Donostia Zinemaldiaren egoitza nagusia honakoa da:

DONOSTIA ZINEMALDIA
TABAKALERA - Nazioarteko Kultura Garaikidearen Zentroa
Emakume Zigarrogileen Plaza, 1, 2. solairua
20012 Donostia
Tel.: +34 943 481212
ssiff@sansebastianfestival.com

Webgune Ofizialak, www.sansebastianfestival.com, informazio xehatua eskaintzen du, eta Zinemaldiarekin eta bertako sailekin harremanetan jartzeko datuak ere biltzen ditu.

DONOSTIAKO NAZIOARTEKO ZINEMALDIA, SA elkartea Donostiako Udalak, Eusko Jaurlaritzak, Gipuzkoako Foru Aldundiak eta Espainiako Gobernuaren Kultura, Hezkuntza eta Kirol Ministerioak osatzen dute zati berdinetan, eta Donostiako alkate du presidente. Donostia Zinemaldiko antolakuntzaren burua jaialdiaren zuzendari José Luis Rebordinos da.

Donostia Zinemaldia Film Ekoizleen Elkarteen Nazioarteko Federazioak (FIAPF, www.fiapf.org) onartuta dago, «espezializatu gabeko lehiazko zinema-jaialdien» kategorian.

1. ARTIKULUA

Donostia Zinemaldiak ekarpen positiboa egin nahi dio kulturari eta zinema-industriari.

2. ARTIKULUA

Donostia Zinemaldiaren 71. edizioa Donostian egingo da, 2023ko irailaren 22tik 30era bitartean.

3. ARTIKULUA

Donostia Zinemaldiaren 71. edizioan aurkeztuko dituzten film guztiak hautaketa batzordeak aukeratuko ditu. Batzorde horretako buru zuzendaritza izango da, eta zinemaren munduan eta zinema-jaialdietan adituak diren profesionalez osatutako nazioarteko ordezkarien sare baten laguntza izango du.

4. ARTIKULUA

71. edizioan hautatutako film guztiei partaidetza ziurtagiria emango die Donostia Zinemaldiaren zuzendaritzak.

5. ARTIKULUA

Culinary Zinema Berlineko nazioarteko zinema-jaialdiarekin elkarlanean sortu zen eta Basque Culinary Centerrekin batera antolatutako lehiarik gabeko saila da. Sail honen helburua zinema, gastronomia eta elikadurarekin lotura duten hezkuntza, zientzia eta nekazaritza arloetako jarduerak biltzea da.

6. ARTIKULUA

Lehendabiziko hautaketan parte hartzeko izena emateko epea 2023ko ekainaren 19an amaituko da, Zinemaldiaren zuzendaritzak, hala ere, filmeak epez kanpo onartzeko eskubidea izango du.

7. ARTIKULUA

Culinary Zinema sailean parte hartu ahalko dute baldintza hauek betetzen dituzten film luzeek:

1. Zinemaldia hasi aurreko hamabi hilabeteetan amaitutakoa izatea.
2. Espainiako beste zinema-jaialdi batean ez parte hartu izana, Donostia Zinemaldiko aurkezpenaren aurretik.
3. Donostia Zinemaldiko aurkezpenaren aurretik Espainian komertzialki estreinatu gabekoa eta publikoki eman gabekoa izatea.
4. Ez da onartzen Culinary Zinema sailean parte hartuko duten filmak Espainian VOD plataformetan sartzea, erabilera profesionalerako bakarrik eta sarbide mugatukoak direnak salbuetsita.
5. Culinary Zinema saileko filmak honako euskarrian bakarrik entregatu ahalko dira: DCP. Zinemaldiko sail teknikoak zerbitzariaren ziurtagiria bidaliko die filmen ekoizleei edo ordezkariei, bai eta KDMak jasotzeko koordenatuak ere.

8. ARTIKULUA

Zinemaldiak aukeratutako film guztiak jatorrizko bertsioan aurkeztuko dira.

Filmen azpitituluak gaztelaniazkoak edo ingelesezkoak izan ahalko dira.

Filmaren ekoizleek edo ordezkariek arduratu beharko dute kopiari azpitituluak jartzeaz.

Zinemaldiak bere kargura egingo du gaztelaniazkoaren edo ingelesezkoaren osagarri izango den azpititulazio elektronikoa, gaztelaniaz edo ingelesez azpititulatuta dauden eta jatorrizko bertsioa ingelesez edo gazteleraz ez den filmeentzat. Horretarako, filmaren behin betiko jatorrizko bertsioko DVD bat beharko da, ingelesezko edo gaztelerazko azpitituluekin, bai eta azpititulu horien zerrenda.

Azpititulu elektroniko horien proiekzioa Zinemaldiaren zerbitzura lan egiten duen enpresak egingo du.

9. ARTIKULUA

Sailean parte hartzeak hau esan nahi du:

1. Filmen sareko izen-emate formularioa behar bezala beteta izatea. Formularioa honako web orri honetan dago: www.sansebastianfestival.com
2. Espainian produzitu edo koproduzitu diren filmen ekoizleek edo ordezkariek zuzenean jarri beharko dute harremanetan filmen sailarekin films@sansebastianfestival.com helbidean, sareko formularioaren bitartez izena eman aurretik.
3. Izen emandako film bakoitzaren tasa ordaindu izana.
   1. film laburra edo ertaina (gehienez 59'): 70 € (% 21eko BEZa barne)
   2. film luzea (gutxienez 60'): 100€ (%21eko BEZa barne)
   3. DCP euskarri fisikoan (2,5eko disko gogorra, CRU edo antzekoak): 150€ (%21eko BEZa barne), iraupena edozein dela ere.
   4. DCP bidalketa digitalarekin (Signiant Media Shuttle edo antzekoak): 200€ (%21eko BEZa barne), iraupena edozein dela ere. Aukera hori aukeratuz gero, Zinemaldiak Signiant Media Shuttle-ren kontua eskuratuko du aparteko kosturik gabe filmaren igoerarako.

Tasa hori eurotan ordaindu beharko da izena emateko unean, kreditu txartel bidez (Visa, American Express, Mastercard) edota paypal bidez.

10. ARTIKULUA

Zinemaldiaren zuzendariak filma ofizialki gonbidatu ondoren, hautatutako filmaren ekoizleek edo ordezkariek izen-emateko formularioa berretsi beharko dute eta, behar bezala beteta, gehienez, 2023ko abuztuaren 1a baino lehen bidali.

Zinemaldiak baieztapen horren sinatzailea hartuko du solaskide bakartzat, filmak Zinemaldian parte-hartzearekin lotutako alderdi guztiak negoziatzeko, baita arduradun bakartzat ere, filmaren ekoizpenean parte hartu duten beste enpresen edo pertsonen gainetik.

Filmaren ekoizleek edo ordezkariek eginiko baieztapenak berekin dakar Zinemaldiko zuzendaritzak exijituriko arau guztiak onartzea, eta horren arabera, ezingo dute, inola ere, gonbidaturiko filma Zinemaldiaren programaziotik kendu.

11. ARTIKULUA

Zinemaldiak hautatutako filmei egindako gonbidapena konfidentziala izango da, eta ekoizleek edo ordezkariek isilpean gorde beharko dute, Donostia Zinemaldiak ofizialki iragartzen duen arte.

Donostia Zinemaldiaren programazio orokorraz eta emanaldien ordutegiez Zuzendaritza Batzordea soilik arduratuko da.

12. ARTIKULUA

Prentsa buletinak, Zinemaldiko katalogoa eta webgune ofiziala dokumentatzeko beharrezko materiala (sinopsia, fitxa tekniko-artistikoa, zuzendariaren biofilmografia eta argazkia, filmaren argazkia eta trailerra) izena emateko sareko formulariotik hartuko da. Horretarako, formularioa behar bezala beteta egon beharko da, 2023ko abuztuaren 1a baino lehen.

Filmaren ekoizleek edo ordezkariek Zinemaldiko sailek eskatzen dieten hautatutako filmen sustapen-materiala bidali beharko dute unean-unean.

13. ARTIKULUA

Gonbidatutako filmen ekoizleek edo ordezkariek Zinemaldian emango dituzten filmen aleak jaialdia hasi baino 15 egun lehenago bidali beharko dizkiote filmen sailari, Zinemaldiaren egoitza nagusira:

DONOSTIA ZINEMALDIA
Filmen Saila
TABAKALERA - Nazioarteko Kultura Garaikidearen Zentroa
Emakume Zigarrogileen plaza, 1, 2. solairua
20012 Donostia
Tel.: +34 943 481212
films@sansebastianfestival.com

Filmen ekoizleek edo ordezkariek erabakiko dute gehienez zenbat ale bidali Zinemaldiari.

Zinemaldiko zuzendaritzak eskubidea izango du filmen kopiak ukatzeko, baldin eta sail teknikoak, egiaztatu ondoren, proiektatzeko desegokitzat jotzen baditu. Zinemaldiko zuzendaritzak txosten teknikoa bidaliko die filmen titularrei edo ordezkariei kopian arazoak aurkitzen baditu.

14. ARTIKULUA

Hautatutako filmen kopien garraio-gastuak eta asegurua partaidearen kargura izango dira, harik eta Zinemaldiaren egoitza nagusira iristen diren arte edo haren aduanako agenteari heltzen zaizkion arte.

Donostia Zinemaldia arduratuko da kopien aseguruaz egoitza nagusira iristen direnean edo haren aduanako agenteari heltzen zaizkionean, harik eta itzultzen dituen arte.

Filmaren ekoizleak edo ordezkariak ordainduko ditu KDMak egiteko kostuak.

Zinemaldiak hautaturiko filmen itzulketa parte-hartzaileak ordainduko du, eta ez da klausuraren aurretik egingo.

Zinemaldian zehar filma hondatuko balitz, horren erantzukizunak ez du gaindituko ale berri bat prestatzearen kostua, ale estandarrak inprimatzeko laborategien indarreko tarifen arabera.

15. ARTIKULUA

Zinemaldiaren Industria saila arduratuko da akreditazioa duten zinemako industriaren profesionalez. Adierazitako saila koordinatzeaz arduratzen den profesional taldeak akreditaziodun horien eskura jarriko ditu haien lana errazteko bitarteko guztiak, filmak bideotekan ikusteko aukera barne, betiere ekoizleek horretarako baimena eman ondoren.

16. ARTIKULUA

Ezusteko arazorik gertatzen bada (antolakuntzan edo funtzionamenduan) edo arau hauek behar bezala betetzen ez badira, Zinemaldiko zuzendaritzak subiranotasuna izango du, baita azken erabakia hartzeko ahalmena ere, FIAPFen arauen arabera, nazioarteko zinema ekitaldiei dagokienez.

Arauon interpretazioari buruzko desadostasunik egongo balitz, gaztelaniazko testua aplikatuko da.

Araudi honen interpretazioak sorraraz dezakeen edozer zalantza Donostia Zinemaldiaren zuzendaritzak ebatziko du.

---

FAQ - Filmen izen-ematea

---

---

---

---

---

---

---

---

---

---

---

---

---

---

---

---

---

---

---

---

---

---