Munduak bistaz galtzen ez duen, baina ia ezagutzen ez duen leku batean barrena eginiko bidaia da hau. Nortzuk dira musikari adierazgarrienak eta nola bizi dira? Zer pentsatzen dute bizitzea egokitu zaien patu berezi horretaz, eta nola egiten diote aurre beren letren eta melodien bitartez? Tel Aviveko publizitate iragarki eta neoietatik Zisjordaniako eremu okupatuen eta kontzentrazio-esparru erraldoi bilakatu duten Gazako zerrendaren pobrezia eta itxaropenik ezera, Checkpoint Rock herriz herri eta checkpointez checkpoint joango da elkarren artean oso desberdinak diren musikariekin, gatazkan murgilduta dagoen herri horri buruz duten ikuspuntua aztertzeko.

Muguruza euskal panoraman 80ko hamarkadatik eragin handiena izan duen musikarietako bat da, bai Kortatu eta Negu Gorriak taldeekin eginiko lanagatik, baita bakarkako bere karrerari esker ere; egin dituen lankidetzen zerrenda luzea da horren erakusgarri. Corcuera, Liman jaio zen eta La espalda del mundo (2000) dokumentalarekin egin zen ezagun; hari esker, Donostia Zinemaldiko Nazioarteko Kritikarien Saria irabazi zuen. Ondoren, La guerrilla de la memoria (2002) eta Invierno en Bagdad (2005) egin zituen; azkenak, sariak irabazi zituen Málagan, Los Angelesen eta Montevideon. Checkpoint Rock filmak itxi zuen Donostiako 2009ko Giza Eskubideen Zinemaldia.