Donostia Zinemaldiak, Tabakalera Kultura Garaikidearen Nazioarteko Zentroak eta Elías Querejeta Zine Eskolak gaur egungo eta etorkizuneko zinemagileen inguruko ekimen bat bultzatu dute hirugarren urtez. Kabia zinemagintzako talentu emergenteari eskainitako jardunaldi bat da, eta hilaren 22an (astelehena) bi jarduera egingo dira Tabakalerako zinema eta ikus-entzunezko laborategian: lehenik, Kabia Networking (17:00etatik 19:00etara), eta, ondoren, koktel bat (19:30etik 23:00etara). Networking-jardueraren aurretik, Ikusmira Berriak egoitza-programaren hamargarren urteurrenari buruzko liburua aurkeztuko da.

Bi proposamenek ondoz ondo jarriko dituzte Nest saileko filmetako taldeak (Donostia Zinemaldiko zinema-ikasleen film laburren aukeraketa), Ikusmira Berriak programako egoiliarrak eta Tabakalerako komunitatea —hau da, Nokako emakumezko errealizadore hautatuak eta Elías Querejeta Zine Eskolako ikasleak—. Bertan izango dira, orobat, Mannheimeko Cutting Edge Camp topaketako zinemagileak. Kabiaren asmoa da programa eta atal horietako komunitateak elkartzea, eta, hala, guztien artean ideiak trukatzea, proiektuak partekatzea eta profil desberdinengatik hautatutako industriako profesionalen inguruan egotea ere; esate baterako, ekoizleak, jaialdietako programatzaileak eta garapen-programa edo laborategietako kideak, baina baita funtsak eta dirulaguntzak eskuratzeko aukera ematea ere. Donostia Zinemaldiak eskaintzen duen esparruari esker, feedback bat jaso ahal izango dute, bai eta kontaktu-sare zuzen bat egin ere. Aurten gonbidatutako pertsonak ordezkari izan ziren zenbait jaialditan; besteak beste, hauetan: Sundance, Tribeca, Rotterdam, Giornate degli Autori, Locarnoko Open Doors, Cinema du Réel eta Cannesko Semaine de la critique atala.

Parte hartzeko gonbidapena behar da.

Keler Topagunea, ikus-entzunezkoen sektorea eta talentu emergentea elkartzeko gunea

Gainera, Zinemaldiak eta Tabakalera Kultura Garaikidearen Nazioarteko Zentroak hirugarren urtez jarraian bultzatuko dute Keler Topagunea: irailaren 22tik 25era izango da (astelehenetik ostegunera), 19:30etik 23:00etara, Tabakalerako zinema eta ikus-entzunezko laborategian. Ekimenak Kelerren babesa eta BIMEren laguntza ditu, eta zinemagileei, zinema-industriako profesionalei eta kazetariei zuzenduta dago —oro har, Zinemaldian akreditatutako pertsona guztiei, bereziki Zinemaldiak eta Tabakalerak bultzatutako programa eta sailetara bideratutako lana dutenei—.

Keler Topaguneak bestelako itxura izango du astelehenean (hilak 22) eta ostegunean (hilak 25). Irailaren 22a (astelehena) Kabiari eskainia izango da, hau da, zinemagintzako talentu emergenteari eta, bereziki, networking-jarduerari. Ostegunean (hilak 25), berriz, BIME hartuko du, Iberoamerikako musika-industriaren erreferentziazko topaketa. BIME urtean bitan egiten da Bilbon eta Bogotan, eta Europa eta Amerikaren arteko nazioartekotze zubi handi gisa funtzionatzen du. Hala, ezinbesteko espazioa da joerak aurreratzeko, erreferentziak konektatzeko eta musika-ekosistema globalaren bilakaera ulertzeko. BIMErekin antolaturiko lankidetza horrek, gainera, musika-programa bat ekarriko du egunero: 22an Ines izango da musika jartzen; 23an Ope Loeb, 24an Beltranz, eta 25ean, azkenik, Mario Azurza.

Sartzeko, akreditazioa eskatuko da.