Hamalau film laburrek –57 herrialdetako 220 ikastetxetatik aurkeztutako 473 proposamenetatik hautatuek– osatuko dute guztira Nest saila. Datu horiek errekor berri bat dira Donostia Zinemaldiko zinema-ikasleen nazioarteko topaketaren historian, eta hogeita laugarren edizioan Alemania, Belgika, Eslovakia, Espainia, AEB, Frantzia, India, Malaysia, Mexiko, Suedia eta Suitzako eskoletako lanak hautatu dira.

Nestek mundu osoko zinema-eskoletako ikasleen film laburrak zabaltzen ditu, eta begirada berriak eta kontatzeko beste modu batzuk bateratzeko topagune gisa eratzen da. Gazte askorentzat euren ibilbidearen abiapuntua da, bai eta ikus-entzuleekin eta zinema-industriarekin duten lehen harremana ere. 2002an sortu zenetik topaketan 1.000 zinemagilek baino gehiagok hartu dute parte, hala nola Leonardo van Dijl, Oren Gerner, Raven Jackson, Isabel Lamberti, Léa Mysius, Jerónimo Quevedo, Kiro Russo eta Laura Wandelek, geroago euren hurrengo lanak estreinatu dituztenak nola Donostian hala nazioarteko zirkuituko beste jaialdi entzutetsu batzuetan.

Diego Céspedesen kasua halakoa da, bere La misteriosa mirada del flamenco / The Mysterious Gaze of the Flamingo Horizontes Latinos sailean ikusiko baita Cannesko Un Certain Regard saria irabazi ondoren, baita Jaume Claret Muxartena ere, egunotan Estrany riu estreinatuko baitu Veneziako Orizzonti sailean eta, ondoren, Zabaltegi-Tabakaleraren parte izango baita. Atal horretan bertan programatu dira aurten Nesten beste parte-hartzaile batzuen lanak: Paula Tomás Marques eta Hanxiong Bo, hain justu ere. Aurretik Berlinen eta Shanghain estreinatu zituzten Duas vezes João Liberada film luzea eta No One Knows I Disappeared film laburra, hurrenez hurren. Gainera, Roxana Stroe, Nesten bi ediziotan parte hartu zuena, Europa-Latinoamerika Koprodukzio Foroan hautatu dute aurten, Houses Are Silent bere lehen film luzearen proiektuarekin.

Nest, horrenbestez, etorkizuneko zinemarako leihoa da, bai eta ondoren EQZEko ikasleen parte izatera igaroko diren zinemagileei laguntza integrala emateko sistema baten abiapuntua ere, Ikusmira Berriak programan parte hartzen baitute euren hurrengo zinema-proiektuekin, eta beren pelikulekin itzultzen baitira Donostia Zinemaldiko ikus-entzuleei erakusteko.
 

Begiratzeko leiho bat

Nest saileko hamalau film laburren hautaketak leiho bat irekitzen du errealitate eta kezka askotarikoak ikusteko, nola mundu hurbiletakoak hala urrunetakoak. Nork bere nortasuna bilatzea –batzuetan trauma gorabehera–, familia-harremanak, amatasuna, kontziliazioa, zaintzak eta osasun mentala dira lan horietan jorratutako gaietako batzuk. Errealitate horiek askotariko proposamenetatik jorratzen dira –animazioa, generoko zinema, ez-fikzioa, drama eta entsegua– eta mundu osoko zinema-eskoletan lengoaia zinematografikoa nola lantzen den erakusteko botoi gisa balio duen hautaketa honetan presente daude.

Topaketa Zinemaldiaren 73. edizioan egingo da, irailaren 22tik (astelehena) 26ra (ostirala) bitartean. Bost egunetan, hautatutako hamalau pertsonek euren lanak aurkeztuko dituzte, zinemagileen elkarrizketetara joango dira eta industriako profesionalekin topaketak egingo dituzte. Hautatutako lan guztien artean, hautatutako eskoletako ikaslez osatutako epaimahai batek, zinemako profesional bat epaimahaiburu dela, NEST THE MEDIAPRO STUDIO saria emango du, film labur irabazlearen zuzendariari 10.000 euro ematean datzana.

Zinemagile gazteen prestakuntza eta industriarako sarbide profesionala dira Nestek eta THE MEDIAPRO STUDIOren Gidoigintza Masterrak partekatzen eta sustatzen dituzten jomugak. Donostia Zinemaldiak lankidetza-hitzarmen bat du formalizatuta 2023az geroztik, sormen-talentu berria identifikatzeko eta babesteko, bai eta ikus-entzunezko industriarako sarbide profesional bat eskaintzeko ere.

Akordio horri esker, THE MEDIAPRO STUDIOk sorkuntzarako laguntza eskaintzen dio ikasle finalista horietako bati bere lehen lanaren garapenean, prozesuan zehar aholkularitza eskainiz. Era berean, akordioak Gidoi Masterraren azken edizioko hamar ikasleren parte-hartzea bermatzen du. Ikasle horiek Nestek Zinemaldian antolatzen dituen jarduera guztietara joango dira euren prestakuntzaren parte gisa, ikus-entzunezko industriarako sarbide profesionala errazte aldera.

Edizio honetako nobedade gisa, lehiaketak bi golardo gehigarri izango ditu: Movistar Plus+ Saria film labur onenari, obra plataforma horren medioz Espainian transmititzeko eskubideak erostean datzana, eta Tabakalera Saria, 2026an hiru asteko egonaldi bat emango diona zuzendari hautatuari bere hurrengo proiektua garatzeko.

Halaber, SFC | Rendez-vous Industryk –Cannesko zinema-jaialdiak antolatutako film laburrei buruzko foro profesionalak– aukera emango die Nesten hautatutako zinemagileei beren filmak doan inskribatzeko komisionatutako merkatu-katalogoan, bai eta 2026ko maiatzaren 17tik 20ra Cannesko Short Film Cornerren egingo diren industria-ekitaldietan parte hartzeko ere.

Ikasleen topaketan, ohi bezala, Medialab Tabakaleraren estudioan emango dira, etenik gabe, sailaren historian saritutako film labur guztiak. Horietarako sarrera doakoa da.

Zinema- eta zinema-eskolak, zikloa EQZErekin lankidetzan

Zinemaldia + Plus, Donostia Zinemaldiak Tabakalerako pantaila partekatuan parte hartzeko erabiltzen duen programa, zinemari eta zinema-eskolei eskainia egongo da 2026an. Elías Querejeta Zine Eskolarekin (EQZE) lankidetzan antolatuta dago zikloa, eta zinema-eskola oinarri duten filmen hautaketa bat egingo da, baldin eta berebiziko garrantzia duen garai hartan jazotzen badira edo zinemako ikasleak protagonista badituzte.

Zinemaren ‘beste’ hipotesia

Zinema- eta zinema-eskolak, zikloa EQZErekin lankidetzan