Alde batetik, basamortua, piskanaka lurra irentsiz; ur eskasia; lehorte amaigabea. Bestetik, gerraren mehatxua. Herrixkan putzua idortu egin da eta abereak hiltzen ari dira. Bizi-senari jarraituz, jende gehientsuenak Hegoaldera alde egin du; Rahnek, berriz, irakurtzen eta idazten dakien bakarrak, Ekialdera abiatzea erabaki du bere hiru seme-alabekin eta emaztearekin. Ardi gutxi batzuk, ahuntz batzuk eta Chamelle dromedarioa dira bere ondasun bakarrak. Rahne eta bere familiak eguzki errepean bazter lazgarriak zeharkatzen dituzte, oinez gelditu gabe eta maiz beren bizitzak arriskuan jarriz. Si le vent soulève les sables exodoa, bilaketa, itxaropena eta zorigaitzari buruzko istorioa da, betikotasunari eta ausardiari buruzko alegoria, Shasharaino, neska nomada batenganaino garamatzana, nekaezintasunez, alaitasunez eta bizigogoz bere aitaren maitasuna lortuko duena.

Marseilla, 1949. Anberesen hazi, Arte Dramatikoko ikasketak Bruselan, New Yorken eta Parisen burutu, eta antzerkian, zinean eta telebistan aritua da. 1977an Man’s Films ekoiztetxea sortu zuen, eta 1982an bere lehen film luzea, Le lit. Orduz geroztik, zenbait pelikula zuzendu ditu, tartean, Les noces barbares (1987), Il maestro (1989, Donostian Publikoaren Saria eskuratutakoa, 1990ean), Sur la terre comme au ciel (1991), Between the Devil and the Deep Blue Sea (1994) eta Clouds-Letters to My Son (2001). 1999an Donostiako Zinemaldiko Epaimahai Ofizialeko kide izan zen.