Raphaelismo Movistar+ plataformaren telesail dokumental originala irailaren 17tik 25era egingo den Donostia Zinemaldiaren 69. edizioan aurkeztuko da. Plataforman, ordea, 2022an estreinatuko da telesaila. Deskribapen intimo honek artistaren arrakasta, sekretu, beldur eta ametsetan sakontzen du, argitaratu gabeko ikus-entzunezko materialaren bidez; hala, Raphael bera, bere familia, RLM eta Universal Music Spain zuzenean inplikatzen dituen lehen dokumentala (eta bakarra) izango da. Movistar+ Gala igandean, irailaren 19an, egingo da Victoria Eugenia Antzokian, Raphael bertan dela, eta atal bat aurreratuko da, azken orduko albiste gisa.
Dadá Films & Entertainment etxeko Charlie Arnaiz eta Alberto Ortega – Anatomía de un Dandy (2020) filmagatik Goya sarira izendatuak– dira telesail dokumental honen sortzaileak, eta zuzendu eta ekoitzi ere egiten dute.
Lau ataleko proiektu honek baditu bi ezaugarri desberdin: batetik, Raphael bera inplikatu da; eta bestetik, familiak berak lagatako argazkien eta ikus-entzunezkoen artxibo argitaragabe handi baterako sarbidea izan dute zuzendariek. Raphaelek berak ez ezik, Natalia Figueroa emazteak eta Jacobo, Alejandra eta Manuel Martos hiru seme-alabek ere parte hartu dute telesailean, eta Raphaeli buruzko askoz ere ikuspegi intimo eta gizatiarragoa ematen dio horrek.
Telesaila, Movistar+ plataformara 2022an iritsiko dena, leku ugaritan filmatu da: Madril, Bartzelona, Málaga, Linares (Jaén), Tamajón eta El Cubillo de Uceda (Guadalajara), Benidorm (Alacant), Mexiko, Miami eta Los Angeles.
Raphaelismo Movistar+ plataformaren telesail dokumental originala da, Dadá Films & Entertainment eta Universal Music Spain taldeekin elkarlanean sortua.
Raphael, artista nekaezina, uraniozko artista, "indie buruzagia", "eskuz egindako azken artista", Francisco Umbralek esan zuen bezala, telebistara oraindik kolorea iritsi ez zenean Eurovisionen arrakasta izan zuen "hura", beti goizean egoten dena eta inoiz amore ematen ez duena, gibel-transplante baten ondoren in extremis berpiztu zena, polemika eta grinak pizten dituena... Baina, batik bat, 60 urte baino gehiago agertokietan eman ondoren, berezko termino bat sortzea lortu duen artista espainol bakarra: "raphaelismo". Telesail dokumental honek gure historia eta berea errepasatzen ditu irudi argitaragabe, birsortze, inoiz ikusi gabeko artxibo eta belaunaldien arteko elkarrizketen bidez, fenomeno eszeniko ikaragarri honen ertz guztiak argitzeko asmoz.