EROSKIK bigarren urtez jarraian babestuko du Gazteriaren EROSKI saria, 65. Donostia Zinemaldiaren esparruan.
“EROSKI, kontsumo-kooperatiba gisa, oso-osorik kontsumitzaileari eta gizarteari emandako talde-proiektu bat da. Zinemaldiko Gazteriaren EROSKI sariak hitza hartzeko eta zuzendari berrien talentua saritzeko aukera ematen die gazteei. Parte hartzekoa da, eta herritarrei nahiz belaunaldi berriei irekia; beraz, gure kooperatiba-nortasunarekin bat dator guztiz”, azaldu du Josean Yelak, EROSKIren kanpo harremanetako zuzendariak.
Bestalde, José Luis Rebordinosek, Zinemaldiaren zuzendariak, eskerrak eman dizkio kooperatibari bigarren urtez jarraian: “Garrantzitsua da EROSKI, gure gizartean hain txertatua dagoen marka bat, Donostia Zinemaldiaren familiaren parte izatea eta bultzada ematea belaunaldi berriak lengoaia zinematografikoaren molde berrietara hurbiltzeko eta zinemaz gozatzera etortzeko egiten diren ahaleginei”.
Parte hartuko duten 200 epaimahaikideek 21 film ikusiko dituzte; hau da, Zuzendari Berriak saileko 16ak eta Horizontes Latinos saileko bost lehen obra, 22 herrialdetakoak: Alemania, Argentina, Belgika, Txile, Txina, Kolonbia, Hego Korea, Costa Rica, Danimarka, Espainia, Estatu Batuak, Filipinak, Frantzia, India, Norvegia, Herbehereak, Qatar, Erresuma Batua, Suedia, Suitza, Taiwan eta Venezuela. Hamar emakumezkok eta hamaika gizonezkok zuzendu dituzte filmak, eta familiari, deserrotzeari eta ametsei buruzko istorioak kontatzen dituzte.
Gazteriaren EROSKI sariaren bozketako emaitzak egunero jakinaraziko dira Zinemaldiaren web-orrian eta egunkarian. Epaimahaikideek parte hartuko dute sari-banaketan ere. Irailaren 30ean izango da, Zinemaldiaren azken egunean, 19:15ean Kursaal 2an, film irabazlearen emanaldia baino lehen. Horrez gain, 65. edizioaren amaierako galan ere jakitera emango da saria.
Film hauek lehiatuko dira Gazteriaren EROSKI saria lortzeko:
Zuzendari Berriak
Charmøren drama psikologiko bizi bat da, Esmail iraniar gazteari buruzkoa. Izan ere, desesperatua dago Danimarkan geratu ahal izateko aukera emango dioten emakumeak ezagutzeko. Denbora agortu ahala, maitemindu, eta berriz aurkituko da bere iraganarekin. Filmak arraza, gizarte-maila eta bizitza hobea lortzeko borrokaren inguruko gaiak jorratzen ditu.
Yian haurtzaindegira joaten hasi da, eta askotan eskatzen die bere gurasoei aurreko bizitzan izandako aita-amak aurkitzen laguntzeko. Hala ere, sendagileek eta haren gurasoek mania bat dela uste dute. Bitartean, gurasoak elkarrengandik banantzeko negoziatzen ari dira. Bere ama, Yaji, berekin joango da etxetik; bere aitak, Haoteng-ek, Yianen aitona zaintzeko erabakia hartuko du, hura gaixo dago eta...
Alberto García-Alix. La línea de sombra Espainiako panorama artistikoko argazkilari garrantzitsuenetakoaren eta belaunaldi oso baten erreferentziazko artistaren erretratua da. Alberto García-Alixek bere bidea aurkitzeko igaro dituen argi eta itzal guztien zuzeneko lekukotza da hau. Haren estudioko intimitatetik kontatua, orainaren eta iraganaren artean bidaia bat proposatzen du filmak. Haren bizitzaren eta obraren arteko elkarrizketa bat.
Jehovaren lekuko deboziodun gisa, Egiarekin bat eginik bizi dira Alex eta Luisa ahizpa eta haien ama Ivanna. Alexek bere arreba miresten du, hura bere buruaz ziur baitago; aldi berean, Ivannaren urratsei jarraitu nahi die, “lekuko ona” izateko. Baina, Agureen aholkua zalantzan jartzen hasiko da Luisa, eta transgresio horrek haren bizitza aldatuko eta kongregaziotik kanpo geratzeko arriskuan utziko du. Ivannak eta Alexek ez badute itzultzeko konbentzitzen, harengandik aldendu beharko dute. Desafio hori are mingarriagoa bihurtuko da familiaren fedeak beste proba lazgarri bati aurre egin behar dionean. Daniel Kokotajlo Jehovaren lekuko ohiak idatzia eta zuzendua, Apostasyk aparteko aukera ematen du fedearen, familiaren, betebeharraren eta maitasunaren izaera konplexuan sakontzeko.
Udako oporrak baino apur bat lehentxeago, Mia, 15 urteko neskatxa bat, Zuricheko aldirietara bizitzera joango da gurasoekin. Denbora luzez gurasoengandik urrun sentitu da, eta adoptatua al den galdetzen dienean ama samindu egingo da, baina ez dio erantzungo. Mia nerabe-jokabide basatian murgilduko da, guztiari aurre egin nahian; bien bitartean, bere gorputzean aldaketa bitxiak gertatzen hasiko dira. Hasieran ezingo dira hauteman ia-ia, baina ondoren gogorrak izango dira eta burua galtzen hasiko da. Etsirik, sexuaren eta drogen bitartez ihes egiten saiatuko da, estu-estuturik duen zurrunbiloa geldiarazi nahian. Baina natura indartsuagoa da.
Ipar Itsasoaren ur hotzetan, Leon Broucke bere arrantzontzitik eroriko da bere seme zaharrena, Jean, aurrean duela. Agurea koma sakonean murgilduko da, eta semearen gain utziko du zor itzel baten eta familiako negozioaren erantzukizuna. Aitaren faltak gatazkak piztuko ditu Jeanen eta bere bi anaien artean. Francis bi aukeren artean erdibituta dago: edo bere familia, edo maitale ezkutuarekin ihes egitea. William etxera itzuliko da, delituzko bizimodutik ihesi, bere bekatuak garbitu nahian. Jeanek, bere zortzi urteko semearentzat etorkizuna eraikitzeko desesperaturik, anaiari bere iragan kriminala aurpegiratuko dio. Cargo desesperazioari buruzko istorio bat da: etsipenak familia bat suntsitzear nola utz dezakeen kontatzen du.
Gauerdiaren ostean. Zhao erretzera jaitsiko da; bien bitartean, etxean, haren emaztea amets erotiko baten erdian xuxurlatzen dabil, horditurik. Lee izeneko bizilagunak eraikinetik salto egingo du, Zhaoren aurrean, eta suizidioak telefonoz grabatutako sexu-bideo bat ekarriko du agerira. Sanqing bere tutorearekin maiteminduko da. Kostaldera eginiko bidaia batean Sun irakaslearekin duen harremana finkatu nahiko du, baina azkenean ohartuko da bere ahaleginak alferrik izan direla. Hai Long Sun-en aspaldiko kide da. Ahaleginak egingo ditu Sanqing eta Wang izeneko bere bezeroa elkartzeko, eta horrek mendekua hartzeko aukera emango dio Sanqingi. Irlako tunel ilunean, Wang-ek amesgaizto bat kontatuko dio Sanqingi, eta istorio guztia azaleratuko du...
Eguneroko borrokaren errealitate latzak animoa kendu dio lanean gogor diharduen nekazari bati. Erabakita dauka bere semeak baserriaz arduratu behar duela eta bere legatua iraunarazi behar duela. Amak ahal duen guztia egingo du familiaren batasunari eusteko. Hala ere, gero eta beldur handiagoz, aitaren jokabide psikotikoa areagotzen doala ikusiko du semeak. Beste nonbait babesleku bat bilatuko du, baina ezingo dio halabeharrari ihes egin.
Brahim langile-familia batetik datorren komiko arrakastatsu bat da. Azkar lortuko du ospea, baina prezio baten truke: Brahim presiopean dago etengabe, Mourad anaia zaharraren eta Linda neskalagunaren artean. Bata bere managerra da; bestea, bere zuzendari artistikoa. Mundu guztiak itxaropen handiak jarri ditu haren gain: hasi familiatik eta txikitako lagunetara arte. Bere ametsa betetzeko –alegia, bere bigarren ikuskizuna idazteko– eta bere bidea aurkitzeko, anaiarekin duen lotura askatu beharko du Brahimek, baita horretarako prezio handiagoa ordaindu behar badu ere.
1852 urtea. Violette ezkontzeko adinean dago, baina Louis Napoleon Bonapartek aginduta. Errepublikanoen zapalkuntza bortitzaren ondoren gizonik gabe geratu da bere herria. Emakumeek hilabeteak igaroko dituzte erabat isolaturik. Beren gizonak berriz ikusteko desesperaturik, zin egingo dute gizon bat itzuliz gero guztientzat izango dela. Bizitzak aurrera jarraitu behar du haien guztien sabelean.
Paula, 22 urteko ikasle gazte bat, bere aita maitearen hilketaren lekuko izango da. Aita politika-zientzien irakaslea da Medellín hiriko unibertsitate publiko batean. Urrunetik, Paulak hiltzailea ikustea lortuko du hark ziztu bizian motor batean ihes egiten duenean. Gertaera horren ostean lur jota, Paulak eta haren familiak agintarien nagikeria jasan beharko dute. Izan ere, ez dute egingo gertatutakoa argitzeko ahaleginik, eta kasua laster geratuko da artxibatuta eta bertan behera. Eguberria iristean, hilketatik bi hilabetera, ustekabean bere aitaren hiltzaile gaztearekin, Jesúsekin, gurutzatuko da Paula. Zer gertatuko da orduan, mendekua gertagarri ikusten denean? Paulak gizon horrengana gerturatzeko erabakia hartuko du; hasiera batean, erantzunak aurkitzeko sen ia primitiboari jarraikiz, eta, azken batean, norbait erailtzearen muga moral eta etikoa zeharkatu eta aitaren heriotzarengatik mendekua hartzeko.
Bangis ehorzle behartsu bat da, eta bere familiarekin hilerri bateko mausoleo batean bizi da. Egunero beldur da, agintariek ez ote dioten kalera botako kanposantuan legez kanpo bizitzeagatik. Alaba gaixotzen denean dilema bati aurre egin beharko dio: ospitalera joan ala ez. Gaixotasuna hainbat astez luzatuko da, eta Bangisen etsipena handituz joango da. Ongi daki zerbait egin behar duela, bestela alaba ez da onik aterako. Duela gutxi lurperatutako gorpu bat lapurtu eta ehorztetxe bati saltzea erabakiko du. Gauza bakarra espero du: guztia ondo joatea eta bere alaba maitearentzat beranduegi ez izatea.
Jooyong, Koreako armadan soldadutza egiten ari den soldadu bat, bere buruzagietako baten abusuak salatzen saiatuko da, baina ez du lortuko. Jooyongen pelotoiak gauez irteera bat egingo du, eta buruzagiak ahaleginak egingo ditu bere aurkako salaketa nork jarri zuen jakiteko. Beste gertakari bortitz baten ondoren, beste soldadu soil batek hortz bat hautsirik amaituko du, eta Jooyongek bere koinatuaren hortz-klinikara eramango du...
Munduaren azkenean dagoen herrialde urrun batean Tamara bizi da, hamabi urteko neska bat, Miguel karismadunaren zaintzapean. Miguel kultu baten liderra da, eta Tamarak miretsi egiten du. Uda horretan zeregin bat jarriko dio neskari: Miguelekin haur saindu bat izatea, lehen hilerokoa izan orduko. Tamara konturatuko da berak nahi duen bizitza ez datorrela bat ezarri dioten patuarekin. Desobedientziaren ondorioz, neskatik emakumera bilakaera bortitza izango du, eta pentsa ezineko modu batean lortu beharko du bere askatasuna.
Denbora luzea igaro ondoren, Rina bere irlara itzuliko da, Tigreko Delta sakonera. Bere bizitzaren zati handi bat eman zuen han, eta bertan hezi zuen bere semea. Orain bere etxea berreskuratu nahi du, eta berriz elkartu nahi du Facundorekin, hark ere irlatik alde egin baitzuen. Biek, amak eta semeak, guztia aldatu dela deskubrituko dute. Ibaiko makinek dena suntsitu nahi dute. Neskato bat oihanean galdu da. Eta ura gorantz egiten ari da.
Dhunu, 10 urteko neskato bat, Assameko herrixka urrun batean bizi da, Indian, gabezia gorrian. Bera espiritu librea da; bere amak, aldiz, egunero borrokatu behar du mahai gainera janaria ekarri eta seme-alabak hazteko. Hala ere, horrek ez dizkio ametsak galaraziko; adibidez, gitarra bat edukitzea, herriko mutil batzuekin sortu nahi duen 'Village Rockstars' musika-talde txikirako. Dhunuk bere adineko mutilen pareko gaitasuna duela uste du. Aurrerago, mutilek bertan behera utziko dute beren ametsa; Dhunuk, ordea, gitarra bat edukitzearekin amesten jarraituko du.
Horizontes latinos
Reynaldo Galíndez 'Rey' nerabea, bere lehen delitutik ihesi, Carlos Vargas segurtasun-zaindari erretirodunaren etxeko patioan eroriko da. Erortzean, Vargasek tratu bat eskainiko dio: gazteak etxean eragin dizkion kalteak konponduko ditu, poliziara entregatua ez izatearen truke. Ordutik aurrera, zaindari zaharrak nerabeari irakasten dizkion lezioek errege baten prestakuntzari buruzko kondaira zaharrak gogorarazten dituen harreman bati emango diote bide. Ituna apurtzen hasiko da, ordea, Reynaldok parte hartu zuen lapurretako hari askeak haien inguruan estutzen hasten direnean. Industriaren Zinema Eraikitzen eta Zinema Eraikitzen CAACI/Ibermedia TV sarien irabazlea izan zen iaz.
Pedro hamabi urteko mutiko bat da; bere lagunekin, kaleetan zehar ibiltzen da, Caracaseko langile-auzo bateko giro bortitzaren erdian. Borroka batean Pedrok larri zaurituko du beste mutil bat, eta orduan ihes egin eta ezkutatu behar direla erabakiko du Andrések, Pedroren aita ezkongabeak. Andrés konturatuko da aita gisa ezin duela bere seme nerabea kontrolatu, baina, egoera hori dela medio, inoiz baino gehiago hurbilduko dira bata bestearengana.
Teresa (54) hainbat hamarkadaz aritu da Buenos Airesen etxe-zerbitzari. Orain, familiak etxea saltzeko erabakia hartu du, eta lana urrun bilatu beharko du Teresak. Bidaiatzea asko gustatu gabe ere, ibilbide luzeari ekin beharko dio basamortuan zehar. Lehen geldialdian, "Difunta Correa" mirarigilearen lurraldean, bere eskuko zorroa galduko du, bere gauza guztiak barruan dituela. Gertakari hori dela eta, saltzaile ibiltari batekin batera bidaiatuko beharko du, hark soilik lagundu baitiezaioke. Itxuraz bere bidearen amaiera zena, hasiera izango da.
María Joséren bizitza monotonoa da: unibertsitateko eskolak, guraso beti urrunak, errugbi-entrenamenduak eta bere lagun homosexualarekin erronkak. Bere inguruarekiko lotura emozionalen faltan, Javier ezagutzen duenean harekin harreman bat hasten saiatuko da. Baina bizitza 'normala' izateko egiten dituen ahaleginetatik, bakar bat ere ez da arrakastatsua izango. Sekretu bat ezkutatzen du, inor konturatu gabe: hainbat hilabete daramatza haurdun.
Nahuel berezko jokabide bortitza duen nerabe bat da. Bere amaren heriotzaren ostean, Patagoniara bidaiatuko du, Argentina hegoaldera, eta han bere aita biologikoarekin aurkituko da, hamarkada batean baino gehiagoan hura ikusi gabe egon ondoren. Ernesto ehiza-gidari errespetatua da; mendian bizi da bere bigarren emaztearekin eta alabekin. Aitari eta semeari ez zaie erraza izango elkartzea; biak ala biak harroak dira eta erresuminduta daude. Egoskortuta, edonolako kontaktua izateari uko egingo diote. Hala ere, asteak joan eta negua finkatu ahala, Nahuel amore ematen hasiko da. Hasierako etsaikeriak jakin-minari emango dio bide, aitaren ehiza munduarekiko eta inguru horretan ezagutuko duen nerabe taldearekiko. Bestalde, semearekiko duen maitasun ukaezinak Ernestoren gogortasuna samurtuko du...