Christian aita dibortziatua da, eta gustuko du denbora bi alabei ematea. Programatzailea da arte garaikideko museo batean; auto elektrikoa duen eta kausa gizatiar handiak babesten dituen pertsona horietako bat da. Bere hurrengo erakusketa prestatzen ari da: The Square, bisitariak altruismora bultzatzen dituen eta beren kideekiko dituzten betebeharrak gogorarazten dizkien instalazio bati buruzkoa. Baina batzuetan zaila da norberaren balioei jarraikiz bizitzea: Christiani telefono mugikorra lapurtuko diote, eta bere erreakzioak ez du ondo utziko preseski… Une berean, museoko komunikazio-agentziak kanpaina harrigarria aterako du The Squarerako: erreakzioa ustekabekoa da erabat, eta krisi existentzial batean murgilduko du Christian. Canneseko Urrezko Palmorria.

Harreman baten haustura eta gero, 23 urteko neska bat bere aitaren etxera itzuliko da. Han, aitak beraren adin bereko norbaitekin harreman bat duela aurkituko du neskak.

Muchos hijos, un mono y un castillo: horra hor Julitak umetatik izan dituen ametsak, eta hirurak bete dira. Bere seme gazteenak jakingo du amak birramona erailaren ornoa galdu duela, hiru belaunalditan zehar gordeta egon ondoren. Orduan, familiak bilaketa xelebre bati ekingo dio, Julitak bere bizitzako laurogei urtean baino gehiagoan bildu dituen objektu bitxi eta arraroenen artean aurkitu nahian ornoa. Hala, pertsonaia multzo arin eta entretenigarria erakutsiko digute. Julita, egiatan, bizitzaren benetako esanahia ezagutzear da. Dokumental onenaren irabazlea izan da 2017an Karlovy Varyn.

Txinan 1966an –hau da, Iraultza Kulturalaren lehen aroan, garai erradikalenean– filmatutako metraje amateur bat aurkitu ondoren egina, No intenso agorak intentsitate handiko uneen izaera iragankorrari buruz hitz egiten digu. Frantzian, Txekoslovakian eta, hein txikiagoan, Brasilen 1968an jazotako gertakarien artxibo-irudi batzuekin kontrajartzen ditu Txinako eszenak. Saiakera-filmen tradizioari jarraikiz, ikerketa gisa balio dute: nola egin zuten aurrera gertakari horietan parte hartu zutenek, grinak baretu eta gero. Metrajea artxibokoa da guztiz, eta filmatutakoen gogo-aldartea azaleratzeaz gain –poza, lilura, beldurra, desengainua, atsekabe sakona–, dokumentuen eta euren testuinguru politikoaren arteko harremana argitzen du. Zer esan daiteke Paris, Praga, Rio de Janeiro edo Pekinen inguruan garaiko irudiei begiratuz gero? Zergatik sortu zuen hiriotako bakoitzak dokumentu mota zehatz bat?

Carlos Saura, sona handiduna. Félix Viscarret, maisu handiaren filmezko erretratua egin nahi duen zuzendaria. Plan bat du. Bikaina iruditzen zaio. Saurarik intimoena erakutsiko du, aragoiar jenioaren eta haren 7 seme-alaben arteko elkarrizketen bitartez. Guztiek esan dute baietz. Baina Saurari ez zaio asko gustatzen iraganaz hitz egitea. Viscarret tematu egingo da. Saurari margotzea gustatzen zaio. Eta argazkilaritza. Viscarretek ez du amore emango. Saurari margotzea gustatzen zaio. Eta argazkilaritza.

1998, Nalchik, iparraldeko Kaukaso, Errusia. Ilana 24 urteko gazte bat da, eta aitaren garajean lan egiten du, hari aurrera ateratzen laguntzeko. Arratsalde batean, familia osoa eta lagunak elkartuko dira, anaia txikiak, Davidek, ezkon-hitza eman duela ospatzeko. Geroago, gau hartan bertan, bikote gaztea bahituko dute eta erreskate-eskaera bat jasoko dute. Judu enklabe horretan harremanak hain dira estuak, ez zaiela burutik ere pasatuko polizia tartean sartzea. Nola lortuko du familiak David salbatzeko dirua? Ilana eta haren gurasoak behar bezain urruti iritsiko dira, nor bere erara, arriskuei jaramonik egin gabe.

Jesúsek eta Nuriak arazo bat dute: edozein dela ere egoera, lagun eta senideen aurrean lotsagarri geratuko dira ziur, eta modu umiliagarrienean gertatzen da beti. Jesús ezkontza eta bataioetako argazkilaria da, baina bere ustez fotografia artistikoan erakutsi behar du bere benetako talentua. Nuriaren ustea da bere krisi iragankorrez harago bizitza interesgarriagoa hasiko zaiola. Elkarrekin aurkitu beharko dute ea beren patetismoa kutsatuta dituen birus iragankorra den, edo, aldiz, gaixotasun kronikoa duten. Vergüenza hamar kapituloz osatutako telesaila da.

Pablo Escobar narkotrafikatzaile ospetsuaren egiazko historia: milaka pertsona hil zituen, milaka milioi dolar egin zituen eta nekez sinets zitekeen amodio harreman bat hasi zuen berarengandik erabat desberdina zen norbaitekin: Virginia Vallejo izeneko glamour handiko telebista aurkezlearekin.

Eliok, 17 urteko gazte batek, gurasoek Italia iparraldean duten landetxean igaroko du 1983ko uda epel eta eguzkitsua. Egonean emango du denbora, musika entzuten, liburuak irakurtzen eta igerian, egun batean bere aitaren laguntzaile estatubatuar berria etxera iritsi arte. Oliver xarmangarria da, eta Elio bezala sustrai juduak ditu; gainera, gaztea da, bere buruaz ziur dago eta erakargarria da. Hasieran Eliok hotz eta urrun jokatuko du gaztearekiko, baina laster elkarrekin txangoak egiten hasiko dira. Elio Oliverrengana hurbiltzeko saiotan hasiko da eta gero eta intimoagoak bihurtuko dira, nahiz eta, Oliverrek esan bezala, “hitz egin ezineko kontuak” izan. Uda laburrak aurrera egin ahala, bikoteak elkarri dion erakarpena handitzen joango da.

Paris, 90eko hamarkadaren hasieran. Aktibista gaztez osatutako talde batek HIESari buruzko kontzientzia piztuarazi nahi du. Kide berri bat, Nathan, harrituta geratuko da Sean taldekidearen erradikaltasunarekin eta energiarekin; izan ere, gogo guztia ematen dio borrokari. Canneseko Epaimahaiaren Sari Nagusia.

Bikote batek, dibortzio desatsegin baten erdian, indarrak batu beharko ditu euren semea aurkitzeko, beren eztabaidetako batean desagertu baita. Canneseko Epaimahairen saria.

Bi pertsona barnerakoik, kasualitatez, gauero amets berberak dituztela jakingo dute. Gertakari horrek harrituta eta izututa utziko ditu; hala, kasualitate bitxi hori onartzeko erabakia hartu, eta ametsetako esperientziak bizitza errealean berregiten saiatuko dira. Zeregin zaila izango da; izan ere, zenbat eta gehiago saiatu, orduan eta urrunago dirudi hori lortzea. Hala eta guztiz ere, saio baldar horiek barruan dituzten mugak apurtuko dizkiete, eta elkarrekin bat eginik amaituko dute.

The Big Sick filmak Kumail eta Emily-ren benetako istorioa kontatzen du. Bikoteak Kumailen komedia-ikuskizun batean ezagutuko du elkar. Dena gau bateko topaketa batean geratuko zela zirudienean, haien arteko harremana aurrera ateratzen hasiko da, kultura-arteko desberdintasunak izan arren, eta guztien bizitzak zailduko ditu, Kumailen guraso musulman tradizionalek dituzten itxaropenak direla eta. Are gehiago okertuko da guztia, gainera, Emilyk gaixotasun misteriotsu bat duela jakiten denean...

Ben eta Rose bi garai desberdinetako haurrak dira, eta, ezkutuan, beren bizitzak bestelakoak izatea nahi dute.  Benek inoiz ezagutu ez duen aitarekin amets egiten du; Rosek, berriz, emakumezko aktore misteriotsu batekin, eta oroitzapen-liburu batean haren bizitzaren berri ematen du. Benek pista bat aurkituko du etxean, eta Rosek titulu tentagarri bat irakurriko du egunkarian; orduan, simetria zoragarriz garatuko den bilaketa bati ekingo diote biek.