tve movistar+
Babesle
Ofizialak
65. Donostia Zinemaldia
22/30 Iraila 2017 - #65ssiff

itxi
Bete formularioa zure datuekin, erregistratutako erabiltzaileentzako edukiak ikusteko
Sakatu hemen
Ez duzu pasahitza gogoratzen? Sakatu hemen

itxi


Oraindik ez duzu posta elektronikoa balioztatu. Posta elktroniko bat bidali dizugu, ondoko esteka sakatu behar duzu kontua balioztatzeko

Hemen zaude: Lehen orrialdea > 66. Edizioa 2018  > Berriak > Canneseko zinema-jaialdiko zuzendariak eta Berlinaleko hurrengo zuzendari artistikoak Elías Querejeta Zine Eskolak eta Donostia Zinemaldiak antolatutako mintegi batean parte hartuko dute
Canneseko zinema-jaialdiko zuzendariak eta Berlinaleko hurrengo zuzendari artistikoak Elías Querejeta Zine Eskolak eta Donostia Zinemaldiak antolatutako mintegi batean parte hartuko dute
Programa datorren asteartean, abenduaren 18an, hasiko da, eta Thierry Frémaux, Vincent Maraval, Carlo Chatrian, Javier Martín eta Xabier Paya izango ditu parte-hartzaile
Osteguna, 2018(e)ko abenduaren 13

Kritika eta Analisi Saioen Mintegiaren helburua Elías Querejeta Zine Eskolako ikasleei tresnak eta nolabaiteko ikuspuntua ematea da, eskola ondoko ibilbide profesionala zehaztu ahal izateko. EQZEk eta Donostia Zinemaldiak antolatutako jardunaldi hauetan industriako hainbat arlotako profesionalek eta adituek hartuko dute parte, ikasleen proiektuetan laguntzeko beren esperientzia ekarriko dutenak, ikasleek graduondoko programa amaitu ondoren sortuko dituzten proiektuei sendotasun handiagoa emateko.

Mintegia asteartean, abenduaren 18an, hasiko da ikasleentzako lan-saio batekin. Bi gai jorratuko dituzte. Batetik, Javier Martínekin (Berlinaleko ordezkaria Latinoamerikako herrialdeetan eta Donostia Zinemaldiko Europa-Latinoamerika Koprodukzio Foroan proiektuak balioztatzen dituen batzordeko kidea) laborategiei eta diru-laguntzak ematen dituzten erakunde publiko eta pribatuei ematen zaizkien proiektu-dosierrak idazteko eta aurkezteko arrakasta-gakoak ikasteko benetako kasuak eta materialak aztertuko dituzte. Bestetik, Xabier Paya bertsolari, idazle eta irakasleak proiektuak ahoz aurkezten irakatsiko die, ohikoa baita azoka eta jaialdietan profesionalen aurrean proiektu zinematografikoak defendatu behar izatea.

Abenduaren 19an eta 20an, herritarrei irekitako hitzaldiak izango dira: Thierry Frémauxek (Lumière Institutuko, Lyongo Lumière jaialdiko eta Canneseko zinema-jaialdiko zuzendaria), Vincent Maravalek (Wild Bunch eta Insiderseko bazkide sortzailea eta Nazioarteko Salmenten zuzendaria) eta Carlo Chatrianek (2020tik aurrera Berlineko zinema-jaialdiko zuzendari artistikoa izango dena) zinema-jaialdiek industria zinematografikoan eta kulturaren promozioan duten lekuaz hitz egingo dute.

Mintegia osatzeko, 2019an zenbait gonbidatuk askotariko gaiak jorratuko dituzte. Hala, otsailaren 25ean, Jérôme Paillardek (Canneseko Marché du Filmeko zuzendari exekutiboa), Matthieu Darrasek (Donostia Zinemaldiko ordezkaria Erdialdeko eta Ekialdeko Europan eta Torino FilmLabeko zuzendari artistikoa) eta Ilse Hughanek (Hubert Bals Fund HBFko Hautaketa Batzordeko kidea) ikus-entzunezko proiektuak garatzea bultzatzen duten zinema-azoken, jaialdien eta laborategi berezien rolaz eta garrantziaz hitz egingo dute. Apirilaren 11n, Domingo Corralek (Movistar+eko Fikzioko zuzendaria) eta Chiara Marañónek (Mubiko Programazioko zuzendaria) Elías Querejeta Zine Eskola bisitatuko dute, plataforma digital berriez ekoizpenaren eta programazioaren ikuspuntuetatik mintzatzeko. Egun berean, Rosa Ferrék (Mataderoko zuzendaria) eta Garbiñe Ortegak (Punto de Vista jaialdiko zuzendaria) zinema zabaldua deitutakoaren eta pantaila berrien gaiak jorratuko dituzte, baita zinema-aretoko ikusleei beste aukera batzuk ezagutarazten dizkien arte- eta komisariotza-praktika horrekin lotutako proiektu guztiak ere. Azkenik, ekainaren 19an, emakumezko ekoizleen sorkuntzari eskainitako mahai-ingurua antolatu da, eta Esther Garcíak (El Deseoko ekoizlea eta bazkide sortzailea), Leire Apellánizek (Sr. y Sra. etxeko ekoizlea eta bazkide sortzailea) eta Marian Fernándezek (Txintxua Filmseko ekoizlea eta bazkide sortzailea) hartuko dute parte.

Donostia Zinemaldiak Elías Querejeta Zine Eskola zehazten eta abiarazten parte hartu du, eta Zuzendaritza Akademikoko kide da. Gainera, Komisariotzako graduondoko ikasleei «Zinemaldia eraikitzen» ikasgaia ematen die. Horren helburua da zinema-jaialdien eta, zehazki, Donostia Zinemaldiaren etorkizunaz hausnartzea ikasleekin eta eskolara etortzen diren profesionalekin batera.

EQZE ordutegiak

Eguna: Asteartea 18
Ordua: 09:30 - 13:30
Tokia: EQZE - Saio itxia (ikasleentzako saioa da)
Hizlariak: Javier Martín & Xabier Paya


Eguna: Asteazkena 19
Ordua: 11:00 - 13:00
Tokia: Zinea 1 Aretoa (Tabakalera) - Saio irekia
Hizlariak: Thierry Frémaux & Vincent Maraval


Eguna: Osteguna 20
Ordua: 16:00 - 18:00
Tokia: Zinea 1 Aretoa (Tabakalera) - Saio irekia
Hizlaria: Carlo Chatrian

 

© Donostia Zinemaldia | Desarrollado por: Yo Miento Producciones

Webgune hau berezko eta kanpoko cookies-az baliatzen da, erabiltzaile gisa esperientzia hobea eskaintzeko. Informazio gehiago Onartzea