Donostia Zinemaldiaren 69. edizioko Perlak sailean bi film berri sartu dira: batetik, The French Dispatch, Wes Andersonen azken filma, Cannesen aurkeztua; eta bestetik, The Power of the Dog, Jane Campion zinemagilearen lan berria, laster Veneziako zinema-jaialdian estreinatuko dena. Bi filmak Donostia Hiria Publikoaren Saria irabazteko lehiatuko dira.
The French Dispach filmak, egunkari estatubatuar baten erredakzioan girotutako istorio bat kontatzen digunak, aktore-zerrenda zabal-zabala du: Timothée Chalamet, Adrien Brody, Bill Murray, Tilda Swinton, Frances McDormand, Benicio del Toro eta abar. Andersonek lehendabizikoz hartuko du parte Perlak sailean, nahiz eta bere bi film ‒Rushmore (2012) eta Fantastic Mr. Fox (2009)‒ Very Funny Things. Amerikar komedia berria eta Animatopia. Animaziozko Zinemaren Bide Berriak atzerabegirakoetan sartu ziren, hurrenez hurren.
Perlak sailean, halaber, Veneziako zinema-jaialdian Urrezko Lehoia lortzeko lehian arituko den The Power of the Dog filma izango da ikusgai. Jane Campionen film berria Thomas Savageren eleberri izenkidean inspiratuta dago, eta Benedict Cumberbatch eta Jesse Plemons aktoreek antzeztutako bi anaiaren arteko liskar bat kontatzen digu; Kirsten Dunst eta Kodi Smit-McPhee antzezleek osatzen dute aktore-zerrenda. Zeelanda Berriko zinemagileak golardo ugari irabazi ditu, besteak beste, Epaimahaiaren Sari Berezia Mostran An Angel at my Table (1990) filmarekin, eta Urrezko Palmorria Cannesen The Piano (1993) obrarekin, zeinak hiru Oscar sari ere eskuratu zituen, jatorrizko gidoi onenarena barne.
|
Perlak Espainian argitaratu ez diren eta kritikak txalotu eta/edo nazioarteko beste jaialdi batzuetan saritu dituen urteko film luzeen sorta da. Lehian arituko diren filmek Donostia Hiria Publikoaren Saria irabazteko aukera izango dute, zeinak bi golardo barne hartzen baititu filma Espainian banatzeko ardura duten banatzaileentzat: batetik, film onenarena (50.000 euro) eta, bestetik, Europako film onenarena (20.000 euro).
69. edizio honetan, Victoria Eugenia Antzokiko ikus-entzuleek egile ugariren proposamen berriez gozatzeko aukera izango dute: Sean Baker, Emmanuel Carrère, Julia Ducournau, Gastón Duprat eta Mariano Cohn, Charlotte Gainsbourg, Louis Garrel, Xavier Giannoli, Ryusuke Hamaguchi (bi filmekin), Todd Haynes, Joachim Lafosse, François Ozon, Céline Sciamma, Paul Verhoeven eta Wen Shipei.
Filma kazetarientzako maitasun-gutun bat da. Egunkari estatubatuar baten erredakzioan dago girotuta, XX. mendean, Frantzian, fikziozko hiri batean, eta The French Dispatch aldizkarian argitaratutako istorio-bilduma bat irudikatzen du. Aktore-zerrenda zabala da: Benicio Del Toro, Frances McDormand, Jeffrey Wright, Adrien Brody, Timothée Chalamet, Léa Seydoux, Tilda Swinton, Mathieu Amalric, Lyna Khoudri, Stephen Park, Owen Wilson, Bill Murray, etab.
Phil Burbank karismaduna etxalde baten jabe da eta beldurra pizten du inguruan dituenengan, baita lilura ere. Anaiak bere emaztea eta horren semea ekartzen dizkionean, Philek sumindu egingo ditu baina, azkenik, maitasuna izateko aukera sortuko zaio.