Laurent Cantet, Terence Davies, Lucile Hadzihalilovic, Claudia Llosa eta Claire Simon zinemagile ospetsuak lehiatuko dira Donostia Zinemaldiaren Sail Ofizialean. Gainera, 2021eko irailaren 17tik 25era bitartean izango den aurtengo 69. edizioan, Alina Grigorek, Zhang Jik eta Tea Lindeburgek lehenbiziko filmak aurkeztuko dituzte, eta Inés Barrionuevok laugarren lana erakutsiko du.
Ressources humaines (1999) filmarekin, Laurent Cantetek Zinemaldiko New Directors Saria eskuratu zuen, eta, harrezkero, hainbatetan parte hartu du Perlak sailean: L’Emploi du temps lanarekin (2001), Vers le Sud (2005) filmarekin; Entre les murs (2008), zeinarekin Urrezko Palmorria eskuratu baitzuen Cannesen, eta Retour à Ithaque obrarekin azkenik (2014). Sail Ofizialean Foxfire (2012) filmarekin lehiatu ondoren –Katie Coseni antzezleak Emakumezko Aktore Onenaren Zilarrezko Maskorra lortu zuen–, Arthur Rambo filmarekin bueltatuko da zinemagile frantsesa: Rabah Naït Oufella aktoreak idazle arrakastatsu bat antzezten du bertan, zeina iraganean sare sozialetan argitaratu zituen gorroto-mezuekin borrokatu beharko baita.
Terence Daviesi atzerabegirako bat eskaini zitzaion Zinemaldiaren 2008ko edizioan, eta hirugarren aldiz lehiatuko da Urrezko Maskorra eskuratzeko; aurretik, The Deep Blue Sea (2011) eta Sunset Song (2015) filmekin parte hartu zuen. Aurtengo edizioan, Benediction aurkeztuko du. Biopic horretan, Jack Lowden eta Peter Capaldi aktoreek Siegfried Sassoon antzeztuko dute bizitzaren une desberdinetan: I. Mundu Gerratik bizirik irten zen soldadu eta poeta antibelizista. Zinemagile britainiarraren filmografian pelikula garrantzitsuak ageri dira: Distant Voices, Still Lives (1988), Locarnoko Urrezko Lehoinabarra eskuratu zuena; The Long Day Closes (1992), Cannesen lehiatua; House of Mirth (2000) eta Of Time and the City (2008). A Quiet Passion (2016) lanarekin, Zabaltegi-Tabakaleran hautatu zuten.
Lucile Hadzihalilovicek New Directors Saria eskuratu zuen Innocence (2004) estreinako filmarekin, eta, ondoren, sail horretako bertako epaimahaikide izan zen. Halaber, Donostian aurkeztuak ditu La Bouche de Jean-Pierre film ertaina (Zabaltegi, 1996) eta De natura film laburra (Zabaltegi-Tabakalera, 2018). Evolution (2015) da zuzendariaren bigarren film luzea, eta, harekin, Epaimahaiaren Sari Berezia eskuratu zuen Sail Ofizialean. Sail horretan bertan esku hartuko du aurten Earwig obrarekin. Brian Catling idazlearen eleberriaren egokitzapen honek Alberten istorioa kontatzen du, zeinak izotzezko hortzak dituen Mia izeneko neska zaintzen lan egiten baitu.
Horretaz gainera, Claudia Llosa lehenbizikoz lehiatuko da Sail Ofizialean Distancia de rescate / Fever Dream lanarekin (María Valverde, Dolores Fonzi, Germán Palacios eta Guillermo Pfening ditu antzezle-taldean). Aurretik, Berlingo Zinema Jaialdiko Urrezko Hartza irabazi zuen La teta asustada-rekin (2009), ingelesez besteko Film Onenaren Oscar Sarirako hautagai izan zen Peruko lehenbiziko titulua. Handik urtebetera, Zinemaldiko epaimahaikide izan zen Madeinusa (2006) eta No llores, vuela (2014) filmak ere zuzendu dituen zinemagilea. Oraingo honetan, beldurrei eta amaren maitasunaren indarrari buruzko kontakizun zorabiagarri eta hipnotikoa aurkeztuko du. Gidoia Samanta Schweblin eleberri homonimoaren egilearekin batera idatzi du.
Fikziozko eta ez-fikziozko lanetan dago zaildurik Claire Simon, eta, aurtengo edizioan, Vous ne désirez que moi / I Want to Talk about Duras lana aurkeztuko du. Michèle Manceaux kazetariak Yann Andrearekin izaniko elkarrizketa bat gerturatuko du, zeina Marguerite Duras idazlearen azken urteetako maitale izan baitzen. Erresuma Batuan jaiotako zinemagile frantsesak lehenbizikoz parte hartuko du Sail Ofizialean. Aurretik eginiko lanean artean ageri dira Coûte que coûte (1996), Récréations (1998), Mimi (2003), Les Bureaux de Dieu (2008), Gare du Nord (2013) eta Le Concours (2017).
Bestalde, Ines Barrionuevok bere laugarren film luzearekin parte hartuko du lehiaketan; hala, Camila saldrá esta noche lanean, protagonista, neska gazte bat, Buenos Airesera joango da bizitzera, eskola pribatu tradizional batean sartuko da eta aldaketa horiei guztiei aurre egin beharko die. Berlinaleko Generation sailean estreinaturiko Atlantida (2014) filmarekin debuta egin ostean, zinemagile argentinarrak Julia y el zorro (New Directors, 2018) eta Las Motitos (2020) zuzendu ditu.
Zinemagile hasiberriak ere izango dira Urrezko Maskorra eskuratzeko lehian. Esate baterako, Alina Grigore aktore eta gidoigile errumaniarra. Crai nou / Blue Moon ekarriko du Sail Ofizialera: emakume gazte baten drama kontatzen du, zeinaren familia disfuntzionaleko giro itogarriak kontra egingo baitie haren desioei. Hainbat film labur zuzendu ondoren, Grigore Ilegitim / Illegitimate filmeko protagonistakide izan zen, zeina Adrian Sitaru zuzendariarekin batera idatzi baitzuen. Berlingo Zinema Jaialdiko Forum sailean izan zen obra harekin.
Lehenbiziko obra aurkeztuko duen bigarren zuzendaria Zhang Ji da. Orain artean, argazki-zuzendari gisa aritu da hainbat filmetan, hala nola Ba bai bang / Letters from Death Row (Kevin Feng Ke, New Directors, 2008). Errealizadore gisa eginiko estreinaldian, Ping Yuan Shang De Mo Xi / Fire on the Plain aurkeztuko du, Txinako Fentun hirian giroturiko thriller bat. Polizia gazte batek ikerketa bat ireki du duela zortzi urte gertatutako krimen misteriotsuak argitzeko asmoz. Diao Yinan da film luzearen ekoizle exekutiboa. Aurretik beste hainbat lan ere zuzendu ditu: Bai ri yan huo / Black Coal, Thin Ice (Perlak, 2014) edo Nan Fang Che Zhan De Ju Hui / The Wild Goose Lake (Zabaltegi-Tabakalera, 2019).
Tea Lindeburg egilearen lehenbiziko film luzea, Du som er i himlen / As in Heaven, literatura danimarkarreko klasiko batean dago oinarrituta: 1912an Marie Bregendahl idazleak argitaratutako lan batean, alegia. XIX. mendeko etxalde batean giroturiko kontakizun honetan, familia ugari bateko kideak bederatzigarren haurraren zain daude, eta alaba zaharrena, berriz, ikastera irtetear da. Lindeburgek badu esperientziarik telebistaren munduan: Danimarkan hainbat telesailaren atalak zuzendu ditu eta Netflixen Equinox ekoizpen daniarraren sortzailea ere bada –bere Equinox 1985 podcastean oinarritua–.
Nor da benetan Karim D? Hedabideek maite duten idazle aurkitu berria? Edo haren ezizen Arthur Rambo, norbaitek sare sozialetan aurkitutako eta gorrotoz betetako mezuen egilea?
Siegfried Sassoon gizon konplexua izan zen. Bizirik irten zen I. Mundu Gerran borrokatzearen izuetatik; dominarik ere irabazi zuen bere ausardiagatik. Baina itzuli zenean gogor kritikatu zuen bere gobernuak gerran jarraitzeko harturiko erabakia. Sassoonen poesia mendebaldeko frontean izandako esperientzietan inspiratu zen, eta, azkenean, bere garaiko gerra-poeta nagusietako bat izan zen. Miretsia izan zen Londresko literatura- eta agertoki-giroetan, eta hainbat gizonarekin izan zituen harremanak, bere homosexualitatea onartzen saiatzen zen bitartean. Aldi berean, gerraren izugarrikeriak hautsita, salbazioa bilatzerantz bideratu zuen bere bizi-bidaia: ezkontzaren eta erlijioaren onespenean saiatu zen topatzen. Mundu hautsi batean, bake-bila eta bere burua onartu nahian dabilen gizon nahigabetu baten istorioa. Eta horrek egungo mundura eramaten gaitu, modu nabarmen askoan eraman ere.
Camilak Buenos Airesera joan beharko du bizitzera amona larriki gaixotzen zaionean. Bere lagunak eta eskola publiko liberala atzean utzi eta ikastetxe pribatu tradizional batean sartuko da. Camila basatia baina heldugabea da, eta izaera hori dela-eta, zailtasunak izango ditu.
Emakume gazte batek gizatasuna galtzeko prozesuan izandako bilakaera psikologikoa azaltzen digu filmak. Goi-mailako hezkuntza lortzeko eta bere familia disfuntzionalaren indarkeriatik ihes egiteko borrokan ari da Irina. Artista batekin izandako esperientzia sexual anbiguo bat izango da familiaren indarkeriari aurre egiteko akuilua.
Emakume bat hilzorian dago, etxetik urrun. Haur bat du ondoan. Ez dira ama-semeak. Emakumearen heriotza gero eta gertuago dagoela, arima hautsiei, arrisku ikusezinei eta ama batek semeari dion maitasunari buruzko istorio aztoragarria kontatuko dute. Samanta Schweblinen txalotutako eleberri homonimoan oinarritua.
XIX. mende amaierako egun batean betiko aldatuko da Lise 14 urteko neskaren bizitza. Bere neba-arrebetatik zaharrena da, bere familiako lehena da eskolara joaten eta itxaropenez eta konfiantzaz beteta ikusten du etorkizuna. Baina ama erditzen ari dela, badirudi gaizki doala zerbait. Gaua ilundu eta erditzeak aurrera egin ahala, Lise ulertzen hasiko da balitekeela etxekoandre gisa amaitzea neska koskor gisa hasi zuen eguna.
Europako bazterren batean, XX. mendearen erdialdean. Albertek Mia zaintzen du, izotzezko hortzak dituen neskatoa. Mia ez da inoiz irteten bere apartamentutik eta leihatilak itxita egoten dira beti. Telefonoak maiz jotzen du eta Nagusiak neskaren ongizateaz galdetzen du. Egun batean Albertek neskatoa prestatu eta irteteko jarraibideak jasotzen dituen arte...
Txina, 1997. Hilketa-segida batek Fentun hiria astindu du. Krimenak misteriotsuki eten dira, agintariek arduraduna aurkitu baino lehen. Zortzi urte geroago, biktimetako batengandik gertukoa den polizia gazte batek ikerketa berriro irekitzea erabaki du.
30 urte zaharragoa den idazle ospetsu batekin harreman sutsua duen gizon batek hitz egin beharra sentitzen du. Liluratuta dago emakume harekin, baina sentitzen du ezin duela jarraitu aurrera. Maitasunaren intentsitatea hitzez adierazteko eginahal batean, bihotza ireki eta erabateko argitasunez deskribatuko du maitasun hori.