Ofizialak
Partner
"Z365" edo "Zinemaldia urte osoan" Zinemaldiaren apustu estrategiko berria da, non talentu berrien bilaketa, laguntza eta garapena (Ikusmira Berriak, Nest); formakuntza eta zinema-ezagutzen transmisioa (Elias Querejeta Zine Eskola, Zinemaldia + Plus, Zinemagileen elkarrizketa); eta ikerketa, dibulgazioa eta pentsamendu zinematografikoa (Z70 proiektua, Pentsamendua eta eztabaida, Ikerketa eta argitalpenak) elkartzen diren.
Deialdia Sartu NIRE ZINEMALDIRA 
Agenda Programa eta sarrerak Bilatu 
Hiru europar, bi asiar eta bi latinoamerikar zinemagileren sinadura daramate Donostia Zinemaldiaren Sail Ofizialeko lehen aurrerapeneko filmak. Izan ere, 66. edizioko Urrezko Maskorra lortzeko lehiatuko dira Simon Jaquemet, Kim Jee-woon, Naomi Kawase, Benjamín Naishtat, Valeria Sarmiento eta Markus Schleinzer-en azken lanak.
Claire Denis (Paris, 1946) –Beau travail eta White Material obren egilea, besteak beste– lehen aldiz lehiatuko da Urrezko Maskorra lortzeko, High Life filmarekin. Zientzia fikzioko film horretan, berriz ere aritu da Juliette Binoche aktorearekin, Un beau soeil intérieur-en ondoren –iaz, Canneseko Errealizadoreen Hamabostaldia irabazi zuen, ex aequo Philippe Garrelekin–, eta Robert Pattinsonekin.
Naomi Kawase (Nara, Japonia, 1969) bigarrenez saiatuko da Urrezko Maskorra lortzen, 2010ean Genpin, Fipresci sariaren irabazlea, aurkeztu eta gero. Orain, bere azken bi filmekin – An / Sweet Bean eta Hikari, hurrenez hurren– Un Certain Regard sailean eta Canneseko lehiaketa ofizialean parte hartu eta gero, Vision ekarriko du Donostiara, bere jaioterriko probintzian filmatu duen obra bat. Juliette Binoche frantsesa eta Masatoshi Nagase japoniarra (An, Hikari, Paterson) dira filmaren protagonistak.
Kim Jee-woon (Seul, 1964) ere bigarrenez izango dugu Urrezko Maskorra lortzeko lehian. Donostian 2010ean Ang-ma-reul bo-at-da / I Saw the Devil aurkeztu ondoren, Illang: The Wolf Brigade filmarekin parte hartuko du hegokorear zuzendariak. Mamoru Oshii-k (Ghost in the Shell) idatzitako Jin-Roh animearen korear remakea da filma, eta Keberos Panzer Cops polizia-indar bortitza du ardatz.
Valeria Sarmiento (Valparaíso, Txile, 1948), halaber, bigarrenez lehiatuko da Sail Ofizialean, zuzendari gisa, duela bi hamarkada baino gehiago (1995ean) Elle aurkeztu eta gero. Baina Sarmientok Zinemaldiarekin duen lotura hamar urte lehenago hasi zen, haren lan-ibilbidearen hasieran, 1984an Zuzendari Berrientzako Donostia Sari Nagusia irabazi zuenean bere lehen fikzio-film luzeari esker (Notre mariage). Zinemaldian, Zabaltegin parte hartu zuen azkenekoz, 2012an sail horretan programatu baitzuten haren filma, As Linhas de Torres / Lines of Wellinghton. Le cahier noir / The Black Book, Frantzia eta Portugal arteko koprodukzioa, Camilo Castelo Branco-ren Livro Negro de Padre Dinis eleberrian dago oinarrituta. Egile berarena da Sarmientok muntatutako Mistérios de Lisboa, halaber, Raúl Ruizi zuzendari onenaren Zilarrezko Maskorra ekarri zion filma (2010); hain zuzen ere, Mistérios de Lisboa obran ere agertzen den pertsonaiaren prekuelatzat har daiteke Livro Negro de Padre Dinis.
Rojo Benjamín Naishtaten (Buenos Aires, 1986) hirugarren film luzea da. Haren lehenengo lana, Historia del miedo, 24. Zinema Eraikitzen sailean aukeratutako filmetako bat izan zen, Berlinen lehiatu zen 2014an eta Horizontes Latinos sailean ere proiektatu zuten. Bigarrena, El movimiento (2015), Locarnoko sail ofizialean izan zen. Rojo 70eko hamarkadako Argentinan dago girotuta, diktadura hasi aurreko urteetan, eta Darío Grandinetti, Andrea Frigerio eta Alfredo Castro ditu antzeztaldean.
Markus Schleinzer (Viena, 1971) Canneseko sail ofizialean lehiatu zen bere lehenengo lanarekin (Michael). Donostian, bere bigarren film luzea aurkeztuko du: Angelo. Schleinzer-ek Casanova Variations filmaren gidoia idatzi zuen Michael Sturminger zuzendariarekin batera, eta 2014an Urrezko Maskorra lortzeko lehian parte hartu zuen lan horrek. Orain, nahitaez europartutako afrikar baten historia hartu du hizpide. Makita Samba, Alba Rohrwacher eta Larisa Faber dira protagonistak.
Simon Jaquemet-ek (Zurich, 1978) 2014an estreinatu zuen bere lehenengo lana, Chrieg / War sariduna, Zinemaldiaren New Directors sailean. Bigarren filmarekin (Der unschuldige / The Innocent) Donostiara itzuliko da, Sail Ofizialera, iraganak fededunen komunitate batean harrapatu duen emakume baten erretratuarekin.
Sail Ofiziala osatuko duten gainerako filmak datozen asteetan iragarriko dira.
Angeloren historia dugu hau: XVIII. mendean jaiotako afrikarra bera, 10 urte zituenean Europara ekarri zuten. Noblezia ilustratuaren gortean mirabe bihurtuta, gai izango da bere bestelakotasuna erabiltzeko eta, hala, goi-gizarteko kideen gonbidatu estimatu eta atrakzio bihurtzeko. Enperadorearen hurko dela, Magdalena neskame gaztearekin ezkontzeko erabakia hartuko du hartaz maitemindu eta gero. Hala eginik, gortearen arbuioa jasango du Angelok ezinbestean. Bere prestigioaren gorenean, ohartuko da bere bestelakotasuna ez dela inoiz ezeztatuko. Ez du inoiz jakingo zer den bizitza normala, beti izango da arrotz. Benetako gertakarietan oinarrituta.
Ruthek neurozientzietako ikerketa-laborategi batean egiten du lan, haren kristau-familia muturreko tradizionalista eta kontserbadorea izan arren. Bat-batean bere iraganarekin aurrez aurre aurkituko du bere burua, bere aspaldiko maitalea, hogei urtez espetxean desagertuta egon ondoren, berriz ere agertzen denean eta auzitan jartzen dituenean haren sentimenduak, bizitza eta, laster, fedea.
Espazio sakona. Gure eguzki-sistematik harago. Monte eta haren alaba txikia, Willow, elkarrekin bizi dira espazio-ontzi batean, erabat isolatuta. Monte gizon bakartia da, autodiziplina zorrotzaren bidez babesten du bere burua desiratik –berea nahiz besterena– , eta borondatez kontra izan zuen alaba. Haren esperma Boyse, neskaz erditu zen emakume gaztea, intseminatzeko erabili zuten. Preso talde bateko kide ziren: espazioko konbiktuak, heriotza-korridoreko presoak. Lurretik gertuen dagoen zulo beltzerako misioan bidalitako akuriak. Orain, Monte eta Willow bakarrik geratu dira. Eta Monte aldatu egin da. Alabaren bitartez, lehenengo aldiz, maitasun ahalguztidunaren sorrera biziko du. Willow hazi egingo da, neska gazte eta ondoren emakume gazte bihurturik.
2029an, Ipar eta Hego Koreako gobernuek herrialdea batzeko bost urteko plana iragarri eta gero, munduko nazio boteretsuenek ezarritako zehapenek ekonomia hondatu eta kaos garai ikaragarria ekarriko dute. Sekta izeneko talde terrorista armatua agertzen denean gobernuari eta batasunari aurka egin nahian, presidenteak Unitate Berezi izeneko polizia-dibisio berria sortuko du, eta botere politiko nabarmena bilduko du. Hala ere, Segurtasun Publiko inteligentzia-zerbitzua, bere eragina murrizten dela ikusirik, azpikeriatan hasiko da Unitate Berezia suntsitzeko. Bi erakunde ultra boteretsuen arteko gatazkaren erdian, Unitate Berezian "Otso Brigada" sekretua eratzen ari delako zurrumurruak agertuko dira. Giza arma horiei otso esaten zaie, "Illang" (Otso Brigada).
Bikote bitxi batek XVIII. mendearen amaieran bizitako abenturen historia: batetik, jatorri misteriotsuko umezurtz txikia; bestetik, jatorri ezezaguneko italiar erizain gaztea. Haien arrastoak Erromatik Parisera, Lisboatik Londresera, Parmatik Veneziara eramango gaitu. Haiekin batera, Vatikanoaren intriga ilunak, zorigaiztoko pasioaren ziztadak, duelu lazgarri bat, Versailleseko gorteko txantxak eta Frantziako Iraultzaren asaldurak esploratuko ditugu; bitartean, itzaletan, ezkutuko arrazoiak tarteko, atzetik segika izango dituzte itxura susmagarriko kalabriar bat eta kardinal asaldagarri bat.
1970eko hamarkadaren erdialdean, gizon ezezagun bat iritsiko da hiri txiki lasai batera. Jatetxe batean, eta arrazoi nabarmenik gabe, Claudio abokatu ezagunari joka hasiko zaio. Herritarrek abokatua babestuz, ezezaguna umiliatu eta hiritik kanporatuko dute. Etxera bidean, Claudiok eta emazteak gizon ezagunarekin topo egingo dute. Gizonak mendeku hartu nahi du. Orduan, abokatuak heriotzaren, sekretuen eta isiluneen bideari ekingo dio, eta ez du atzera bueltarik izango.
Jeanne Japoniara joango da sendabelar bitxi baten bila, eta bidaian Tomo basozaina aurkituko du. Hark bilaketan lagundu, eta iraganeko aztarnetan zehar gidatuko du Jeanne. Duela hogei urte, Yoshinoko basoan, bere lehenengo amodio istorioa bizi izan zuen Jeannek.
Irudiak
Astelehenetik ostiralera: 09:00 - 14:00 | 16:00 - 19:00.