Basque Culinary Centerrek, Donostia Zinemaldiak eta Berlingo Nazioarteko Zinema-jaialdiak "Culinary Zinema" sailaren programazioa aurkeztu dute gaur, uztailak 18. Prentsaurrekoan izan dira Thomas Struck, Berlingo zinema-jaialdiko "Culinary Zinema" saileko arduraduna, Joxe Mari Aizega, Basque Culinary Centerreko zuzendaria, eta José Luis Rebordinos, Donostia Zinemaldiaren zuzendaria.
Donostia Zinemaldiak duela lau urtez geroztik Berlingo Zinema-jaialdiarekin eta Basque Culinary Centerrekin dakarren lankidetzaren helburua da Euskal Herrian den zinemaren inguruko hitzordurik behinena eta munduan Michelin izar gehien biltzen dituen eskualdearen aberastasun gastronomikoa bat egitea.
"Culinary Zinema" sailaren laugarren edizioari irailaren 20an emango zaio hasiera The Hundred-Foot Journey filmaren eskutik. Filma zaporez gainezka dator eta Helen Mirren oscar-irabazlea du protagonista, Lasse Hallström zinemagile ospetsua zuzendari eta Steven Spielberg eta Oprah Winfrey, berriz, ekoizle. Aurtengo edizioaren programa zazpi filmek eta lau film laburrek osatzen dute guztira.
Film-sortarekin batera, ohi denez, nazioarteko ospea duten hainbat sukaldarik prestatutako afari tematikoak eskainiko dira Basque Culinary Centerren eta ni neu, Tenis Ondarreta eta Mirador de Uliako jatetxeetan.
Horrez gain, aurten lehendabizikoz, Tokyo Gohan Film Festivalarekiko lankidetzari heldu dio "Culinary Zinema" sailak. Oso kontzeptu argi batez hasi zen lehiaketa hura, 2010ean: film bat ikuste hutsetik harago joatea eta otordu batez bost zentzumenen bidez eta zinema eta musika onaren laguntzaz gozatzea, «film ezin gozoagoak» programatuta. Tokioko Harajuku auzoko Omote-Sandon egiten da zinemaldia, ordezko kultura eta bizimoduaz gozatzeko toki behinenean. Tokyo Gohan Film Festivalek aukeratutako epaimahai batek 10.000 €-ko sari bat esleituko dio "Culinary Zinema" atalean programatutako filmetako bati, eta filma aurkeztu duen banatzaileari edo filmaren ekoizleari emango zaio.
Tokyo Gohan Film Festival jaialdiaren zuzendari Naoki Kairen hitzetan, «sekulako ohorea da Donostia Zinemaldiarekin elkarlanean jardutea, eta espero dugu lankidetza oparo baten hasiera izatea hau; hala, Donostia, mundu zabaleko film gastronomikoak eta sukaldaritzako kultura Japonian ezagun egin daitezen, gure Zinemaldiari esker». Tokyo Gohan Film Festival-ek Yuko Shiomaki, pictures.dept.com.ltd -ko presidentearen laguntza dauka.
«Culinary Zinema» saileko proiekziorako eta afarirako txartel bateratuak irailaren 1ean ipiniko dira salgai, 57,20 eurotan, Zinemaldiaren ohiko kanaletan:
Zaporez betetako komedia hau Lasse Hallström zinemagile ospetsuak zuzendua da, eta Helen Mirren Oscar sariduna du protagonista. Hassan Kadam sukaldaritzako profesional sineskorra da, eta gustu ezin hobea du. Frantzia hegoaldeko Saint-Antonin-Noble-Val herri txikian jatetxe indiar bat irekiko du, Madame Malloryk zuzendutako eta Michelin izar bat duen jatetxe frantziarretik hamar metro eskasera. Eta halaxe hasiko da bien arteko gerra.
Dokumental honek Bilboko Guggenheim museoko Nerua jatetxeko chefaren proiektuaren xehetasunak eta erroak biltzen ditu. Gastronomiaz harago doan proposamena.
Peruko gastronomian barrena egindako bidaia, Gaston Acurio chefak gidatuta. Acuriok sukaldaritza erabili nahi du bere herrialdean aldaketa eragiteko. Sukaldaritzaren boterearen egunerokoa bizi duen herrialde baten istorioak, ametsak eta gazi-gozoak.
Beren buruari «Brooklyn Grange» deitzen dioten New Yorkeko nekazari batzuek teilatu baten gainean inoiz sortutako baratzerik handiena eraiki dute.
Goi mailako sukaldaritzarekiko interesa izugarri hazi da. Gastronomiaren arloan eragin handiena duten pertsonen munduan sartuko gara: foodienean. Sukaldaritzako blogetako kritikarien subkultura osatzen dute, eta munduko jatetxerik onenetan jatea dute helburu. Azterketa zehatz honen bidez, munduko jatetxerik esklusiboenetan sartuko gara eta janariarekin maniatikoak diren pertsona berezi eta atseginen talde bat ezagutuko dugu.
Urtero, Irango herri txiki batean, hirugarren imam xiitaren alde egiten duten zazpi eguneko doluan, abgusht izeneko jaki berezia ematen dute 5.000 lagunentzat baino gehiagorentzat. Jendeak abesti erlijiosoak xuxurlatzen ditu, janaria eta ogia prestatzen duten bitartean.
Bizitzeko jaten du. Jateko egiten du sukaldean. Ichiko lurretik elikatzen da, eta bertatik hartzen du energia. Bizitza-estilo horretan, gauza guztiak elkarrekin lotuta daude. Film honek Japoniako lau urtaroak deskribatzen ditu. Errezeta soilak, baina irudimenez eginak, aho-gozagarri bikainak.
Eric Khoo zuzendari ospetsuaren (Be With Me eta Tatsumi) film berriak emakume baten eta haren ama adinekoaren arteko harremana azaltzen du, sukaldaritzarekiko sentitzen duten maitasunaren bitartez.
Wayne Wang zuzendariak Amerikara benetako janari txinatarra eraman zuen Cecilia Chiang-en mundua azalduko digu. Film hau gastronomiaren erakusgarri atsegina ez ezik, Chiangen erretratu hunkigarria ere bada.
Munduko xerra onenen bila errepidez egindako bidaia gastronomikoa. Mundu zabaleko (Frantzia, Italia, Espainia, Suedia, Belgika, Erresuma Batua, Estatu Batuak, Kanada, Japonia, Argentina eta Brasil) hazleek, nekazariek, harakinek, sukaldariek, historialariek eta enpresariek beren sekretuak azalduko dituzte.
Xabier Gutiérrez sukaldariaren, Juan Vich margolariaren, Gonzalo Busto musikariaren eta Pello Gutiérrez errealizadorearen arteko zentzumen-elkarrizketa. Laurek interpretatu dute platera, bakoitzak bere ikuspegitik. Lauretako inork ez zuen besteen lanaren dimentsioa ezagutzen. Plater biribil baten inguruko lau begirada.
Datak - Filma
|
Jatetxea
|
Sukaldariak
|
|
|
|||
Inagurazioa. Larunbata 20
• THE HUNDRED-FOOT JOURNEY
|
Basque Culinary Center
|
Sukaldaria baieztatzeke
|
|
|
|||
Igandea 21
• LITTLE FOREST - NATSU & AKI / LITTLE FOREST - SUMMER / AUTUMN
|
ni neu
|
Mikel Gallo, Kenji Takahashi
|
|
|
|||
Astelehena 22
• TXIPIRONES EN SU TINTA
• FOODIES |
Basque Culinary Center
|
Jakob Mielcke
|
|
|
|||
Asteartea 23
• HOZOUR / PRESENCE
• SOUL OF A BANQUET |
Restaurante Tenis Ondarreta
|
Kevin Patricio
|
|
|
|||
Asteazkena 24
• BROOKLYN FARMER
• RECIPE |
Basque Culinary Center
|
Francis Paniego
Nacho Manzano |
|
|
|||
Osteguna 25
• STEAK (R)ÉVOLUTION
|
Mirador de Ulía
|
Rubén Trincado
|
|
|
|||
Klausura. Ostirala 26
• NERUA, UN VIAJE A LA ESENCIA
• BUSCANDO A GASTÓN |
Basque Culinary Center
|
Gastón Acurio
|
|
|
Gastón Acurio
Sukaldari hutsa baino askoz gehiago da Gastón Acurio, gidari bat da, eta Peruko gastronomia munduko handienen artean kokatzea lortu du. Perutar guztiak elkartzen dituen lotura bilakatu da sukaldaritza, eta Acurio bera da horren erantzulea; bere esanetan, «mundua perutartzea» du lanaren helburu. Munduan itzal gehien egiten duten hogei sukaldarien artean ipini dute Gastón Acurio gastronomiaren alorreko kritikari eta profesional onenek. Basque Culinary Centerreko Nazioarteko Aholku batzordeko kide ere bada. Acuriok Liman duen jatetxea, Astrid y Gastón Casa Moreyra (astridygaston.com), munduko 18. sailkatu du San Pellegrino Gidaren 2014ko edizioak munduko 50 jatetxe onenen artetik, eta Latinoamerikako lehentzat jo zuen 2013ko edizioak.
Mikel Gallo
Mikelek hurbiltasun bokazioa duen sukaldea zuzentzen du. Eta bete-betean lortu du: keinu tradizionaletan oinarrituta, teknika garaikideak eta oso pertsonalak erabiltzen ditu sukaldean. Emaitza bikaina eta ulergarria da, eta bat dator ni neu jatetxearen inguru bereziarekin. Hurbileko bikaintasuna.
Nacho Manzano
Nacho Manzano chef asturiarrak bi Michelin izar ditu Arriondas udalerriko Casa Marcial jatetxean, eta beste bat Gijóneko La Salgar jatxetxean. Espainiako belaunaldi berriko sukaldarien artean ale apartekoa da, sekulako jarduera eta aurrera egiteko grina dituena; horren erakusle dira sortu dituen negozioak, cateringa eta jatetxe-formula berriak kasu. Bere esperientzia eta jakituria Londres aldera eraman ditu Iberica London eta Iberica Canary Wharf jatetxeekin, eta biak ere Londresko jatetxe berrien rankingean lehen hamarren artean daude. Nacho Manzanok proposamen delikatuak egiten ditu, ohiko bideetatik aldentzen direnak, betiere bere kultur erroei eta produktuari erreparatuz. Jatunak bikaintasuna lortzen duten sorkuntza-formulak topatuko ditu chef honen eskaintzan.
Jakob Mielcke
Aarhus-en (Danimarka) 1977an jaioa, mundu osoan barrena ibilia da Jakob Mielcke chef autodidakta. Maisu handiekin egin du lan, hala nola Pierre Gagnairerekin, bai Londresko jatetxean, bai Parisko jatetxe ospetsuan, hiru izar dituenean. 2002an Danimarkara itzuli zen Jan Hurtigkarl & Co.-ko sulkaldariburu gisa. 2008an, Jan Hurtigkarlekin batera, Mielcke & Hurtigkarl inauguratu zuen Danimarkako Baratzezainen Errege Elkartean, eta han ustiatzen du gaur egun bere sormeneko ikuspegia. Munduko ehun chef sortzaileenen Phaidon zerrendara bildu dute oraintsu Jakob. Mielcke & Hurtigkarl jatetxeko bazkide eta zuzendari exekutiboa da.
Francis Paniego
Francis Paniego El Portal de Echaurren (bi Michelin izar) eta Marqués de Riscal (Michelin izar bat) jatetxeetako chefa da, bai eta gaur egungo Espainiako sukaldaritzako erreferenteetako bat ere. Francisek abangoardiako oso sukaldaritza pertsonalerako bilakaera egin du, Ezkaraiko (Errioxa) El Portal de Echaurren jatetxe ospetsuan lehen eskaintzen zuen ezer baztertu gabe. 2011ko Gastronomia Sari Nazionalaren, Repsol Gidaren hiru eguzkiren (El Portal de Echaurren jatetxerako) eta 2012ko Chef Millesime sariaren irabazle nekaezinak beste proiektu bat ere abiarazi zuen 2011n, Luisa emaztearekin batera: Logroñoko Tondeluna jatetxea. Hainbat kronikarik «etorkizuneko taberna» dela esan dute, eta 2012an Arkitekturako FAD saria jaso zuen.
Kevin Patricio
Euskal Herrian bizi den estatubatuarra dugu Kevin Patricio. Baltimoreko gazte hau, newyorktartua eta ondoren donostiartua, Donostiako La Madame jatetxeko sukalde-kontuen gainbegiralea da. Halaber, Basqueland Brewery Project eskualdeko mikrogaragardotegi berriaren sortzaileetako bat da. Sukalde-kulturari dagokionez errenazentista, Donostiako saltokiko sukaldari buru, sommelier, barman eta arduradun dabil; horrez gain, garagardotegiko «Big Guy» izendatu zuen ebre burua, eta han zuzendari exekutibo, lor-mando eta mandatariaren egiten du. Hainbat aldizkaritan idatzia da Kevin, hala nola Food & Wine, Departures, Men's Journal, Eater eta, berriki, Lucky Peach. Halaber, 2013an Charlestonen eta 2014an Yucatanen egin den Cook It Raw chef-en nazioarteko topaketaren antolatzaile bakan eta harroetako bat da.
Kenji Takahashi
Japoniako Hyogo prefekturako Kobeen hirian 1971ean jaioa, hamar urtez jardun zuen Kenji Takahashik Japoniako oso merkataritza-kate ospetsu baten arduradun gisa. Lanean aritzearekin batera, sorterriko jatetxe batera joan ohi zen sukaldeko teknika ikasteko. Tokiora jo zuen hango zenbait jatetxetan sukaldari ikastun aritzeko lanean, eta aldi batez Japoniako arrain-bentarik handienetako batean ere aritu zen. 33 urte betetzean Donostiara egin zuen euskal sukaldaritza ikasi nahian. Abarka, Ganbara, eta La Espiga jatetxeetan sukaldari eta sukaldeburu ibilia da. Handik urte batzuetara Donostiako Parte Zaharreko Atari tabernan sushia saltzeko txoko bat antolatu zuen; berak ekarria da sushiaren booma Donostiara. Bere kasa ekin zion gero San Martingo azokan Kenko Sushi postua zabalduz. Japoniako jakiak prestatzen ditu merkatuko lehengairik onenak baliatuta. 2013ko udan bigarren saltokia zabaldu zuen Kenjik: Kenji Sushi Bar, Donostiako Kale Nagusian. Japoniako ohiko jaki beroak eta sushia eskaintzen du bertan, beti kalitate oneneko lehengaiak erabilita.
Rubén Trincado
Rubén Trincado Mirador de Ulía jatetxeko sukaldariak proposatzen duen sukaldaritza berritzailea da eta ez du konplexurik. Nolanahi ere, sukaldaritza tradizionalean errotuta dago. Hortik datorkio, bada, zapore eta usainekiko grina. Gainera, teknikarik aurreratuenak aplikatzen ditu mahaikideak plateraren osaketarekin harritzeko, baina, batik bat, zehaztasunarekin.