Las huellas de elBulli Ferran Adriàk zuzendutako jatetxeari buruzko filmaren mundu-estreinaldiak Culinary Zinema inauguratuko du, eta, halaber, Donostia Zinemaldiaren 69. edizio honetan ez-fikziozko beste hiru filmek ere mundu-estreinaldia izango dute: The Pursuit of Perfection, lau sukaldari japoniar ospetsu ezagutaraziko dituena; Reinventing Mirazur, Mauro Colagrecok gauzatutako berrasmatzearen berri emango diguna; eta Michelins Stars II: Nordic By Nature-k, Feroe uharteetako KOKS jatetxerako bisitaldi bat planteatuko digu. Délicieux / Delicious filmak ‒arreta sukaldaritzan ipintzen duen garaiko fikzioak‒ sailari amaiera emango dio.
Basque Culinary Centerreko zuzendari Joxe Mari Aizegak eta Donostia Zinemaldiko zuzendari Jose Luis Rebordinosek gaur goizean aurkeztu dituzte sailaren proiekzioak; bost afari tematiko ere hartuko ditu Culinary Zinemak.
Iñigo Ruiz eta José Larraza kazetariek Las huellas de elBulli Movistar+ plataformaren jatorrizko dokumentalaren mundu-estreinaldia aurkeztuko digute. Ferran Adriàren irudi peliedriko bat erakusten da filmean, non agerian uzten baitzaigu duela hamar urte Girona probintzian zuzentzen zuen jatetxea itxi zuen sukaldari katalanaren ibilbideak zenbaterainoko eragina izan duen eta izaten jarraitzen duen, gastronomiaren munduan ez ezik, beste diziplina batzuetako sortzaileengan ere bai. Ruizek sukaldaritzarekin lotutako hainbat film zuzendu ditu film berri honen aurretik, eta Larrazak ere esperientzia handia du nola dokumentalaren alorrean hala telebistan.
Délicieux / Delicious, Éric Besnard zinemagile frantziarraren filma, Culinary Zinema sailari Espainiako estreinaldi gisa amaiera emango diona, Frantziako Iraultzaren hasieran girotuta dago, eta noble batentzat lan egiten duen sukaldari batek bere lanbidearekiko zaletasuna galtzen duenean hasten da. Besnard gidoilari eta Ca$h (2008), 600 kilos d'or pur (2010) eta beste hainbat filmen zuzendariak Grégory Gadebois eta Isabelle Carré aktoreak izan ditu, besteak beste, bere film berriaren zerrendan, J'accuse (Roman Polanski, 2019) eta Marie Heurtin (Jean-Pierre Améris, 2014) filmetako antzezleak, hurrenez hurren.
Hainbat film labur zuzendu ondoren, Toshimichi Saitok The Pursuit of Perfection lanarekin egin du debuta film luzeen zuzendaritzan; filmak sukaldaritza japoniarra aztertzen du herrialde hartako gastronomiaren lau chef garrantzitsuenen begiradaren bidez: guztiek perfekzioa bilatzen dute, baina ikuspegiak ezberdinak dituzte, are kontrakoak.
Culinary Zinema Michelin Stars-Tales from the Kitchen (2017) lanarekin inauguratu ondoren, Rasmus Dinesen, gastronomiari eta beste gai batzuei buruzko dokumentalen zuzendaria, telesail dokumental baten bigarren atalarekin itzuliko da; oraingoan, Michelin Stars II: Nordic by Nature lanaren bidez, Danimarkako errealizadorea KOKSen sartuko da, Feroe uharteetako paraje natural batean kokaturiko jatetxe ospetsuan, hain zuzen, Ipar Atlantikoaren erdian.
Franck Ribière eta Vérane Frédiani frantziarrek Reinventing Mirazur zuzendu dute, Mauro Colagreco sukaldari argentinarra deskribatzen duen filma, chefaren sukaldaritza naturako energiekin estuki lotuta dagoela transmititzen diguna. Mentonen (Frantzia) Mirazur jatetxearen arduraduna da Colagreco, eta film luzeak kontatuko digu konfinamendutik nola berpiztu zen, ilargiaren faseetan funtsatutako menu harrigarri batekin. Filmak Donostian izango du mundu-estreinaldia. Errealizadoreek beste dokumental batzuk ere zuzendu dituzte, besteak beste, Steak (r)évolution / Steak (R)evolution (2014), Culinary Zinema sailean parte hartu zuena.
Sailean bildutako bost film luzeekin batera, afari tematikoak ere antolatuko dira Basque Culinary Centerren irailaren 20tik 24ra. Emanaldiak eta afariak barne hartuko dituzten sarrerak irailaren 6an jarriko dira salgai, 09:00etan, eta 70 euroren balioko dute; Zinemaldiaren eta Kutxabanken webguneetan egongo dira salgai. Filmetarako bakarrik balioko duten sarrerak irailaren 13tik aurrera jarriko dira salgai eta 7,90 euroko prezioa izango dute.
Nespresso Culinary Zinema sailaren babeslea da. Aurten, gainera, kolaboratzaile gisa sartu da sailean ASICI, Asociación Interprofesional del Cerdo Ibérico.
Afari tematikoak irailaren 20an hasiko dira inaugurazio-afari batekin, Las huellas de elBulli filmarekin lotuta eta Ferran Adriàren jatetxe iraultzailean lan egin zuten hiru sukaldeburu ohiek prestatuta: Eugeni de Diego eta Albert Raurich sukaldari nagusi ohiak eta Luis Arrufat elBulliko gozogintzako lehengo burua. Basque Culinary Centerreko Master eta Ikastaroen arloko chef koordinatzaile eta irakaslea den Arrufatekin batera, A Pluma jatetxeko Xef De Diegok eta Dos Palilloseko Xef Raurichek Ferranen sukaldaritzan zeharreko ibilbide gastronomiko bat egingo dute. Sormenean eta bikaintasunean oinarritua eta XX. mendeko itzal handienetakotzat jotakoa, haren ibilbidea xefaren historiako plater enblematikoen bitartez islatuko da inaugurazio-afarian. Ekitaldian izango dira, halaber, osatutako CXC (Castro Xatruch Casañas) taldeko zenbait kide; taldea, Oriol Castro, Eduard Xatruch eta Mateu Casañas sukaldariek osatzen dutena, eta denon artean 15 urteko esperientzia dute elBulliko sukaldeburu gisa.
Irailaren 21eko gau-ospakizuna lau eskuz prestatutako afari batekin girotuko dute, batetik, Paulo Airaudo sukaldari argentinarrak, Michelin izar bat duen Donostiako Amelia jatetxearen jabeak, eta, bestetik, Ignacio Echapresto Errioxako Venta Moncalvillo jatetxe izardunaren sukaldari autodidaktak. Leire Echaide Basque Culinary Centerreko baratzeko proiektuaren arduradunaren eta bertako produktuen ekarpena ere izango du afariak, baita Carlos Echapresto sommelierraren eta Venta Moncalvilloko upeltegiko ardoen ekarpena ere. Mauro Colagrecori eta bere jatetxeari eskainitako Reinventing Mirazur filmean islatutako aniztasuna eta kulturartekotasuna islatzen saiatuko da menua. Hiru Michelin izar ditu Colagrecoren jatetxeak eta The World's 50 Best Restaurants zerrendan lehen postua lortu zuen 2019an.
Hirugarren gaua eskandinaviar sukaldaritzari eta Feroe uharteen identitate eta kulturari buruzkoa izango da. Poul Andrias Ziska KOKS jatetxeko (Feroe Uharteak, Danimarka) sukaldeburua izango da afariko anfitrioia, plater bakoitzean Ipar Atlantikoko paisaiaren zaporea eta aroma jariatuko dituena. Horretarako, bere proposamena antzinako eta lurrekoa izanik garaikidea, fina eta osasuntsua ere baden sukaldaritzan oinarrituko du, eta zaporeak eta usainak uztartuko ditu antzinako osagaiak modu burutsu eta zirraragarrian konbinatuko dituzten platerak sortzeko. KOKSek bi Michelin izar ditu eta 2020an Jasangarritasunaren Michelin Sari berrien bidez aitorturiko lehen jatetxeetako bat da.
Irailaren 23a Yong Wu Nagahira Ikigai jatetxeko (Madril) sukaldariarekin sukaldaritzako "perfekzioaren bila joateko” unea izango da. Jatorri txinatar eta japoniarrekin Parisen jaioa, gastronomia-fusio bat interpretatzen du oso modu pertsonalean, non, prestatzen dituen plateren bidez, bere bizi-esperientziak adierazten baititu sukaldaritza japoniar, frantziar eta espainiarraren bitartez. Irailaren 23ko afariak chefaren proposamen fresko eta lasaiaren isla eskainiko du, hein batean, Cristina Lirola Basque Culinary Centerreko sukaldari eta gozogilearen parte-hartzeari esker ere bai.
Azken afaria gastronomiaren alorrean etorkizun handia duten hiru chef gaztek prestatuko dute: Lara Rodríguez, Kraken (Gijón) jatetxeko chefa, bere irudimenarekin eta sukaldaritza-estilo propio eta ausartarekin jolastuko da, Asturiaseko sukaldaritza munduko beste sukaldaritza batzuekin uztartuta, oso bisualak diren platerak prestatzeko. Bere ondoan egongo da Antonio Belotti Casa 887 jatetxeko (Donostia) sukaldaria, zeina bere eskola izandako sukaldeetara itzuliko baita, , bere gaur egungo gastronomia erakusteko, sentsibilitatean, tokiko produkturik onenean, prozesu tradizionalenetan eta errezeta autentikoenetan oinarrituta. Beste talentu berri batekin egingo dute hori, Lucía Fuentes Rodríguez 4OjosWines etxearen jabe eta sommelierrarekin; Fuentesek bere lurraldeko (Cádiz) boterearen adierazgarri diren eta Culinary Zinemaren hamaikagarren edizioari amaiera emango dion menu gozo-gozoarekin ezin sintonia hobea duten artisau-ardoen hautaketa batekin aberastuko du afaria.
Afariak segurtasun- eta higiene-protokolo zorrotz baten arabera diseinatu dira, covid-19ari aurre egiteko. Edukiera ere indarreko araudira egokitu da, eta mahaiak erreserben arabera osatuko dira, gomendatutako distantzia gordeta betiere.
|
Las huellas de elBulli ikuspegi poliedriko bat da, eta agerian uzten digu Ferran Adriàren ibilbideak nola eragin duen ‒eta eragiten jarraitzen duen‒, gastronomiaren munduan ez ezik, beste diziplina askoren sortzaileengan eta, oro har, iruditeria kolektiboan ere. 2021eko uztailean hamar urte bete dira munduko gastronomia betiko aldatu zuen ElBulli jatetxea itxi zutenetik. Ferran eta bere taldeak utzitako arrastoak ‒bizirik dirautenak‒ marrazteko unea iritsi da. Askorentzat adierazgarria izango da jakitea egungo kultura gastronomikoaren berezko zenbat gauza atera diren Girona probintziako kala urrun batean ezkutatutako etxe hartatik.
Frantzia, XVIII. mendea. Frantziako Iraultzaren hasieran, nobleziako leinu baten ospea duen mahaiaren kalitatearen araberakoa da batik bat. Chamforteko Dukeak Manceron kaleratzen duenean, sukaldari talentudunak janaria prestatzeko zaletasuna galdu eta landetxera itzultzea erabakiko du. Han ezagutuko duen Louise misteriotsuak sukaldaritzarekiko pasioa itzuli eta Frantziako lehen jatetxea irekitzen lagunduko dio.
Feroe uharteak antzinako mikrokosmos bat dira, non askotariko gauzak dauden: produktu zirraragarriak, historia nordikoa, 37 hitz laino esateko eta are hitz gehiago hartzidura adierazteko, arrain-industria hazkor bat, ur-jauzi bikainak, pertsona bitxiak, jatorrizko hizkuntza bat eta sukaldaritza-altxor bat: KOKS. Nola kudea daiteke lehen mailako jatetxe bat hain leku isolatu batean? Covid-19a baino lehen, jendeak sekulako desbideratzeak hartzen zituen KOKSen afaltzeko, eta bertako platerak 500 milia karratu soiletatik hartutako produktuetan funtsatzen dira, lur malkartsu batean gainera, non klima subpolarra, haizetsua, hezea, hodeitsua eta hotza den eta urtean zeharreko batez besteko tenperatura, berriz, izozte-tenperaturatik gertukoa, eta etengabeko argia dagoen udan eta iluntasun itogarria, berriz, negu osoan. Nordic by Nature filmean Poul Andrias Ziska sukaldari gaztearen buru poetikoan murgilduko gara, eta munduko goi-mailako sukaldaritzako jatetxerik urrunenak ezkutatzen dituen tradizio, historia eta ohitura zahar eta berezien bila joango gara.
Mirazur, Mauro Colagreco sukaldari argentinarraren jatetxea, hiru Michelin izar dituena eta Frantziako kostalde mediterraneoan kokatua, Munduko Jatetxerik Onena aukeratu zuten pandemiaren aurretik. Bertan gozo gelditu ordez, Colagrecok eta bere askotariko taldeak borrokan jarraitu zuten konfinamenduak eragindako tragedia globalean, jatetxearen kontzeptua eta jatetxeko menua ausarki berrirudikatuz printzipio biodinamikoei eskainitako dedikazioa islatu nahian. Mirazur ikuspegi berri eta gogotsu batekin berpiztu zen: Ilargi Menua.
Arreta gaurko lau chef japoniar garrantzitsuenengan jarrita, janari japoniarraren kultura sofistikatu eta bereziaren atzeko egia aztertzen du dokumental honek. Sukaldari bakoitzak zehatz-mehatz prestatzen ditu bere platerak perfekzioaren bila, baina ikuspegi desberdinak dituzte, are kontrakoak. Chef bakoitzak bere sustrai eta sinesmenak ditu: batzuek garapen espirituala edo sormen estetikoa bilatzen dute, eta beste batzuek, berriz, kalitate handiko osagaiak, tokiko hornitzaileekin harreman estuak ezarrita. Nola islatzen dira chef horien nortasunak eta ahaleginak sortzen dituzten maisulanetan? Mundu-ospe handiko adituek eta gastronomoek sukaldari japoniar horien bilaketa amaigabeak ezkutatzen dituen istorioen sakonera eramango ditu ikus-entzuleak. Lau chef hauen bidez, ikasiko dugu Tokio munduko hiri gastronomiko bikainenetako bat dela.
EGITARAUA |
|
|
|
|
|