan ikusi aukeratu ahal izango da, erabiltzailearen gailu mugikorraren bitartez.
Emanaldia irailaren 23an izango da, 18:15ean, Antiguo Berri zinema-aretoetan.
Horretaz gain, Zinemaldiak, beste lankide batzuen bitartez, beste bi filmen emanaldi irisgarriak eskainiko ditu: Truman eta Mi gran noche. Kontsultatu programa egunak eta orduak ikusteko.
Webguneko programazioa irisgarri
CESyAk irisgarri egin du Zinemaldiaren programazio ofiziala Zinemaldiaren webgunearen bitartez:
https://www.sansebastianfestival.com/programazioa
Informazio gehiago hemen: agendaculturalaccesible.es
www.cesya.es / info@cesya.es /916244031