Donostia Zinemaldiaren 74. edizioko programazio ofizialeko zazpi film dira Agenda 2030 Euskadi Basque Country saria irabazteko hautagaiak; bosgarren urtez jarraian, kultura demokratikoaren, jasangarritasunaren, aniztasunaren eta elkartasunaren balioak hobekien islatzen dituen filma aintzatetsiko da, 2030 Agendak Nazio Batuetan eta Euskadin bultzatzen dituen Garapen JasangarritakoHelburuen (GJH) enblema nagusi gisa.

Film hautagaietako bat Sail Ofizialean agertzen da, lehiaz kanpoko emanaldi berezi gisa: Ruega por nosotras / Pray for Us, Daniel Monzónena. New Directorsi dagokionez, Billy Lumbyren FLORID filma izango da hautagai, eta Horizontes Latinosi gagozkiola, berriz, bi lan hautatu dira: Diego Lunaren Ceniza en la boca / Ashes eta Esteban Hoyos García eta Juan Miguel Gelacio zinemagileen Cinco años, cuatro meses / Five Years, Four Months. Gainera, Perlak sailean beste hiru ekoizpen ere ariko dira lehian saria beretzeko: Javier Calvo eta Javier Ambrossiren La bola negra, Pawel Pawlikowskiren Fatherland eta Cristian Mungiuren Fjord.

Espainiatik, Erresuma Batutik, Mexikotik, Kolonbiatik, Poloniatik eta Errumaniatik datozen film horiek gai hauek arakatzen dituzte, besteak beste: errepresioa eta askatasuna, osasun mentala, migrazioa eta deserrotzea, iraganeko gatazken oroimena, sexu-identitatea eta -aniztasuna, lotura familiarrak eta agintaritzaren mugak.

Agenda 2030 Euskadi Basque Country sariaren epaimahaia honako hauez osatuta egongo da: María Vázquez aktorea (epaimahaiburua), Jone Laspiur artista eta aktorea, eta Asier Aranbarri Eusko Jaurlaritzako Berrikuntza Sozialaren eta 2030 Agendaren zuzendaria, ikuspegi hau ematen duena: kultura eta arte-sorkuntza zein lagungarriak diren giza eskubideak sustatzeko, kultura demokratikoa indartzeko eta Garapen Jasangarrirako Helburuetan aurrera egiteko.

Saria —20.000 eurokoa film irabazlearen ekoizle nagusiarentzat— emateko ekitaldia hilaren 24an (osteguna) izango da, 17:00etan, Tabakalerako Prisman. Emanaldiaren ondoren, koktel bat egingo da, komunikabideetarako, industria zinematografikorako eta ikus-entzuleentzako topagune gisa. Zortzi pelikuletako emanaldietarako sarrerak erosi dituzten pertsonek saria emateko ekitaldian parte hartu ahalko dute. Era berean, bertaratu nahi duten baina sarrerarik ez duten pertsonak 2030agenda@euskadi.eus helbide elektronikoaren bidez jar daitezke harremanetan (hala kudeatuko da bertaratzea).

Zikloa eta elkarrizketa

Bestalde, Agenda 2030 Euskadi Basque Country sariaren bosgarren edizioa ospatzeko, ziklo berezi bat programatu da aurreko lau urteotan saria irabazi zuten lau filmekin: Tori et Lokita / Tori and Lokita (Jean-Pierre Dardenne eta Luc Dardenne, 2022), Bâtiment 5 / Les Indésirables (Ladj Ly, 2023), Soy Nevenka / I Am Nevenka (Iciar Bollaín, 2024) eta The Voice of Hind Rajab (Kaouther Ben Hania, 2025).

Gainera, Hizketaldiak programaren barnean, Diego Lunak zinemaren botere eraldatzaileari buruzko hitzaldia eskainiko digu. Aktore, zuzendari eta ekoizle gisa nola Mexikon hala Mexikotik kanpo izandako esperientziatik eta Ambulanterekin —dokumentala eraldaketa sozial eta kulturalerako tresna gisa bultzatzeko Lunak Gael García Bernalekin eta Elena Fortesekin 2005ean sortutako erakundearen— duen loturatik abiatuta, film bat pantailatik ateratzen denean gertatzen denari buruz hausnartuko du: eragiten dituen elkarrizketak, biltzen dituen komunitateak eta ingurunea behatzeko eta eraldatzeko modu berriak irekitzeko duen gaitasuna. Topaketaren moderatzailea Noemi Cuetos izango da, ICEX España Exportación e Inversiones erakundeko Zinema Sektoreko burua.

Azkenik, Zinemaldiaren hainbat egoitzatan stand mugikor eta elkarreragile bat ipiniko da, sariaren helburuen berri emateko eta ikus-entzuleen artean ezagutarazteko. Jolas eta eduki didaktikoen bidez, hainbat belaunalditako pertsonek GJHen garrantziaren berri izango dute eta etorkizunerako baliagarriak liratekeen edukiak garatu ahalko dituzte.

Agenda 2030 Euskadi Basque Country saria Donostia Zinemaldiaren eta Eusko Jaurlaritzako Komunikazio eta Berrikuntza Sozialaren Idazkaritza Nagusiaren arteko akordioaren esparruko saria da, eta bosgarren urtez jarraian lehiaketaren babesle ofizial gisa finkatzen du 2030 Agenda. Aintzatespen horrek, kalitate zinematografikoa ez ezik, zinemak Garapen Jasangarrirako Helburuekin duen konpromisoa ere balioesten du, bereziki 16.arekin, bakea, justizia eta erakunde sendoak sustatzean zentratutakoarekin, hain justu.