Babesle
Ofiziala
Media
Partner

itxi
Bete formularioa zure datuekin, erregistratutako erabiltzaileentzako edukiak ikusteko
Sakatu hemen
Ez duzu pasahitza gogoratzen? Sakatu hemen

itxi


Oraindik ez duzu posta elektronikoa balioztatu. Posta elktroniko bat bidali dizugu, ondoko esteka sakatu behar duzu kontua balioztatzeko

Hemen zaude: Lehen orrialdea > 69. Edizioa 2021  > Berriak > 'Mediterráneo' eta 'Érase una vez en Euskadi' izango dira RTVEren galen protagonistak Donostia Zinemaldian
'Mediterráneo' eta 'Érase una vez en Euskadi' izango dira RTVEren galen protagonistak Donostia Zinemaldian
'Mediterráneo' Victoria Eugenia Antzokian estreinatuko da irailaren 23an, ostegunean

'Érase una vez en Euskadi' hilaren 22an, asteazkenean, aurkeztuko da Kursaal 2 aretoan
Astelehena, 2021(e)ko abuztuak 16

RTVEren partaidetza duten Mediterráneo eta Érase una vez en Euskadi filmek estreinaldia izango dute Donostia Zinemaldiaren 69. edizioan. RTVEk, Zinemaldiko babesle ofizialak, zinemaren alde emango du dena aurten ere, lehenik, Donostiatik egingo duen programazio berezi baten bidez, bigarrenik, Zinemaldian ikusiko diren beste film batzuetan parte hartuz, eta azkenik, RTVE-Beste Begirada Sariaren beste edizio bat dela medio.


'Mediterráneo'

Irailaren 23an, ostegunean, Donostia hiriko Victoria Eugenia Antzokian, Marcel Barrenak zuzendutako Mediterráneo estreinatuko da, Eduard Fernández, Dani Rovira, Anna Castillo, Sergi López, Àlex Monner eta Patricia López Arnaiz antzezleak direla protagonistak.

Filmak Open Arms GKEaren sorrera kontatzen du. Bizirik irauteko borroka bat erakusten digu, egunero gatazka armatuetatik ihesi itsasoratu eta euren bizia arriskuan jartzen duten milaka pertsonen egoera deskribatuta.


'Érase una vez en Euskadi'

Manu Gómez zuzendariaren Érase una vez en Euskadi lehen lana irailaren 22an −asteazkenean− iritsiko da Donostiako Kursaal 2 aretora.

Protagonistak 12 urteko lau haur dira, Asier Flores, Aitor Calderón, Miguel Rivera eta Hugo García, eta horien begiradaren bitartez 80ko hamarkadako Euskadi antzezten digu filmak. Horiekin batera, Marian Álvarez, Luis Callejo, María Isasi, Vicente Romero, Ruth Díaz, Arón Piper, Yon González eta Pilar Gómez antzezleak ere baditu.


RTVEren partaidetza duen zinema gehiago Donostian

Mediterráneo eta Érase una vez en Euskadi filmez gain, RTVEren partaidetza duten beste film batzuk ere aurkeztuko dira Donostia Zinemaldiko programazioan.

Horrez gain, Blanca Portillo eta Luis Tosar aktoreek antzeztutako eta Icíar Bollainek zuzendutako Maixabel eta Fernando León de Aranoaren El buen patrón −Javier Bardem protagonista duena− ere estreinatuko dira, baita Josefina ere, Javier Marcoren lehen filma, New Directors sailean lehiatuko dena.

La hija filmak lehiaketaz kanpo hartuko du parte Sail Ofizialean, Torontoko nazioarteko zinema-jaialdian izan ostean. Manuel Martín Cuenca da filmaren zuzendaria, eta Javier Gutiérrez eta Patricia López Arnaiz ditu protagonista nagusi.

Gastón Duprat eta Mariano Cohnek zuzendutako Competencia OficialPenélope Cruz eta Antonio Banderas ditu protagonista− koprodukzio argentinarrak irekiko du Perlak saila. Donostian izan aurretik, Veneziako Urrezko Lehoia lortzeko lehiatuko da eta Torontoko zinema-jaialdian parte hartuko du.


RTVE-Beste Begirada XV. Saria

Aurten ere RTVE-Beste Begirada Sariaren deialdia egingo da. Horren bidez, RTVE korporazioak emakumeen unibertsoaren inguruko gaiak jorratzen dituzten film luzeak aintzatesten ditu, emakumeek zuzendu, antzeztu edo idatziak badira, edo, gizonek zuzenduak ere, emakumeen munduarekin sentsibilitate berezia erakusten badute.

Saria lortzeko lehiatuko diren filmak Zinemaldiak aukeratuko ditu aurtengo edizioan estreinatuko direnen artean, eta laster emango da hautaketaren berri.


RTVE Play, zinema-plataformarik onena

Korporazioaren babesa RTVE Playrekin −RTVE A la carta ordezkatuko duen eskaripeko bideo-plataforma berriarekin− indartu da. Diseinu erakargarriagoa izateaz gain, funtzionalitate berriak txertatu ditu plataformak, guztiz doakoa da eta katalogo zabala du, etengabe zabaltzen dena.

Zinemak oso garrantzitsua da RTVEren OTT berrian; izan ere, bere partaidetza duten filmak eskaintzen ditu, nola nazionalak hala nazioartekoak, eta La 1 eta La 2 kateetan emandako eskaintzekin, erabiltzaileak edonoiz eta edozein gailuren bidez eskuragarri dituenak.


RTVE, beti zinemarekin

RTVEk 70 bat ekoizpenetan (film luzeak eta dokumentalak) parte hartzen du urtero; zuzendari ospetsuenenak ez ezik, talentu gazteenak ere izaten dira ekoizpenak, baita egile-zinemakoak ere. Telebistan ikusten den zinema espainiarraren ia % 85 RTVEk emititzen duenez, korporazioaren programazioko protagonistak dira film espainiarrak.

Gure herrialdeko jaialdirik garrantzitsuenak babesten ditu (Donostia, Seminci, etab.); Goya, Forqué eta Platino sarien ekitaldiak ematen ditu; RNE Sant Jordi sariak ematen ditu urtero; eta ‘Somos cine’ atarian Espainiako zinema doan eta irekian estreinatzearen alde egiten jarraitzen du.


RTVE Galak

 

Manu Gómez (Espainia)
Ekoizpeneko herrialdea(k): Espainia
Antzezleak: Asier Flores, Aitor Calderón, Hugo García, Miguel Rivera, Luis Callejo, Marian Álvarez, Vicente Vergara, Pilar Gómez, Vicente Romero, María Isasi, María Alfonsa Rosso, Arón Piper, Yon González, Josean Bengoetxea, Martxelo Rubio, Ruth Díaz

Euskadi 1985. Ikasturtea amaitu da, eta azkenean iritsi dira opor maiteak. Marcosek eta bere hiru lagunek, José Antoniok, Paquitok eta Tonik, uda noiz iritsiko irrikaz daude, uda oparoa, batez ere, hamabi urterekin apenas axola duelako non, noiz eta nola. Bizitzak utzi dien labirintoan barrena ibiliko dira, Euskadi zahar, borrokalari eta nahasi batean. Grafitiz beteta dauden eta gomazko pilotek eta askatasun-ametsek bertan errebotatzen duten hormez osatutako eta kooperatibetan aurrefabrikatutako zeru gris batez estalitako labirintoan barrena, non heriotzak eta bizitzak jada ez duten harreman formalik.


© Lucía Faraig
Marcel Barrena (Espainia)
Ekoizpeneko herrialdea(k): Espainia - Grezia
Antzezleak: Eduard Fernández, Dani Rovira, Anna Castillo, Sergi López, Alex Monner, Melika Foroutan, Giota Festa

2015eko udazkena. Bi sorosle, Òscar eta Gerard, Lesbosera (Grezia) abiatu dira Mediterraneoan itotako haur baten argazkiak hunkitu egin dituelako. Iristean, errealitate latza ikusiko dute: egunero, milaka pertsonak euren bizia arriskuan jartzen dute, gatazka armatuetatik ihesi itsasoa ontzi eskasetan zeharkatzen saiatzen baitira. Alabaina, inork ez du erreskate-lanik egiten. Esther, Nico eta taldeko beste kide batzuekin batera, misio bat betetzeko borrokatu eta laguntza emango diete behar dutenei. Horientzat guztientzat, hasierako bidaia hori bizitza aldatuko dien odisea izango da. Mediterráneo itsasoan bizirik irauteko borroka bat da, itsasoan (askotan ingurune zakar-zakarra), bizitza guzti-guztiak garrantzitsuak baitira.

Bereizmen handiko irudiak

Babesle Ofiziala
Media Partner
Laguntzaile Ofizialak:
Instituzio Kideak:
© Donostia Zinemaldia | Desarrollado por: Yo Miento Producciones
Webgune hau berezko eta kanpoko cookies-az baliatzen da, erabiltzaile gisa esperientzia hobea eskaintzeko. Informazio gehiago Onartzea