Irailaren 17tik 25era egingo den Donostia Zinemaldiaren 69. edizio honetan, aurretik beste zinema-jaialdi batzuetan –hala nola Cannesen, Venezian eta Berlinen– programatutako 15 film hartuko ditu guztira Perlak sailak. Ryusuke Hamaguchi, Todd Haynes, François Ozon eta Paul Verhoeven zinemagile ospetsuekin batera, zinematografia garaikideko errealizadore garrantzitsuak ere egongo dira aurten gurenean, hala nola Julia Ducournau –Urrezko Palmorria irabazi duen azken zuzendaria–, Céline Sciamma, Sean Baker eta Joachim Lafosse. Horrez gain, Emmanuel Carrère idazleak fikziozko bere bigarren lana aurkeztuko digu, eta debutak ere erakutsiko dira, kasu baterako, Shipei Wen eta Charlotte Gainsbourg zuzendarienak.
Gastón Duprat eta Mariano Cohn zinemagileen Competencia oficial komediak, aurki Veneziako Mostran parte hartzeaz gain, Perlak saila lehiaketan ere zabalduko du. Bi zuzendari argentinarrek, El artista (2008), El hombre de al lado (2009), El ciudadano ilustre (2016) eta Todo sobre el asado (Culinary Zinema, 2016) lanen arduradunek, zinemaren munduan girotutako tragikomedia hau aurkeztuko digute. Penélope Cruzek zinemagile bitxi baten rola du, eta Antonio Banderas eta Óscar Martinezek, berriz, Hollywoodeko aktore batena eta antzerki-antzezle erradikal batena, hurrenez hurren.
Donostia Hiria Publikoaren Saria jasotzeko lehiatik at, The Velvet Underground dokumentalak itxiko du saila, duela gutxi Canneseko jaialdian lehiaz kanpo ere eman zenak; bertan, Lou Reed buru izan zuen rock-talde ospetsuaren garrantzia aztertuko du Todd Haynesek. Zuzendari estatubatuarra, Zinemaldiko epaimahai ofizialeko presidentea izan zena 2013an, Far from Heaven (2002), I'm Not There (2007) –Bob Dylanen bizitza modu askean birsortzen duen filma–, Carol (2015) eta Wonderstruck (Perlak, 2017) lanen egilea da, besteak beste.
Perlak sailak lehiaketatik kanpoko bi emanaldi berezi eskainiko ditu, aurtengo film garrantzitsuenetako biren eta Canneseko azken edizioan gehien laudatutako filmen artean: Titane, Julia Ducournau zuzendari frantziarrarena, eta Drive My Car, Ryusuke Hamaguchi japoniarrarena. Ducournauk, Frantziako zinema-jaialdiaren historian Urrezko Palmorria irabazi duen bigarren emakumeak, Grave / Raw (2016) generozko filmarekin debuta egin zuen, eta orain Titanerekin itzuli da, Agathe Rouselle eta Vincent Lindon protagonista dituen beste genero-nahaspila sailkaezin bat.
Drive My Car filma Haruki Murakamiren kontakizun labur batean oinarrituta dago, eta Cannesen gidoi onenaren saria eta FIPRESCI saria irabazi zituen; drama pertsonal batetik lehengoratzen saiatzen ari dela Txekhoven Osaba Vania antzezlana muntatzea onartzen duen antzerki-aktore eta -zuzendari baten istorioa kontatzen digu filmak. Hamaguchik jada hartu zuen parte Cannesen Netemo Sametemo / Asako I & II (Perlak, 2018) filmarekin, eta Zinemaldian (zehazki, New Directors-en) bere lehen film luzea aurkeztu zuen, Passion (2008).
Hamaguchik bi lanekin hartuko du parte aurtengo Perlak sailean, Guzen to sozo / Wheel of Fortune and Fantasy ere aurkeztuko baitu; film horrekin Zilarrezko Hartz bat eskuratu zuen Berlinale jaialdian (zehazki, Epaimahaiaren Sari Berezia). Filma –saila osatzen duten gainerakoak bezala, Donostia Hiria Publikoaren Saria jasotzeko hautagai izango dena– oroimenaren, iruzurraren eta patuaren bidez elkarrekin lotutako ipuinen triptiko bat da.
Céline Sciamma, Bande de filles / Girlhood (TVE-Beste Begirada Saria, 2014) eta Portrait de la jeune fille en feu / Portrait of a Lady on Fire (2019) filmak Perlak sailean erakutsi zituen zuzendari frantziarra, sail berean izango dugu berriro bi neskatoren adiskidetasuna kontatzen digun Petite Maman lanarekin (Berlinale jaialdian lehiatu zen).
Perlak sailean, gainera, azken urteotan Donostia Zinemaldiko Sail Ofizialean parte hartu duten eta euren lan berriak Cannesen erakutsi dituzten hiru zuzendari ere lehiatuko dira: Joachim Lafosse, François Ozon eta Louis Garrel. Alde batetik, gaixotasun mentalek bikote baten harremana nola markatzen duten erakusten digu Lafossek Les intranquilles / The Restless lanean. Belgikako errealizadoreak lan ugari zuzendu ditu, hala nola Nue propriété / Private Property (2006) eta À perdre la raison / Our Children (2012); zuzendari onenaren Zilarrezko Maskorra eskuratu zuen Les chevaliers blancs / The White Knights (2015) lanarekin, eta L’économie du couple / After Love (2016) lanarekin Perlak sailean hartu zuen parte.
Dans la maison / In the House (2012) filmarekin Donostian Urrezko Maskorra eta gidoi onenaren Epaimahaiaren Saria eskuratu ondoren, François Ozonek Cannesen lehiatutako drama bat ekarriko digu Zinemaldira: Tout s'est bien passé / Everything Went Fine, eutanasiari buruzkoa. Errealizadorearen beste film batzuk ere erakutsi dira Donostian, Sail Ofizialean lehiatutakoak: Sous le sable / Under the Sand (2000), Le réfuge / The Refuge (Epaimahaiaren Sari Berezia, 2009) bezalaxe; Jeune et jolie / Young and Promising (2013); Une nouvelle amie / The New Girlfriend (2014); eta Été 85 / Summer of 85 (2020).
Louis Garrelek La Croisade / The Crusade zuzendu du, proiektu misteriotsu baten istorioa kontatzen digun filma, non mundu osoko haurrek planeta salbatu nahi duten; halaber, filmaren protagonistetako bat ere bada. Aktorea ere baden frantziarrak zuzendutako hirugarren film luzea da; izan ere, Les deux amis / Two Friends (2015) eta L'homme fidèle / A Faithful Man (2018) zuzendu zituen; Jean-Claude Carrière zenarekin batera idatzi zuen L'homme fidèle filmaren gidoia, eta gidoi onenaren Epaimahaiaren Saria eskuratu zuten Donostian gidoi horrengatik. Cannesko Séances Spéciales atalean estreinatutako La Croisade filmaren gidoia ere biek idatzi zuten eta L'homme fidèle filmeko pertsonaia berberak ditu protagonista, Laetitia Casta, Joseph Engel eta Louis Garrel aktoreek antzeztuak.
Cannesko Séances Spéciales atalean ere estreinatu zen Shipei Wen zinegile txinatarraren debuta –Re Dai Wang Shi / Are You Lonesome Tonight?–, thriller hipnotiko, ilun eta korapilatsu gisa definitua, eta erruaren, errukiaren, barkamenaren eta erredentzioaren esplorazio erakargarri gisa ere bai.
Cannesko lehiaketatik datorren beste film bat Red Rocket da, Sean Bakerren film luzea, helduentzako zinemako aktore bat Texasera –bere jaioterrira– itzultzen deneko istorioa kontatzen diguna. Besteak beste, Tangerine (2015) eta The Florida Project (2017; Perlak sailean emana) film luzeen egilea da zinemagile estatubatuarra.
Paul Verhoevenen Benedetta ere Cannesko Sail Ofizialetik ekarri da; mirariak egiteko gai zen moja baten kontakizuna XV. mendean girotu du errealizadoreak bere film berrian. Errealizadore herbeheretarraren Basic Instinct (1992) filma American Way Of Death: 1990-2010 bitarteko Amerikako Zinema Beltza atzerabegirakoaren parte izan zen 2011n eta, oraingoan, Elle (2015) filmaren ondoren, Perlak sailean izango dugu zuzendaria berriro.
Cannesko zinema-jaialdiko Premières sail berritik datorren Jane par Charlotte / Jane by Charlotte filma ere erakutsiko da Perlak sailean; Charlotte Gainsbourg aktoreak idatzi eta zuzendutako dokumental horretan, zuzendariak bere ama Jane Birkinen deskribapen bat egiten digu irudi ezezagun, argazki eta elkarrizketak konbinatuz. Antzezle eta abeslari frantses-ingelesak zuzendutako lehen lana da.
Emmanuel Carrèrek (Frantziako idazle ospetsuenetako bat eta Letren Asturiasko Printzesa Saria 2021ean) fikziozko bere bigarren filma aurkeztuko digu, Ouistreham / Between Two Worlds, Cannesko azken Quinzaine des Réalisateurs atalean parte hartu zuena. Oraingoan, ez du bere eleberri bat egokitu, lehen filmean egin zuen bezala –La moustache (2005)–; horren ordez, Florence Aubenasen liburu bat egokitu du; idazlearen film berrian, protagonistak –idazle bat– garbitzaile baten itxurak egingo ditu, laneko segurtasun-faltari buruzko ikerketa bat egiteko.
Xavier Giannolik Les corps impatients / Eager Bodies (2003) lanarekin –bere lehen film luzearekin– egon zen New Directors sailean, eta Les illusions perdues / Lost Illusions aurkeztuko du Zinemaldian, Veneziako zinema-jaialdiaren hurrengo edizioan ere izan ondoren. Zuzendari frantziarrak 2009an Kontrauhina: Frantziako Zinema Berriena atzerabegirakoan parte hartu zuen Les corps impatients (2003) eta L'interview (1998) lanekin, eta Honoré de Balzac idazleak XIX. mendeko Frantzian bidea ireki nahi duen poeta gazte ezezagun bati buruz idatzitako eleberria –izen berekoa– egokitu du oraingoan. Hauek dira aktoreak: Benjamin Voisin, Xavier Dolan, Vincent Lacoste, Cécile de France, Gérard Depardieu eta Jeanne Balibar.
Espainian erakutsi gabeko urteko film luze nabarmenen aukeraketa da Perlak. Sail honetako filmek kritikaren txaloak eta sariak jaso dituzte nazioarteko beste zinemaldi batzuetan. Film horiek Donostia Hiria Publikoaren Sarietarako hautagai izango dira, film onenarena (50.000 eurokoa) eta Europako film onenarena (20.000 eurokoa), Espainiako banatzaileei emango zaizkiena.
|
Ospea eta gizarte-prestigioa lortu nahian, enpresaburu aberats batek arrastoa utziko duen film bat egitea erabaki du. Horretarako, izar onenez osatutako talde bat kontratatuko du: Lola Cuevas (Penélope Cruz) zinemagile ospetsu-ospetsua eta talentu berdingabea baina are ego berdingabeagoa duten bi aktore ezagun: Félix Rivero Hollywoodeko aktorea (Antonio Banderas) eta Iván Torres antzerki-aktore erradikala (Oscar Martínez). Bi aktoreak mitoak dira, baina ez dira inola ere munduko adiskiderik onenak. Lolak gero eta proba bitxiagoak jarriko dizkie eta euren artean ez ezik, beren legatuekin ere borroka egin beharko dute Félixek eta Ivánek.
The Velvet Underground taldeak musikaren mundua aldatu zuen soinu berri bat sortu zuen, eta rock and roll generoko talde gurtuenetako bat bihurtu zen. The Velvet Underground filmean, Todd Haynes zinema-zuzendari ospetsuak erakutsi nahi digu nola bihurtu zen taldea kulturaren giltzarri, eta kontraesan handiak zituela ere kontatzen digu: bere garaiko taldea zen, baina, aldi berean, atenporala; literarioa eta, aldi berean, errealista; nola goi-mailako artean hala kale-kulturan sustraitua. Filmak garai hartako pertsona garrantzitsuei egindako elkarrizketa sakonak aurkezten dizkigu, orain arte sekula ikusi gabeko emanaldiekin eta grabazio bilduma aberats batekin, Warholen filmekin eta beste mota batzuetako arte esperimentalarekin konbinatuta; hala, John Cale taldearen fundatzaileetako batek musika-taldearen sorkuntza-balio gisa deskribatzen duen horretan murgiltzeko esperientzia sortzen du horrek guztiak: "Nola izan dotorea eta nola izan basatia", alegia.
EMANALDI BEREZIAK |
Yusuke Kafuku antzerki-antzezle eta -zuzendaria da. Oto antzerkigilearekin ezkonduta dago. Senar-emazte zoriontsuak dira, baina bat-batean Oto desagertu egingo da sekretu bat atzean utzita. Hortik bi urtera, Yusukek antzoki bateko zuzendari-lanpostua onartu eta Hiroshimara joango da autoz. Misaki txofer pertsonala ezagutuko du han, emakume isil bat. Elkarrekin denbora asko ematen dutela, Yusuke konturatuko da gauza ugari ez zekizkiela.
Esplikaziorik gabeko krimen batzuen ondoren, aita batek duela 10 urte desagertutako semea aurkituko du berriz. TITANIOA: bero eta korrosioari erresistentzia handia dion metala, egoki-egokia aleazio erresistenteetarako.
LEHIAKETARAKO |
XV. mendearen amaieran, izurritea herrialdea suntsitzen ari dela, Benedetta Carlini Pesciako komentuan (Toscana) sartuko da nobizia gisa. Benedettak gazte-gaztetatik mirariak egiteko gaitasuna izan du; komunitatera iritsi eta berehalako eragina izango du, transzendentala.
Zoriak eta irudimenak bultzatutako hiru istorio, non emakumezko batzuen bizitzak horien hautu eta damuek markatzen dituzten. Ustekabeko amodiozko triangelu batek, huts egindako sedukzio-tranpa batek eta gaizki-ulertu batetik sortutako topaketak ipuin-triptiko bat osatzen dute, oroimenak, iruzurrak eta patuak elkartzen dituena.
Denbora igarotze hutsak eragin zion asaldura zela-eta, Charlotte Gainsbourg beste modu batean ikusten hasi zen bere ama Jane Birkin, ordura arte ikusten zuen moduaz bestela, eta ama-alabek gainditu egin zuten elkarrenganako zuhurtzia-sentimendu hura. Kameraren bidez, Charlotte Gainsbourgek eta Jane Birkinek zintzotasunez hitz egiten diote elkarri, ama-alaben arteko harremana garatzeko lekua utzita.
Abelek eta Mariannek jakingo dute 13 urteko semeak (Joseph) ezkutuan saldu dituela gehien maite zituzten gauzak. Laster konturatuko dira Joseph ez dela hori egin duen bakarra: mundu osoko ehunka haur elkartu dira proiektu misteriotsu bat finantzatzeko. Planeta salbatzea da misioa.
Lucien XIX. mendeko Frantziako poeta gazte ezezagun bat da. Itxaropen handiak ditu eta bere bidea jorratu nahi du. Jaioterriko inprenta familiarra utzi eta bere mezenasen eskutik Parisen saiatuko da aurrera egiten. Hiri zoragarri horretan berehala abandonaturik, gazteak irabaziaren eta itxurakeriaren menpe dagoen mundu baten atzealdean zer gertatzen den jakingo du. Dena eros edo sal daitekeen giza komedia bat: bai arrakasta literarioa, bai prentsa; nola politika, hala sentimenduak; ospeak nahiz arimak.
Leïlak eta Damienek izugarri maite dute elkar. Damienek nahasmendu bipolarra du, baina saiatzen da Leïlarekin duen bizitzarekin jarraitzen, jakinda ezingo diola nahi duena eman.
Marianne Winckler autore ezagunak lan-kolokatasunari buruzko liburu bat idaztea eta errealitate hori bertatik bertara bizitzea erabaki du. Horretarako, nortasuna ezkutatuz Normandiako (Frantzia iparraldean) herri batean garbitzaile-lana lortu eta gizarteko gainerakoek ezagutzen ez duten bizitza bat ezagutuko du, non irabazitako eta gastatutako euro oro garrantzitsua baita. Esperientzia gogorra bada ere, lankideen arteko solidaritateak adiskide bihurtuko ditu Marianne eta lankideak. Elkarri laguntzeak adiskidetasuna dakar, eta adiskidetasunak, konfiantza. Baina zer gertatuko zaio konfiantza horri egia argitara ateratzen denean?
Nellyk zortzi urte ditu eta amona galdu berri du. Gurasoei laguntzen dien bitartean, bere ama Marion haurtzaroan jolasten zeneko etxearen inguruak arakatzen ditu, eta han aurkituko du zuhaitzeko etxea. Maiz hitz egin diote etxe hari buruz. Baina amak alde egingo du bat-batean, eta orduan, Nellyk bere adineko beste neskato bat ezagutuko du basoan eta zuhaitzean etxe bat eraikitzen hasiko dira elkarrekin. Lagun berriak Marion du izena.
Gazte batek uste osoa du norbaiti ustekabeko heriotza eragin diola, eta biktimaren alargunarekin harreman anbiguoa du; polizia bat ikerketa bat ebazten saiatzen ari da, bizitza betiko aldatuko dion ikerketa bat.
Mikey Saber, gain behera egin duen porno-izarra, bere jaioterrira itzuliko da, Texaseko hiri txiki batera, baina han inork ez du berriz ikusi nahi.
85 urterekin, Emmanuèleren aita ospitaleratu egin dute istripu zerebrobaskularra izan duelako. Esnatzean, oso ahul sentituko da, ez dela gai bere kabuz moldatzeko, eta bizitza grinaz maite duen gizon ikusbera honek hiltzen laguntzeko eskatuko dio alabari.