Ofiziala
Partner
"Z365" edo "Zinemaldia urte osoan" Zinemaldiaren apustu estrategiko berria da, non talentu berrien bilaketa, laguntza eta garapena (Ikusmira Berriak, Nest); formakuntza eta zinema-ezagutzen transmisioa (Elias Querejeta Zine Eskola, Zinemaldia + Plus, Zinemagileen elkarrizketa); eta ikerketa, dibulgazioa eta pentsamendu zinematografikoa (Z70 proiektua, Pentsamendua eta eztabaida, Ikerketa eta argitalpenak) elkartzen diren.
Deialdia Sartu NIRE ZINEMALDIRA 
Agenda Programa eta sarrerak 
Bilatu 
WIP Europa irailaren 20an, 21ean eta 22an izango da
Espainiako, Georgiako, Moldaviako Errepublikako, Errusiako, Turkiako eta Ukrainako sei ekoizpenek osatzen dute WIP Europa, Donostia Zinemaldiaren ekimena, postprodukzio-fasean egonik nagusiki Europakoak diren ekoizpenei zuzendua, irailaren 20an, 21ean eta 22an egingo dena.
Hauek dira profesionalen audientzia baten aurrean aurkeztu eta WIP Europa Industria Saria eta WIP Europa Saria eskuratzeko aukera izango duten sei filmak: Misión a Marte / Mission to Mars, Amat Vallmajor del Pozorena; Didi Shesveneba / A Long Break, Davit Pirtskhalavarena; CARBON, Ion Borșena; Nina, Oksana Bychkovarena; Zamanımızın Bir Kahramanı / A Hero of Our Time, Mirac Atabeyrena; eta Ya, Nina / Lucky Girl, Marysia Nikitukena.
WIP Europa irailaren 20an, 21ean eta 22an izango da, WIP Latam eta Europa-Latinoamerika X. Koprodukzio Foroarekin batera. Zinemaldiaren bideotekan (CinandoVL) egongo dira ikusgai film horiek, zinema-aretoan ematen direnetik irailaren 25era arte.
Misión a Marte / Mission to Mars euskal ekoizpena Amat Vallmajor del Pozo kataluniarraren lehen lana da; Elías Querejeta Zine Eskolan sorkuntzako graduondokoa egin zuen Vallmajor del Pozok. Euskal Herri postapokaliptiko batean girotutako film horretan bi anaia Martera joango dira misio batera, baina arrebarekin elkartuko dira lehenago.
Didi Shesveneba / A Long Break Davit Pirtskhalava georgiarraren lehen film luzea da; egileak Locarnoko zinema-jaialdian parte hartu zuen Sahsleli (2018) eta Mama (2015) film laburrekin (izan ere, Mamarekin Urrezko Pardino d’Oro irabazi zuen). Institutu bateko ikasle ohien bilera batean gertatutakoa kontatzen digu egileak; graduatu eta hamahiru urtera egingo den bilera haren antolatzaileak bere benetako asmoak ezkutuan gordetzen ditu.
CARBON ere egilearen lehen film luzea da, kasu honetan, Ion Borș moldaviarrarena; Transnistriako gerran 90eko hamarkadaren amaieran girotutako istorioa dugu, umore beltzez betea.
Oksana Bychkova zinemagile errusiarrak Rotterdameko, Shanghaiko, Sochiko eta Moskuko zinema-jaialdietan, besteak beste, parte hartu du aurreko filmekin, eta bere bosgarren film luzea aurkeztuko digu Donostian, Nina koprodukzioa (Errusia eta Georgia). Nina filmaren protagonista Nina da, emakume dirudun erakargarri bat, aspaldi maite zuen gizon batengana itzultzeko erabakiaren ondorioei aurre egin beharko diena.
Zamanımızın Bir Kahramanı / A Hero of Our Time Mirac Atabey zuzendari turkiarraren lehen lana da. Livadi / Yard (2018), etxerik gabekoei buruzko film laburren trilogiari buru ematen ziona, Rotterdamgo zinema-jaialdian estreinatu zen. Filmaren abiapuntua Mertek bere aita lurperatzeko asmoz Istanbuletik Anatoliako herrixka bateraino egingo duen bidaia da.
Azkenik, Marysia Nikituk zinemagile ukrainarrak zuzendutako Ya, Nina / Lucky Girl filma ere egongo da WIP Europan. When the Trees Fall lanak (2018) –Nikituken aurreko film luzeak– Berlingo zinema-jaialdiko Panorama sailean parte hartu zuen. Ya, Nina filmaren protagonista telebista-izar ezagun bat da, minbizia duela jakitean bere burua berrasmatu beharko duena.
WIP Europa lehiaketaren aurreko edizioko bi parte-hartzailek Kutxabank-New Directors Saria eskuratu ahalko dute: batetik, Inventura / Inventory, Darko Sinkorena; eta bestetik, Iki Şafak Arasında / Between Two Dawns, WIP Europa Industria Sariaren eta WIP Europa Sariaren irabazle Selman Nacarrena. Ekimen honetako parte-hartzaileen beste kasu arrakastatsu batzuei buruzko informazio gehiago esteka honetan.
SARIAK
WIP Europa Industria Saria Ad Hoc, BTeam Pictures, Deluxe, Dolby, Laserfilm Cine y Vídeo, Nephilim Producciones eta No Problem Sonido enpresek ematen dute. Saria aurkeztutako film baten postprodukzioan datza, barnean hartuta ingelesez azpititulatutako DCPa sortzea eta Espainian banatzea.
WIP Europa Sariak 10.000 euro gordin emango dizkio WIP Europa Industria Sariaren film irabazlearen ekoizle nagusiari.
WIP Europa Industria Saria irabazten duen filma Cannesko zinema jaialdiko Marché du Filmean proiektatuko da 2022. urtean.
wips@sansebastianfestival.com
Tel.: +34 943 481217
www.sansebastianfestival.com
WIP Europa egitasmoa Eusko Jaurlaritzako Ekonomiaren Garapen, Jasangarritasun eta Ingurumen Sailaren eta Creative Europe MEDIAren laguntzari esker gauzatu ahal izan da, eta Ad Hoc Studios, BTeam Pictures, Deluxe Spain, Dolby Iberia, Laserfilm Cine y Vídeo, Marché du Film - Festival de Cannes, Nephilim Producciones eta No Problem Sonido enpresen lankidetzari esker egin ahal izan da.
|
FILMAK
Moldavia, 90eko hamarkadaren hasiera. Dima traktore-gidariak Transnistriarekiko mugaren eskualde-gatazkan dauden tropetan sartu nahi du. Vasea Afganistango gerrako beteranoak bat egingo du Dimarekin. Fronterantz doazela, kiskalitako gorpu bat aurkituko dute. Agintariek, jaramonik egin gabe, ez diete gorpua identifikatzen lagunduko. Dimak eta Vaseak hildakoari hileta kristaua ematea erabakiko dute, baina hori baino lehen, bidaia zentzugabe bat egingo dute gorpuarekin, nor den jakiteko.
Graduatu zenetik hamahiru urte igaro direla, Tsitsik bere ikaskide ohiekin bilera bat antolatuko du, hasiera batean agidanez erabat bakuna zen arrazoi batekin: ikasketak amaitu zituztenetik ez dute elkar ikusi, eta elkartzeko aitzakia institutuko egunak gogoratzea eta trago batzuk hartzea da. Tsitsik, ordea, benetako arrazoi bat du ezkutuan: Guga zigortu nahi du, ikaskide guztiak sufriarazi baitzituen. Ikaskide ohi batzuk institutuan elkartuko dira edan eta hitz egiteko, eta, orduak igaro ahala, Tsitsi mozkortu eta bere misioa betetzen saiatuko da.
Euskal Herri post-apokaliptiko batean, bi anaia Marterako misio batean abiatuko dira, familiaren iraganean zeharreko road trip futurista batean. Txomin euskal arkeologo langabeak Marten azterlan bat egiteko enkargua jaso du. Gene anaia gidaria dela, Eibartik abiatuko dira Espainia iparraldean zeharreko abentura batean. Generen osasun makalak eta ezustean agertuko den lanbro toxiko batek, bidetik desbideratu eta arreba Milarengana eramango ditu protagonistak. Hiru haurrideak elkartzean, familia-kexa zaharrak piztu eta Generen osasunak okerrera egingo du. Mamu batzuek eta Jesu Kristok berak lagunduta, bi anaiek misioa burutu eta Martera iristea erabakiko dute.
Ninak ia 40 urte ditu. Erakargarria eta arrakastatsua da: senarrarekin konfiantzazko harreman egonkorra du, seme gazte bat dute eta bere lana ezin gustukoagoa da. Alabaina, dei batek apurtu egingo du egonkortasun atsegin hori. Ninaren mutil-lagun ohia, Ruslan, oso gaixo dago eta Tbilisira joateko eskatu dio, agian azkenekoz. Senarrari ez zaio axola, iraganeko harreman haren berri du. Nina hirira joango da (iraganean pozik bizi zen han), Ruslani adiskide gisa laguntzera. Ziur dago senarra maite duela eta laster itzuliko dela etxera. Baina bidaia sinple hori bere azken bidaia izango da.
Benetako gertakarietan oinarritutako drama errealista: Nina telebistako izar ospetsuari bat-batean bizitza aldatu zitzaionekoa, minbizia diagnostikatu eta beso bat galdu ondoren. Filmak ibilbide bat egiten du protagonistaren bizitzan zehar, bere garairik onenetik txarrenera arte. Ninak ezagutzen ez zuen mundu bat ezagutu eta ez du onartuko, baina mundu hartan bizi beharko du derrigorrean. Azkenean, minbizia zuen adiskide bat hil ondoren, sendatzeko itxaropen guztia galdu eta ez du nahiko tratamendurik. Alabaina, maite duten pertsonen maitasuna ikusi eta, azkenean, ohartuko da bizirik irautearen alde borrokatu behar duela, eta tratamendu esperimental bat onartuko du.
Mertek erdi-klaseko bizitza darama eta familiak Istanbulen duen apartamentuan bizi da bere katuarekin. Aita hilko zaio eta, senideek lagunduta, haren hileta Anatoliako (Turkia ipar-ekialdean) herrixka batean izatea erabakiko du, muino, baso eta te-plantazioz inguratuta. Alabaina, hileta normal baterako prestatzen egon beharrean, Mertek herrian emango dituen hiru egunetan, gertaera tragiko ugari jazoko dira eta bideo-joko baten mailak izango balira bezala egin beharko die aurre. Laster jakingo du, atsekabez, bere bizitzan lehendik zeuden arrailak gero eta zabal eta sakonagoak direla.
Ondorengoen babesarekin
Bideoak
Irudiak
Astelehenetik ostegunera: 09:00 - 15:00.
Ostiraletan: 10:00 - 14:00