Ofizialak
Partner
"Z365" edo "Zinemaldia urte osoan" Zinemaldiaren apustu estrategiko berria da, non talentu berrien bilaketa, laguntza eta garapena (Ikusmira Berriak, Nest); formakuntza eta zinema-ezagutzen transmisioa (Elias Querejeta Zine Eskola, Zinemaldia + Plus, Zinemagileen elkarrizketa); eta ikerketa, dibulgazioa eta pentsamendu zinematografikoa (Z70 proiektua, Pentsamendua eta eztabaida, Ikerketa eta argitalpenak) elkartzen diren.
Deialdia Sartu NIRE ZINEMALDIRA 
Agenda Programa eta sarrerak Bilatu 
Irabazlea irailaren 24an iragarriko da Donostia Zinemaldiaren 69. edizioan
SGAE Fundazioak Dunia Ayaso Sariaren bosgarren edizioko finalistak iragarri ditu. Hala, irabazlea datorren irailaren 24an emango da ezagutzera, 17:00etan, Kursaalean, Donostia Zinemaldiaren 69. edizioan. Duela zazpi urte hildako gidoilari eta zuzendari kanariarrari egindako omenaldi gisa sortu zen golardoa eta emakumeen irudiarekin konpromisorik handieneko zinema-lanak aitortzen ditu.
Hauek dira 2021eko edizioan saria eskuratzeko lehian arituko diren filmak: Maixabel, Icíar Bollaínena; Las leyes de la frontera, Daniel Monzónena; Josefina / Josephine Javier Marcorena; eta Destello Bravío, Ainhoa Rodríguezena. Lehenengo bi filmak Zinemaldiko Sail Ofizialean ikusi ahalko dira, Josefina New Directors sailean lehiatuko da eta Destello Bravío, azkenik, SGAE Fundazioarekin elkarlanean antolatutako Made in Spain sailean erakutsiko da.
Sari horrekin (5.000 euro), duela gutxi ekoitzi den film bat sarituko dute, baldin eta, balio zinematografiko handia izateaz gain, historian protagonismoa izan duten emakumezko pertsonaiak erakusten baditu edo emakumeak gizartean duen egoera islatzen badu. Hain maiz emakumeen errealitatea, aukerak eta memoria historikoa faltsutzen dituzten estereotipo eta leku komunak gainditzen dituzten pelikulak.
Ikus-entzunezkoen sektoreko hainbat profesionalez osatutako epaimahai batek aukeratuko du film irabazlea. José Luis Rebordinos Donostia Zinemaldiko zuzendariak eta Silvia Pérez de Pablos SGAE Fundazioko ikus-entzunezkoen zuzendari eta gidoilariak emango diote saria irabazleari irailaren 24an.
Aurreko edizioetan, honako hauek jaso dute saria: Carla Simón (2017) zuzendariak Verano 1993 filmagatik; Arantxa Echevarria errealizadoreak, Carmen y Lola (2018) pelikulagatik; Belén Funes La hija de un ladrón (2019) obragatik, eta Pilar Palomero, Las niñas (2020) bere lehen lanagatik. Sariaren lehen bi edizioetan, golardoa Valladolideko SEMINCIn eman zen.
Dunia Ayaso errealizadore kanariarrari buruz
Dunia Ayaso (Las Palmas Kanaria Handikoa, 1961 - Santa Cruz Tenerifekoa, 2014) gidoilari eta zuzendaria Perdona bonita pero Lucas me quería a mí, Descongélate, La isla interior eta beste film arrakastatsu batzuen egilea da. Félix Sabroso bere lagun bereizezinarekin egin zuen lan. Telebistarako, ikus-entzule ugariko telesailak idatzi zituzten, hala nola Mujeres eta Quítate tú para ponerme yo. Elkarrekin sortu zuten azken proiektua, El tiempo de los monstruos film luzea, Félix Sabrosok bakarrik zuzendu zuen urte batzuk geroago. Ayasok antzerkian ere egin zuen lan, Lifting, La gran depresión eta Las histéricas somos lo máximo lanekin. SGAEko bazkide izan zenak, sari ugari jaso zituen bere lanbide-ibilbidean zehar, eta nabarmentzekoa da, besteak beste, 2009an Televisión Españolak (TVE) eman zion Navaja de Buñuel saria, Alberto San Juan eta Geraldine Chaplin aktoreak protagonista izan zituen La isla interior filmari urteko film onena izateagatik emandakoa.
| SAIL OFIZIALA |
2000. urtean, Maixabel Lasaren senarra, Juan María Jáuregui hil zuen ETAk. Hamaika urte geroago, ezohiko eskaera bat jaso zuen: bere senarra hil zuten gizonetako batek berekin hitz egiteko eskatu zion Langraiz Okako espetxean (Araba), zigorra betetzen ari deneko kartzelan, talde terroristarekin zituen harremanak eten ostean. Zalantzak zalantza eta atsekabe handia izan arren, Maixabel Lasak onartu egin zuen aurrez aurre ikustea 16 urte zituenetik bere bikote izandakoa hil zuten pertsonekin. "Mundu guztiak merezi du beste aukera bat", erantzun ohi du emakumeak galdetzen diotenean zergatik erabaki zuen hitz egitea bere senarra hil zuen gizonarekin.
Istorioa 1978ko udan hasten da. Nacho Cañas hamazazpi urteko ikasle barnerakoia da, eta kosta egiten zaio ingurura moldatzea. Gironan bizi da, eta egun batean Zarco eta Tere –hiriko auzo gatazkatsueneko bi gaizkile gazte– ezagutu eta amodiozko triangelu batean nahasiko da, uda osoan zehar bere bizitza betiko aldatuko duen ebasketa-, lapurreta- eta oste-lasterketa geldiezin bat bizitzera eramango duena. Las leyes de la frontera udako istorio bat da, eta bertan, Nachok lehen maitasuna sentituko du, heldu bihurtuko da, bi munduren arteko muga etengabe hautsiko du, eta ongiaren eta gaizkiaren –justiziaren eta injustiziaren– arteko lerroa zeharkatuko du.
| NEW DIRECTORS |
Juan espetxe-funtzionarioak igandero behatzen dio, isilik, Bertari; presoetako baten ama da Berta. Azkenik, Bertarekin hitz egitea lortuko du, baina, ia konturatu gabe, beste aita baten itxurak egiten hasiko da, eta kartzela barruan Josefina izeneko alaba bat duela asmatuko du. Juan eta Bertak duten hutsunea betetzeko premiak, inguruan duten errealitatetik haratago elkar topatzera eramango ditu.
| MADE IN SPAIN |
"Argialdi bortitza iritsiko da, zakarra, eta dena aldatuko da". Isak bere buruari hitz egin eta grabagailuan mezuak uzten ditu, oroimena galtzen duenerako. Cita ezkonduta dago baina harrapatuta sentitzen da santuz eta birjinaz betetako etxe batean. María jaioterrira itzuliko da bere bakardadeari aurre egiteko. Emakume talde bat landa-eremuko herri txiki batean bizi da, despopulazioak astindutako toki batean, denboratik at, eta eguneroko bizitzak eragindako apatian murgilduta, sekula ez zaiela ezer apartekorik gertatzen, baina, aldi berean, esperientzia askatzaileak irrikatzen dituzte sakonki, zoriontsu izan zireneko edo amets hori izan zuteneko tokia noiz aurkituko berriz. Denak matxinatuko dira, bakoitza bere modura, errutinaren kontra.
Astelehenetik ostiralera: 09:00 - 14:00 | 16:00 - 19:00.