Ofiziala
Partner
"Z365" edo "Zinemaldia urte osoan" Zinemaldiaren apustu estrategiko berria da, non talentu berrien bilaketa, laguntza eta garapena (Ikusmira Berriak, Nest); formakuntza eta zinema-ezagutzen transmisioa (Elias Querejeta Zine Eskola, Zinemaldia + Plus, Zinemagileen elkarrizketa); eta ikerketa, dibulgazioa eta pentsamendu zinematografikoa (Z70 proiektua, Pentsamendua eta eztabaida, Ikerketa eta argitalpenak) elkartzen diren.
Deialdia Sartu NIRE ZINEMALDIRA 
Agenda Programa eta sarrerak 
Bilatu 
Hamar film berrirekin osatu da 65. Donostia Zinemaldiko Perlak saila; izan ere, Darren Aronofsky, Sean Baker, Robert Guédiguian, Michael Haneke, Hirokazu Koreeda, Xavier Legrand, Martin McDonagh, Janus Metz, Lynne Ramsay eta Paolo Virzì zuzendarien azken filmak hartuko ditu barne. Guztiak lehiatuko dira Donostia Hiria Publikoaren Saria lortzeko, ikusleen botoen bidez ematen dena.
Mother!, Jennifer Lawrence, Javier Bardem eta Michelle Pfeiffer protagonistekin, Darren Aronofskyren (New York, 1969) film berria da. Besteak beste, lan hauen egilea da Aronofsky: Pi (1998), zuzendari onenaren saria Sundancen; Requiem for a Dream (2000) kultu-filma; The Wrestler (2008), Urrezko Lehoia Venezian; eta Black Swan, emakumezko aktore onenaren Oscar saria (Natalie Portman). Bere azken ekoizpena Veneziako zinema-jaialdian lehiatuko den thriller psikologikoa da.
The Florida Project film txalotuenen artean egon zen Canneseko azken zinema-jaialdian, Errealizadoreen Hamabostaldian parte hartu zuenean. Sean Baker (Summit, Estatu Batuak, 1971) zuzendariak sei urteko neskato bati eta haren lagunei hitz buruz egingo digu lan honetan: haurrak udako oporraldian daude; haien inguruko helduek, aldiz, une gogorrak bizi dituzte. Aurrez, 2015ean, Tangerine aurkeztu zuen Sundancen, bere laugarren film luzea, osorik iPhone batean filmatutako lehena, eta hogei bat sariren irabazlea.
Robert Guédiguian (Marseilla, Frantzia, 1953) zuzendariak –Marius et Jeannette (1997), emakumezko aktore onenaren Cesar saria Ariane Ascariderentzat; Marie-Jo et ses 2 amours (2002), Cannesen lehiatutako filma; eta Les neiges du Kilimandjaro (2012), Un Certain Regard sailerako aukeratua– bere ohiko konplizeak bildu ditu La villa / The House by the Sea filmaren antzeztaldean; hain zuzen ere, hiru anai-arreba filmatu ditu, negu betean berriz aurkitzen direnean, aitak Marseillatik gertuko kala batean duen etxean.
Michael Hanekek (Munich, Alemania, 1942), gaur egungo zinemagintzako zuzendari garrantzitsuenetako batek, Happy End aurkeztuko du. Funny Games (1997), La pianiste (2001), Das Weisse Band (2009) eta Amour (2012) filmen egileak ehun bat sari jaso ditu bere lan-ibilbide osoan nazioarteko zinema-jaialdi eta golardo artean. Happy End, Europako burges familia baten bizitzaren bat-bateko argazkia, Canneseko sail ofizialerako aukeratu zuten.
Hirokazu Koreeda (Tokio, 1962) lau aldiz izan da Urrezko Maskorra lortzeko lehian –Wandafuru raifu / After Life (1998), Hana yori mo naho / Hana (2006), Aruitemo, aruitemo / Still Walking (2008) eta Kiseki / I Wish (2011), gidoi onenaren sariaren irabazlea–, eta bitan jaso du Donostiako Publikoaren Saria: 2013an Soshite chichi ni naru / Like Father Like Son filmarekin eta 2015ean Umimachi Diary / Our Little Sister filmarekin. Sando-me no satsujin / The Third Murder, Venezian lehiatuko den filmetako bat, bere bezeroaren erruduntasunaz zalantza egiten duen abokatu bati buruzkoa da.
Xavier Legrandek zaintza partekatua duten guraso dibortziatu batzuen seme baten istorioarekin egingo du film luzeen zuzendaritzan debuta, Avant que de tout perdre film laburrarekin Cesar saria, Clermont-Ferranden 4 sari eta Oscar sarietarako izendapena lortu ondoren. Jusqu’à la garde / Custody Veneziako sail ofizialerako aukeran sartu da.
Martin McDonaghek (Camberwell, Erresuma Batua, 1970) fikziozko film labur onenaren Oscar saria irabazi zuen Six Shooter-ekin (2004). Haren lehen film luzeak, In Bruges-ek (2008), jatorrizko gidoi onenaren BAFTA saria eta kategoria bereko Oscarrerako izendapena lortu zituen; bigarrenak, Seven Psychopaths-ek (2012), aldiz, Midnight Madness saileko Publikoaren Saria irabazi zuen Toronton. Three Billboards Outside Ebbing, Missouri-rekin Venezian lehiatuko da, filmean aurrez aurre jarririk, batetik, alaba duela hainbat hilabete erail zioten ama bat, erruduna atxilotu gabe jarraitzen duenean, eta bestetik, herriko polizia, Woody Harrelson eta Sam Rockwellek hezurmamitutako bi agente buruan.
Bere kamera Afganistaneko daniar erregimentu batengana bideratu (Armadillo) eta True Detective telesailaren kapitulu bat filmatu ondoren, Borg/McEnroe aurkeztuko du Janus Metzek (Danimarka, 1974). Suediako eta Estatu Batuetako tenis-jokalari horiek 1980ko Wimbledon txapelketan elkarren aurka jokatutako partida islatuko du filmak, eta hasiera emango dio Torontoko zinema-jaialdiari.
Lynne Ramsay (Glasgow, Erresuma Batua,1969) Cannesen lehiatu zen bere aurreko filmarekin, We Need to Talk About Kevin izenekoarekin (2011), eta, horrez gain, zuzendari onenaren eta Europako emakumezko aktore onenaren British Independent Film Awards sariak irabazi zituen. You Were Never Really Here, eskoziar zinemagileak idatzi eta zuzendua, gidoi onenaren eta gizonezko aktore onenaren (Joaquin Phoenix) sarien irabazlea izan da Canneseko azken zinema-jaialdian.
Paolo Virzì (Livorno, Italia, 1964) gaur egungo italiar zinemagile garrantzitsuenetakoa da. Haren filmografian nabarmentzekoak dira Il capitale umano / Human Capital (2013), gidoi, zuzendari eta emakumezko aktore onenaren David de Donatello sarien irabazlea, eta haren azkenaurreko lana, La pazza gioia / Like Crazy (2016), film onenaren eta, berriz ere, zuzendari eta emakumezko aktore onenaren David sarien irabazlea. The Leisure Seeker, Helen Mirren eta Donald Sutherland aktoreek protagonizatua, Estatu Batuetan filmatzen duen lehen lana da eta Venezian lehiatuko da.
Film horiek gehitu zaizkie aurretiaz jakinarazi diren lan hauei: Teströl és lékekröl / On Body and Soul, Ilkidó Eneydirena; Nelyubov / Loveless Andrey Zvyagintsevena; 120 battements par minute (120 BMP) / 120 Beats Per Minute, Robin Campillorena; Wonderstruck, Todd Haynesena; The Big Sick, Michael Showalter-ena; Call Me By Your Name, Luca Guadagninorena; eta Loving Pablo, Fernando León de Aranoarena, lehiaketaz kanpo saila itxiko duen filma.
Donostia Hiria Publikoaren Sariak bi errekonozimendu egiten ditu: film onenaren saria, 50.000 eurokoa, eta Europako film onenaren saria, 20.000 eurokoa.
Munduko tenis ikono handienetako biren arteko lehiari buruzko biopica: Björn Borg suediar asaldagaitza batetik, John McEnroe estatubatuar odolberoa bestetik, eta haien arteko partida gogoangarria 1980ko Wimbledon txapelketan. Bi kirolari ezin desberdinagoak, mito bihurtu zirenak, eta horregatik ordaindu behar izan zuten prezioa. Sua eta izotza tenis-zelaian.
Gure inguruan, mundua, eta erdian gu, itsu. Europako burges familia baten bizitzaren bat-bateko argazkia.
Myriam eta Antoine dibortziatu egin dira. Bere seme txikia senar bortitzarengandik babesteko, Myriamek zaintza eskatuko du, baina bi senar-emazteek partekatu behar dutela erabakiko du epaileak. Aita jeloskorraren biktima, eta ama jazarria babestu nahian, Julienek bere esku dagoen guztia egingo du okerrena gerta ez dadin.
Marseillatik gertu dagoen kala txiki batean, negu betean, Angèle, Joseph eta Armand beren aita zaharraren etxera itzuliko dira. Angèle antzezlea da eta Parisen bizi da; Joseph neska askoz ere gazteago batekin maitemindu berri da. Armand soilik geratu zen Marseillan, aitak zeraman jatetxe txikiaz arduratzeko. Orain, aitak helarazi zizkien idealetatik, langileentzako jatetxe haren inguru magikoan eraiki zuen senide-mundutik, zer gelditzen den aurkitzeko unea da. Baina alboko kalara patera bat iritsiko da, eta haien gogoetak aldatuko ditu…
Bikote baten harremana proban jarriko da ustekabeko gonbidatu batzuk etxera iritsi eta haien bizitza lasaian sartzen direnean. Maitasunari, debozioari eta sakrifizioari buruzko thriller psikologiko liluragarria.
Shigemori abokatu ezagunak Misumi defendatuko du, giza hilketa eragin duen lapurreta delitu batez akusatutako gizon bat. Aurrez ere bete du espetxe-zigorra, duela hogeita hamar urteko erailketa bat zela eta. Shigemorik kasua irabazteko aukera eskasak ditu; izan ere, bezeroak erruduna dela aitortu du, aski litekeena bada ere horrek heriotza-zigorra ekartzea. Baina kasua argitu ahala, Misumiren eta haren familiaren lekukotzak entzuten dituen heinean, Shigemorik zalantzan jarriko du bere bezeroa erruduna den.
The Florida Projectek sei urteko Moonee azkarraren eta haren askotariko lagunen istorioa kontatuko digu. Haurren uda-oporrak abenturaz eta bihurrikeriez beteta daude; inguruko helduek, aldiz, garai zailak bizi dituzte. Estatu Batuetan, bizileku iraunkorra ziurtatu ezin dutenentzat azken babesleku bihurtu dira motel merkeak. Gero eta gehiago dira behartsu ikusezin horiek, eta horietatik % 41 aterpea emango dien bizitoki bat izateko egunero borrokan ari diren familiek osatzen dute. Istorio hau Orlandoko aldirietan dago girotua; Orlando, planetako opor-hiriburu nagusia eta “munduko toki magikoenaren” etxea. Parke tematikoen eta turistaguneen lurraldea zeharkatzen duen errepidearen luzera osoan, bere garaian Disneyren mistika ustiatuz turistak erakartzen zituzten motel merkeek etxerik gabeko familiak hartzen dituzte gaur egun. Halako batean bizi dira Moonee eta haren ama Halley, 22 urtekoa: zehazki, Magic Castle motelean.
Ella eta John beren sendagileen eta haurren zainketa itogarritik ihesean ari dira. John despistatua baina setatsua da. Ella ahula, baina aldi berean burutsua. Beren karabana leialean Bostonetik Key West irlara arte bidaiatuko dute, Estatu Batuetan. Bidean, alaitasun eta estutasun uneak partekatuko dituzte. Hala, arian-arian, bizitzeko grina eta besteekiko maitasuna suspertuko zaie, eta bestelako ikusmolde batekin begiratuko diote atzean uzten ari diren guztiari. Abentura horretan, elkar nola ikusten duten berriz pentsatzaraziko die horrek.
Bere alabaren hilketaren erruduna hilabetez agertu gabe egon ondoren, Mildred Hayesek urrats ausarta egingo du: bere herrira daramaten hiru seinale pintatuko ditu, William Willoughby herriko poliziaburua errespetatuarentzako mezu polemiko batekin. Haren bigarrengoak, Dixon amazulo heldugabe eta indarzaleak, eskua tartean sartzen duenean, okerrera joko du Mildreden eta Ebbingeko polizia-indarren arteko gerrak.
Desagertutako neska nerabea. Sikario basati eta oinazetua erreskate-misio batean. Botere ustelak eta mendekuak piztuko duten indarkeria-erauntsi latzak hura suspertzera eraman dezake.
Bideoak
Irudiak
Astelehenetik ostegunera: 09:00 - 15:00.
Ostiraletan: 10:00 - 14:00