Datorren irailaren 29an Gehitu elkarteak 2017ko Sebastiane saria emango dio Donostia Zinemaldian proiektatutako filmen artean LGTBI kolektiboko errealitate, askatasun eta aurrerabide sozialak hoberen islatzen dituen ekoizpen zinematografikoari. Sariak hemezortzigarren edizioa betetzen du aurten, eta zazpi film dira hura lortzeko hautagai. Donostia Zinemaldiaren 65. edizioko Sail Ofiziala, Zuzendari Berriak, Horizontes Latinos, Perlak, Culinary Zinema eta Made in Spain sailetako filmen artean aukeratu dira. Era berean, Horizontes Latinos sailari hasiera emateko, 2017ko Sebastiane Latino sariaren irabazlea proiektatuko da; hau da, LGTBI tematika duen urteko Latinoamerikako film onenaren sariduna. Aurten, Una mujer fantástica (Txile, Alemania, Espainia eta Estatu Batuak) izan da, Sebastián Lelio zuzendariarena.

Gehitu elkarteak eta Sebastiane sarian dituen epaimahaikideek nabarmendu egin nahi dute zein garrantzitsua izan den Latinoamerikako, Espainiako eta Portugaleko ordezkarien parte-hartzea Iberoamerikako LGBT Zinema Jaialdien 2. Topaketan. Topaketa irailaren 25ean eta 27an egingo da, Donostia Zinemaldiarekin eta Acción Cultural Españolarekin lankidetzan, bi kontinenteen artean zubiak eratzeko asmoz, honelako zinema-jaialdietako errealitateari buruz hausnartzeko esparru gisa balio dezaten.

SAIL OFIZIALA

Soldaţii. Poveste din ferentari / Soldiers. Story From Ferentari

Adi neska-lagunak utzi berri duen antropologo gazte bat da; Ferentarira joango da (Bukaresteko auzo pobreena), maneleari (erromani komunitatearen pop musika) buruzko tesi bat idaztera. Gaiari buruz ikertzen ari den bitartean, Alberto preso ohi erromania ezagutuko du, eta hark lagundu egingo diola hitz emango dio. Gutxi barru maitasun-harreman batean hasiko dira biak. Adik pobreziatik ateratzeko animoak emango dizkio, nekez lortzeko moduko planak proposatuz, eta Albertok ondo landutako amodio-hitzen bitartez erantzungo dio. Dirua amaitzen denean, apartamentu batean harrapatuta geratuko dira, irabazlerik gabeko beharrizan eta botere-joko batean elkar maitatzen eta erabiltzen duten bitartean.

ZUZENDARI BERRIAK

Cargo

Ipar Itsasoaren ur hotzetan, Leon Broucke bere arrantzontzitik eroriko da bere seme zaharrena, Jean, aurrean duela. Agurea koma sakonean murgilduko da, eta semearen gain utziko du zor itzel baten eta familiako negozioaren erantzukizuna. Aitaren faltak gatazkak piztuko ditu Jeanen eta bere bi anaien artean. Francis bi aukeren artean erdibituta dago: edo bere familia, edo maitale ezkutuarekin ihes egitea. William etxera itzuliko da, delituzko bizimodutik ihesi, bere bekatuak garbitu nahian. Jeanek, bere zortzi urteko semearentzat etorkizuna eraikitzeko desesperaturik, anaiari bere iragan kriminala aurpegiratuko dio. Cargo desesperazioari buruzko istorio bat da: etsipenak familia bat suntsitzear nola utz dezakeen kontatzen du.

HORIZONTES LATINOS

Una mujer fantástica

Marina zerbitzari gazte bat da, eta abeslaria izan nahi du; Orlando, berriz, inprimategi baten jabea da. Biak etorkizuna elkarrekin bizitzeko planak egiten ari dira. Orlando bat-batean hiltzen denean, Marinak aurre egin beharko dio Orlandoren familiari eta gizarteari, benetan zer den erakusteko: emakume konplexua, indartsua, zintzoa… zoragarria. Teddy saria eta gidoi onenaren saria 2017ko Berlinalen. Sebastiane Latino Saria.

PERLAK

120 Battements par minute (120 BPM) / 120 Beats Per Minute

Paris, 90eko hamarkadaren hasieran. Aktibista gaztez osatutako talde batek HIESari buruzko kontzientzia piztuarazi nahi du. Kide berri bat, Nathan, harrituta geratuko da Sean taldekidearen erradikaltasunarekin eta energiarekin; izan ere, gogo guztia ematen dio borrokari. Canneseko Epaimahaiaren Sari Nagusia.

Call Me By Your Name

Italia iparraldea, 1983ko uda. Elio Perlmanek, 17 urteko mutil estatubatuar/frantses/italiar batek, bere familiaren XVII. mendeko etxean ematen ditu egunak, egonean, musika transkribatzen eta bere lagun Marziarekin maite-jolasetan. Egun batean Oliver iritsiko da, 24 urteko estatubatuar bat, aste batzuetan zehar Elioren aitari bere jarduera akademikoan laguntzeko, Heraklitori buruz egiten ari den doktoretza lantzen duen bitartean. Uda paregabe horretan, astiro garatzen den desiraren edertasuna ezagutuko dute Eliok eta Oliverrek.

CULINARY ZINEMA

The Cakemaker

Thomas alemaniar pastelgile gazteak maitasun-harreman bat du Oren israeldarrarekin, Berlinera negozio-bidaia ugari egiten dituen gizon ezkondu batekin. Oren Israelen hilko da, auto-istripu batean; orduan, Jerusalemera bidaiatuko du Thomasek, haren heriotzari erantzuna bilatzeko. Identitate sekretua erabiliz, Thomas bere maitalearen alargun berriaren bizitzan infiltratuko da. Anat du izena, eta hark gobernatzen duen sukalde-laguntzaile izatera iritsiko da Thomas.

MADE IN SPAIN

Pieles

Forma fisikoak gizartearen aurrean baldintzatzen gaitu, berdin du guk aukeratu dugun ala ez. Pieles fisikoki desberdinak direlako ezkutatu, gorde edo elkartu behar izan duten pertsona batzuen istorioa da. Samantha, digestio-aparatua alderantziz duen emakumea, Laura, begirik gabeko neska, edo Ana, aurpegia gaizki osatua duen emakumea. Pertsona bakartiak dira, eta borrokan aritu behar dute, forma fisiko bakarra ulertzen eta ezberdina dena baztertu eta gaizki tratatzen duen gizartean bere lekua aurkitzeko.

Lehiaketaz kanpo

Film laburrak

• For The Good Times (Zinemira Kimuak)
  Andrés Daniel Sainz
  Familiako patriarkaren urtebetetzean, semeetako batek armairutik atera eta senideen tolerantzia proban jartzeko erabakia hartuko du. Baina gordeta dituen ustekabeak ez dira hor amaitzen.

• El sueño de Ana (Zabaltegi-Tabakalera)
  José Luis Torres Leiva (Chile)
  Anak bikotekidearekin izandako ametsa kontatuko digu; izan ere, duela gutxi hil da bikotekidea. El sueño de Ana José Luis Torres Leiva prestatzen ari den hurrengo film luzearen epilogoa da; Vendrá la muerte y tendrá tus ojos izenburupean, heriotzari, amodioari eta aro berri baten hasierari buruz hitz egingo digu.
  
• Flores (Zabaltegi-Tabakalera)
  Jorge Jácome

Film luzeak

• La llamada (TVE Gala)
  Javier Calvo, Javier Ambrossi (Spain)
  Segovia. ‘La Brújula’ kristau-kanpamentua. Bernarda moja iritsi berriak kanpamentua salbatu nahi du, Viviremos firmes en la fe bere abestiaren bitartez. Sor Milagrosek, zalantzak dituen gazte batek, Presuntos Implicados taldea zenbat gustatzen zitzaion gogoratzen du. Eta Maríak eta Susanak, zigortutako bi nerabek, Suma Latina izeneko talde bat dute. Baina gau batean Jainkoa Maríaren aurrean agertuko da, eta ordutik dena aldatuko da. Izan ere, Jainkoari ikaragarri gustatzen zaio Whitney Houston.

Genero Ikasketak - Film Laburrak

• Euritan (Zinemira Kimuak)
  Irati Gorostidi, Arantza Santesteban
  Itxaro Bordak 1985ean idatzitako Klara eta biok narrazioa berrikustea proposatzen du Euritan filmak. Egilea bere iraganeko hitzen aurrean jarrita, euskal nortasunaren inguruko harreman periferikoaren gaineko begirada eguneratzen da.