Ofizialak
Partner
"Z365" edo "Zinemaldia urte osoan" Zinemaldiaren apustu estrategiko berria da, non talentu berrien bilaketa, laguntza eta garapena (Ikusmira Berriak, Nest); formakuntza eta zinema-ezagutzen transmisioa (Elias Querejeta Zine Eskola, Zinemaldia + Plus, Zinemagileen elkarrizketa); eta ikerketa, dibulgazioa eta pentsamendu zinematografikoa (Z70 proiektua, Pentsamendua eta eztabaida, Ikerketa eta argitalpenak) elkartzen diren.
Deialdia Sartu NIRE ZINEMALDIRA 
Agenda Programa eta sarrerak Bilatu 
Donostia Zinemaldiak haurrentzako bereziki pentsatutako sei filmen hautaketa bat aurkeztuko du, bigarren urtez jarraian, Amenabar enpresak –Zinemaldiaren Laguntzaile Ofizial ere badenak– babestuko duen sail batean.
Guztira, animaziozko bost film eta irudi erreala eta animazioa nahasten dituen film bat eskainiko dituzte. Animaziozkoak hauek dira: Alfonbra magikoa, Hodja eta bere alfonbra hegalariaren abenturak kontatzen dituena; Terra Willy: planeta ezezaguna, gazte bat, robot bat eta estralurtar bat protagonista dituena; Mr. Link: Jatorri galdua, mito eta munstroetan zentratutako ikertzaile bati buruzkoa; Playmobil: Filma, jostailu-fabrikatzaile ezagunaren unibertsoko bidaia liluragarria; eta Manou, kaio izan nahi duen enara txiki bati buruzkoa. Gainera, Pokémon Pikatxu detektibea Pokémon frankizia ezagunaren unibertsoan oinarritutako irudi errealeko lehen filma da.
Zinemaldiak dirauen bitartean, familientzako saioak programatuko dira asteburuetan Príncipe zinema-aretoetan. Film guztiak euskarara bikoiztuta egongo dira, Zinema euskaraz programaren esparruan Zineuskadiren lankidetzari esker. Donostia Zinemaldiak hiru hamarkada baino gehiago darama zinema txikienengana eramaten Haurrentzako Zinema sailaren bidez, eta bereziki eskertu nahi dio Amenabarri urte zail honetan Gipuzkoako familien aldeko eta publiko berriak sortzeko apustua egiten jarraitzea.
Amenabar taldeak, Zinemaldiaren Laguntzaile Ofiziala iaztik, ia 40 urteko ibilbidea du eta Espainiako sustatzaile garrantzitsuenetako bat da. Sustapen- eta eraikuntza-enpresa propioak izateaz gain, baliabide propioetako beste enpresa batzuk ere baditu (harrobia, asfaltoa, ekipo teknikoak eta lagin-fabrika, besteak beste). Sustapenean eta eraikuntzan espezializatua, esperientzia handiko konpainia da, 25.600 etxebizitza baino gehiago eraiki baititu, eta gaur egun 62 sustapen baino gehiago ditu Espainian. Gainera, Amenabarrek hainbat eraikin enblematiko egin ditu, besteak beste, Kursaal, Basque Culinary Center, Biodonostia Osasun Ikerketako Institutua, Tabakalera eta San Telmo Museoa.
Mila gau eta bat gehiago sortako kontakizuna, bere ahuntz leialaren ondoan, eta alfonbra hegalari baten eta hiri handiko kaleetan bizi den neska baten laguntzaz, munduan bidaiatzeko eta etsaiak garaitzeko moldatzen den herriko haur bati buruzkoa: boterea lortu nahi duen duen sultan bat, bi kaiman goseti eta eskrupulurik gabeko bilau bat...
Manou enara txiki bat da, eta istripu baten ondoren, kaio bikote batek haziko du. Bera ere kaioa dela sinetsita haziko da, baina laster jakingo du ez dutela inoiz kaio gisa onartuko. Kaioen taldean egokitzen saiatu baina huts egingo du, eta horregatik, bere espezie bereko txoriak ezagutu eta horiekin bizitzen geratzea erabakiko du. Baina laster bai enarek bai kaioek oso arazo larri bati aurre egin beharko diote, elkarrekin lan eginez, eta Manou inoiz izan ez den heroia izango da.
Mito eta munstroak aztertzen dituen Lionel Frost ikertzaileak izaki bitxi eta atsegin bat ezagutuko du, azkena bere espeziean, Mr. Link izenekoa. Frostekin batera, Mr. Linkek bidaia liluragarri eta dibertigarri bati ekingo dio, bere lehengusuak –aspaldi desagertutako Yetiak– aurkitzeko prest. Adelina Fortnight abenturazale porrokatuaren laguntza izango dute, hark izanik Yetien kokapena erakusten duen mapa ezagun bakarra. Elkarrekin, helmugara iristeko arrisku ugariri aurre egingo diete.
Charlie txikia Playmobilen mundu magiko animatuan bat-batean desagertzen denean, haren arreba Marlak bere bizitzako bidaiari ekingo dio, neba berriz etxera ekartzeko asmoz. Mundu harrigarrietan sartu eta ezinezko erronkak gainditu ahala, Marlak lagun berri eta oso dibertigarriekin egingo du topo.
Pikachu detektibeak Tim gazteari lagunduko dio bere aitaren –Harry Goodman detektibearen– desagerpena ikertzen. Tim eta Pikachu konturatuko dira elkarrekin modu guztiz sinestezinean komunikatu daitezkeela, eta elkarrekin abentura zirraragarri bati ekingo diote misterio bitxi bat argitzeko.
Willy gurasoekin espazioan zeharreko misio batean bidaiatzen ari den haurra da. Espaziontzia istripuz suntsitzen denean, Willy larrialdi-kapsula batean jaurti, gurasoengandik urrundu eta esploratu gabeko planeta basati batean lurreratuko da. Bi lagun izango ditu: Buck, bizirik irauten laguntzeko robota, eta Flash, lagun estralurtarra; horiekin batera, Willyk gurasoekin berriz elkartzeko modua bilatuko du mundu berri liluragarri horren sekretuak aurkitzen dituen bitartean.
Bideoak
Irudiak
Astelehenetik ostiralera: 09:00 - 15:30