Hirugarren urtez jarraian, Donostia Zinemaldiak aurrera egiten jarraitzen du bere jasangarritasun-proiektuaren garapenean, eta, proiektu haren neurriei esker, karbono-neutraltasuna erdietsi nahi du Zinemaldiak hemendik bost urtera, gutxi gorabehera. Hori lortzeko, Zinemaldiak karbono-aztarna neurtzeko prozesua sendotzen jarraituko du CREAST aholkularitza-enpresarekin, eta 71. edizio honetan, Repsol jasangarritasun-babesle bihurtuko da, ekitaldia deskarbonizatzeko soluzioekin lagunduz, eta Renfek bat egingo du, halaber, lankide gisa. Bi bidaide horiei esker, Zinemaldiak jauzi kualitatiboa eman ahalko du bere xedea lortzeko baliatuko dituen neurrietan.
Tabakalerako Z aretoan jasangarritasun-planaren neurriak aurkeztu dira gaur goizean, Zinemaldiaren 71. edizio honetan. Prentsaurrekoan José Luis Rebordinos zuzendariak eta Amaia Serrulla Zinemaldiko jasangarritasun-proiektuaren koordinatzaileak parte hartu dute, Siridia Berenguer Repsoleko Garapen eta Negozio Berrien zuzendariarekin eta Verónica Portell Torres Renfeko Komunikazio, Marka eta Publizitatearen ordezkariarekin batera.
Iaz egindako neurketaren arabera, Zinemaldiaren karbono-aztarna 4.147 tona CO2 baliokide da. Zenbatespenak direnez, aztarna-murrizketaren ehunekoa zehatz-mehatz jakiterik ez dago, baina CREASTen kalkuluen arabera, erabilera bakarreko materialen murrizketa, Kursaal eraikin enblematikoaren itzaltze goiztiarra, LED teknologiako argiztapenaren erabilera, paperezko inprimaketaren ezabatze ia erabatekoa eta halako neurriek aztarna nabarmen murriztea lortu dute.
Repsol jasangarritasun-babesle gisa atxikitzeak jauzi kualitatiboa ematea ahalbidetuko dio Zinemaldiari aurtengo emisioen murrizketan. Konpainia multienergetikoak hainbat irtenbide emango ditu garraioa jasangarria izan dadin, eta Zinemaldia elektrizitate berriztagarriarekin elikatuko du. Garraiorako, erregai berriztagarriak aukeratu dira %100ean, ingurumenean 0 inpaktu garbia dutenak; izan ere, Repsolek zenbait hondakinetatik egiten ditu erregai horiek, adibidez, sukaldeko olio erabilitik. Gainera, Repsolek Zinemaldiko ibilgailu elektriko eta hibrido entxufagarrien flotaren esku jarriko du Donostiako birkarga publikorako sare osoa, zazpi puntu instalatuko eta operatibo ipiniko baititu, eta beste bi puntu eramangarri jarriko baititu Argentinar Errepublikaren pasealekuan.
Gainera, Repsolek erregai %100 berriztagarriekin funtzionatzen duten bi talde elektrogeno ere emango dizkio Zinemaldiari, amaierako festaren behar energetikoak asetzeko. Azkenik, Repsolek eguzki-energia eramangarria sortzeko soluzio bat instalatuko du, Okendo plazan jarri ohi diren publizitate-kuboei eta bisitari guztiei mugikorra kargatzeko elektrizitate berriztagarria eskaintzeko.
Bestalde, Renfek mugikortasun jasangarriagoa sustatzen lagunduko dio Donostia Zinemaldiari.
Zinemaldiaren barnean, Zinemaldiak lanean jarraituko du azken urteotan martxan jarritako neurriak sendotzeko. Hala, edizio honetan jasangarritasun-aldagaiak sartu dira kontratazio-kondizioetan, bereziki catering motaren bat barne hartzen duten jarduerekin lotutakoetan.
Zinemaldiak aurreko edizioan lehendabizikoz egin zuen bezala konpentsatuko ditu emisioak, orduan 25.000 euro bideratu baitzituen Naturklima Fundazioak eta Gipuzkoako Foru Aldundiko Ingurumen Departamentuak abian jarritako Gipuzkoako Borondatezko Karbono Funtsetik. Ekarpen hori tokiko azpiegitura berdeak hobetzeko proiektuetan inbertitu zen, Gipuzkoako karbono-hustubide naturalen (batik bat basoak eta itsasoak) funtzionaltasuna birsortzen laguntzeko.
Iaz, Zinemaldiko karbono-aztarna neurtzeko prozesua ekainean hasi eta abenduan amaitu zen. Hornitzaileen mapa, lehiaketaren egoitzak eta ostatuak, ibilgailu-flota, sponsorrak, cateringa, materialak eta hondakinak aztertu ondoren, CREASTen zehaztapenen arabera, Zinemaldiaren aztarna 4.147 tona CO2 baliokide dela. Emisio-iturri nagusiak mugikortasuna (%40), ostatua (%37) eta materialen erabilera (%19) dira, eta horien ondoren, cateringa (%2), kontsumo elektrikoa (%1) eta hondakinak (%0,2)
Mugikortasunaren ondoriozko karbono-aztarna murrizteko funtsezko puntuen artean, CREASTek proposamen hauek egiten ditu: lehenik, energia jasangarriagoak erabiltzea, hala nola erregai berriztagarriak; bigarrenik, ibilgailu elektrikoen edo hibridoen flota pixkanaka handitzea. Gainera, tokiko mugikortasunerako bizikletak erabiltzea ere gomendatzen da, baita Zinemaldira ibilgailu partekatuetan joatea ere. Gonbidatuek eta erakundeko kideek urtean zehar egindako bidaiei dagokienez, garraiorako energia jasangarriagoei lehentasuna ematea ere proposatzen da, hala nola hegazkinetan erregai berriztagarriak eta SAF (sustainable aviation fuel, ingelesezko siglengatik) erabiltzeari edota trena edo auto partekatua ahal den guztietan baliatzeari.
Materialen atalean, funtsezkotzat jotzen da paperaren kontsumoa murrizten jarraitzea; iaz, adibidez, Zinemaldiaren katalogoa inprimatzeari utzi eta bertsio digitalean baino ez zen argitaratu; horrek esan nahi du 3.584.99 kg CO2 baliokide murriztu zirela, kontuan hartuta katalogoaren pisu unitarioa 1,2 kilogramokoa zela eta 3.500 unitate inprimatuko zirela. Gainera, Film guztien gidaren 6.000 ale baino ez ziren argitaratu, eta hori lagungarria izan zen 653 kg CO2 baliokide murrizteko; aurten, lehendabizikoz, %100 birziklatutako paperean inprimatuta egongo da gidaliburua. Halaber, erosketetan, bilgarrietan eta ontzietan plastikoen erabilera murriztu behar da, eta, horrez gain, berrerabilpenaren edo bigarren eskuko erosketaren aldeko apustua egiten jarraitu behar da, material berriak erosi beharrean.
Cateringari dagokionez, gomendagarria da erositako produktu guzti-guztiak 0 kilometrokoak izango direla bermatzeko politika batean murgiltzea, baita baxera eta mahai-tresneria berrerabilgarriak edo biodegradagarriak erabiltzea eta Zinemaldiaren esparruan eskainitako janariak prestatzeko prozesuan efizientzia energetikoa bermatzea ere.
Iaz, Kursaal eraikineko kanpo-argiztapena 2:15ean itzaltzen hasi zen, eta ez 4:30ean. Horrela, energia-kontsumoa %46,7 inguru murriztea lortu da. Gainera, Zinemaldiak LED teknologiara igarotzen jarraituko du bere egoitzak eta bulegoak argiztatzeko; izan ere, horri esker, kontsumoa %75 murriztuko da argiztapen tradizionalarekin (bonbilla goriak eta DFL) alderatuta; halaber, energia-kontsumoa murrizteko lanean jarraituko du Zinemaldiak, baita energiaren %100 iturri berriztagarrietatik etortzea lortzeko ere.
Hondakinak kudeatzeko lantalde bat ere sortu zen, hondakinak gaika biltzeko birziklatze-estazio berriak jarriz, eta neurri horren ildotik lan egiten jarraituko da.
Azkenik, ur-kontsumoa karbono-aztarnaren adierazlean islatzen ez bada ere, haren balio-kateak ia ez duelako emisiorik sortzen, Zinemaldiak uraren erabilera efizientea sustatzen jarraituko du.