Egonaldiak eta proiektu zinematografikoak garatzeko laguntza eskaintzen ditu Ikusmira Berriak programak, eta, joan den astean hirugarren edizioan izena emateko epea amaitu zenean, 19 herrialdetako 157 proposamen jaso ditu. Horrek esan nahi du % 320tik gorako igoera izan dela 2016an (37) eta 2015ean (32) erregistratutako eskarien aldean. Zenbakiek indartu egiten dute programarako sarbide berrien alde egindako apustua. Aurten, bestalde, lau kategoriak berritu dira: Zinemaldiaren azken edizioko Zinema Ikasleen Nazioarteko Topaketako parte-hartzaileak, Euskal Autonomia Erkidegoko errealizadoreak, Espainiako gainerako lurraldeetako errealizadoreak eta atzerriko errealizadoreak.
Aldaketa horren helburuetako bat programaren nazioarteko izaera indartzea zen, eta atzerriko errealizadoreen kategorian jaso dira, hain zuzen ere, hautagaitza guztien % 62 (97 guztira). Gehienak Latinoamerikako herrialdeetakoak dira, Argentina (29), Kolonbia (13) eta Txile (12) buru direlarik, baina beste herrialde batzuetako proiektuak ere erregistratu dira (esaterako, Alemaniakoak, Frantziakoak edo Estatu Batuetakoak). Era berean, Zinema Ikasleen Nazioarteko Topaketako bost proposamen jaso dira, Euskal Autonomia Erkidegoko zuzendariek 18 proposamen aurkeztu dituzte, eta Espainiako gainerako lurraldeetakoek, berriz, 37.
Ikusmira Berriak programarako lau hautatutako proiektuak maiatzean jakinaraziko dira.
Aurretiko hautaketa egingo dute Carlo Chatrianek, Locarnoko zinema-jaialdiko zuzendariak, aurten lehen aldiz lan horretan arituko dena, eta Sergio Oksman zinemagileak eta Ada Solomon produktoreak, beren bigarren urtean. Lan irabazleen egileek sei asteko egonaldia izango dute Tabakalera Kultura Garaikidearen Nazioarteko Zentroan. Lehen lau asteetan, errealizadoreek beren proiektuak landuko dituzte Tabakalerako Sortzaileen Gunean. Zinemaren arloko profesionalek eskola magistralak emango dizkiete, eta adituen batzordeko kideen aholkuak ere jasoko dituzte. Egonaldiko bosgarren astean, pitching-saioa prestatuko dute: egonaldiko seigarren eta azken astean egin beharreko proiektuaren aurkezpena. Industriako profesionalei aurkeztuko diete, Donostiako Zinemaldiko Europa-Latinoamerika Koprodukzio Foroaren esparruan. Egoiliarrek haien proiektuetan laguntzeko interesa duten bertaratutako profesionalekin hitzorduak egiteko aukera izango dute, eta gainera, Zinemaldiko emanaldietara eta industria-jardueretara joateko akreditazioa izango dute.
Ikusmira Berriak ekimenak gainera 20.000 euroko laguntza ekonomikoa emango du, hautatutako proiektuen artean banatu beharrekoa. Halaber, REC Grabaketa Estudioak bere postprodukzio-zerbitzuak eskaintzen ditu sari moduan film labur baterako (10.500 eurotan baloratua), eta film luze baterako (35.000 eurotan baloratua).
Ikusmira Berriak programak berrikuntzaren eta hizkuntza berrien alde egiten duten talentu berriak nahiz ekoizleak eta ikus-entzunezko industriak inplikatu nahi ditu. Tabakalerak eta Donostia Zinemaldiak antolatzen dute, REC Grabaketa Estudioaren eta Euskadiko Filmategiaren laguntzarekin, eta Donostia 2016 Europako Kultur Hiriburuaren legatuaren parte da.
ADITUEN BATZORDEKO KIDEEN BIOGRAFIAK
Carlo Chatrian 2002an hasi zen lanean Locarnoko zinema-jaialdian. Komisario izan da Locarnoko atzera begirako hainbat ziklotan: Nanni Moretti, animazio japoniarra (Manga Impact), Ernst Lubitsch, Vincente Minnelli, Otto Preminger.
Locarnoko zinema-jaialdiko zuzendari artistiko izendatu zuten 2013an. Hori baino lehen, aholkularia izan zen Filmoteka Suitzarrean, eta programatzailea Nyongo Visiond du réel eta Florentziako Festival dei Popoli zinema-jaialdietan.
Brasilen jaioa, Espainian bizi izan da azken hogei urteotan. Kazetaritza ikasi zuen São Paulon eta zinemagintza New Yorken. Madrilen bizi da, eta errealizadore eta irakasle gisa egiten du lan. Dok Films ekoizpen-etxeko zuzendaria da 2000. urteaz geroztik. Oksmanen ibilbidea zinema dokumentalari lotuta dago eta Elías Querejetak sei obra ekoitzi zizkion.
Zuzendu dituen lanen artean honakoak nabarmentzen dira: A Esteticista (2004), Goodbye, America (2006), Notes on the other (2009), A story of the Modlins (2012) eta O Futebol (2015).
Bukaresten 1968an jaioa, nerabezaroan aktore izatea zuen amets. Ingurumen Ingeniaritzan graduatu zen, baina sekula ez du alor horretan lan egin. Berlingo Harresiaren erorketak bizitzaren ikuspegia aldatu zion. Publizitatean lan egin zuen, eta 1990eko hamarkadako Errumaniako kapitalismo basatian aukera berriak bilatu zituen. 1993an, ekoizpenaren mundura egin zuen salto, Domino Films etxeko ekoizpen buru eta ekoizle exekutibo gisa. Errumaniako eta nazioarteko hainbat ekoizpenetan pertsona famatuekin lan egiteko aukera izan zuen, Charlotte Rampling, Quincy Jones, Jeremy Irons, Fanny Ardant eta Franco Zeffirellirekin kasu.
2004an, Hi Film ekoizpen-etxe zinematografikoa sortu zuen Avi Karpick kidearekin batera. Ordutik, 40 film baino gehiago produzitu eta koproduzitu ditu, eta 150 sari baino gehiago eskuratu ditu Sundanceko, Berlineko, Canneseko, Locarnoko, Sarajevoko eta tankerako zinema-jaialdietan. Europako hamabost herrialde baino gehiagorekin egin ditu koprodukzioak eta ekoitzi dituen filmak munduko 50 herrialde baino gehiagotara saldu ditu.
Ekoizle eragile gisa izan dituen azken lorpenen artean aipa daitezke: Maren Ade zuzendariaren Toni Erdmann filmaren EFA-ren saria eta Oscarrerako izendapena. Ekoizle bezala, Cãlin Peter Natzer zuzendariaren Pozitia copilului / Child’s Pose filmaren Urrezko Hartza, Radu Judek Aferim! filmarekin jaso zuen zuzendari onenaren Zilarrezko Hartza eta 2013ko Europako Zinemaren Sarietan Europako koprodukzioen garapenari egindako ekarpenagatik eman zioten Eurimages Award saria.
Errumaniako zinema berriko pertsona famatu garrantzitsuenekin egin du lan, besteak beste, Cristian Nemescu, Radu Jude, Razvan Radulescu, Adrian Sitaru eta Alexandru Solomonekin eta hainbat zuzendariren (Paul Negoescu, Cristi Idtime, Ivana Mladenovic edota Daniel Sandu) lehen lanak ekoitzi ditu.
Horrez gain, Bukaresteko NextT Int’l Film Festival jaialdiko sustatzailea, EAVE sareko koordinatzailea, Errumaniako Dantza Garaikideko Zentroko aholkularia, National Cultural Fund elkarteko batzordeko kidea eta Europako Film Akademiako batzordeko kidea da.