Babesle
Ofiziala
Media
Partner

itxi
Bete formularioa zure datuekin, erregistratutako erabiltzaileentzako edukiak ikusteko
Sakatu hemen
Ez duzu pasahitza gogoratzen? Sakatu hemen

itxi


Oraindik ez duzu posta elektronikoa balioztatu. Posta elktroniko bat bidali dizugu, ondoko esteka sakatu behar duzu kontua balioztatzeko

Hemen zaude: Lehen orrialdea > 69. Edizioa 2021  > Berriak > Hamaika film lehiatuko dira RTVE-Otra Mirada XV. Sarirako Donostia Zinemaldian
Hamaika film lehiatuko dira RTVE-Otra Mirada XV. Sarirako Donostia Zinemaldian
Sail Ofizialeko lau film, New Directors Saileko film bat, Horizontes Latinos Saileko film bat, Zabaltegi-Tabakalerako bi film eta Perlak saileko hiru film lehiatuko dira

RTVEko Berdintasun Behatokiko presidente Concepción Cascajosak, Anna Castillo aktoreak eta Rosa Zufia kazetariak osatuko dute Epaimahaia Sariak emakumeen mundutik gertuko gaiei buruzko zinema aitortzen du eta irailaren 25ean (larunbatean) entregatuko da, Zinemaldiaren amaierako galan
Astelehena, 2021(e)ko irailak 13

Hamaika film lehiatuko dira RTVE-Otra Mirada XV. Saria eskuratzeko Donostia Zinemaldiaren 69. edizio honetan, irailaren 17tik 25era. Korporazioak urtero entregatzen die golardo hori Zinemaldiko film luzeen artean emakumeen mundutik gertuko gaiei heltzen dietenei, emakumeek zuzendu, antzeztu edo idatzitakoei edo, gizonen filmak izanik, emakumeen munduari sentsibilitate berezia erakusten diotenei.

Aurtengo epaimahaia honako hauek osatuko dute: Concepción Cascajosa. RTVEko Berdintasun Behatokiko presidente eta Korporazioko aholkularia; Anna Castillo aktorea (Mediterráneo, Zinemaldian aurkeztua, La llamada, Viaje al cuarto de una madre, Estoy vivo, etab.); eta Rosa Zufia kazetaria, EITBn, Tabakalera Kultura Garaikidearen Nazioarteko Zentroan eta beste hainbat erakundetan lan egin duena.


Hamaika hautagaiak

Sail Ofizialetik, lau film lehiatuko dira sari hori lortzeko: Du Som Er I Himlen / As In Heaven, Tea Lindeburgena (Danimarka); Crai Nou / Blue Moon, Alina Grigorerena (Errumania); Camila saldrá esta noche / Camila Comes Out Tonight, Inés Barrionuevorena (Argentina), eta Maixabel, Iciar Bollaínena (Espainia).

New Directors Sailari dagokionez, berriz, Lena Lanskhinen (Errusia) The Unwanted / Nich’ya lehiatuko da, eta Horizontes Latinos sailaren barnean, aldiz, Tatiana Huezoren (Mexiko, AEB, Uruguai, Alemania eta Qatar) Noche de fuego.

Zabaltegi-Tabakalerari gagozkiola, bi film hauek ariko dira lehian: Cenzorka / 107 Mothers, Peter Kerekesena (Eslovakia-Ukraina) eta Razzhimaya Kulaki / Unclenching the Fists, Kira Kovalenkorena (Errusia). Bestalde, Perlak Saileko pelikula hauek izango dira hautagai: Benedetta, Paul Verhoevenena (Frantzia eta Herbehereak); Ouistreham / Between Two Worlds, Emmanuel Carrèrerena (Frantzia); eta Titane, Julia Ducournaurena (Frantzia-Belgika).

Aurreko edizioetan bezalaxe, sariak antena-eskubideak bereganatzea ekarriko dio film irabazleari. Zinemaldiak berak hautatuko ditu golardoa lortzeko lehian ariko diren pelikulak, aurtengo edizioan estreinatuko direnen artean betiere. Iaz Eliza Hittmanen (Erresuma Batua eta AEB) Never Rarely Sometimes Always filmak eraman zuen saria.

RTVEk, Donostia Zinemaldiaren Babesle Ofizialak, aurten ere  ahalegin guztia egingo du, programazio berezi bat ezarriz nola bere kanal guztietan hala RTVE Play plataforman, Gipuzkoako hiriburutik, baita Zinemaldian erakutsiko diren filmetan parte hartuz ere: Maixabel eta El buen patrón / The Good Boss (biak Urrezko Maskorra eskuratzeko hautatuak), La hija / The Daughter, Josefina / Josephine eta Competencia oficial / Official Competition.

Halaber, Érase una vez en Euskadi / Once Upon a Time in Euskadi eta Mediterráneo / Mediterraneo: The Law of the Sea lanak Korporazioak Zinemaldiaren esparruan irailaren 22 eta 23rako antolatu dituen bi galatan estreinatuko dira.

 

SAIL OFIZIALA 
© Marcel Zyskind
Du som er i himlen / As in Heaven
Tea Lindeburg (Danimarka)
Ekoizpeneko herrialdea(k): Danimarka
Antzezleak: Flora Ofelia Hofmann Lindahl, Ida Cæcilie Rasmussen, Palma Lindeburg Leth, Anna-Olivia Øster Coakley, Flora Augusta, Kirsten Olesen, Lisbet Dahl, Stine Fischer Christensen, Thure Lindhardt, Albert Rudbeck Lindhardt

XIX. mende amaierako egun batean betiko aldatuko da Lise 14 urteko neskaren bizitza. Bere neba-arrebetatik zaharrena da, bere familiako lehena da eskolara joaten eta itxaropenez eta konfiantzaz beteta ikusten du etorkizuna. Baina ama erditzen ari dela, badirudi gaizki doala zerbait. Gaua ilundu eta erditzeak aurrera egin ahala, Lise ulertzen hasiko da balitekeela etxekoandre gisa amaitzea neska koskor gisa hasi zuen eguna. 


Crai nou / Blue Moon
Alina Grigore (Errumania)
Ekoizpeneko herrialdea(k): Errumania
Antzezleak: Ioana Chitu, Mircea Postelnicu, Mircea Silaghi, Vlad Ivanov

Emakume gazte batek gizatasuna galtzeko prozesuan izandako bilakaera psikologikoa azaltzen digu filmak. Goi-mailako hezkuntza lortzeko eta bere familia disfuntzionalaren indarkeriatik ihes egiteko borrokan ari da Irina. Artista batekin izandako esperientzia sexual anbiguo bat izango da familiaren indarkeriari aurre egiteko akuilua.


Camila saldrá esta noche / Camila Comes Out Tonight
Inés Barrionuevo (Argentina)
Ekoizpeneko herrialdea(k): Argentina
Antzezleak: Nina Dziembrowski, Maite Valero, Diego Sánchez, Adriana Ferrer, Guillermo Pfening

Camilak Buenos Airesera joan beharko du bizitzera amona larriki gaixotzen zaionean. Bere lagunak eta eskola publiko liberala atzean utzi eta ikastetxe pribatu tradizional batean sartuko da. Camila basatia baina heldugabea da, eta izaera hori dela-eta, zailtasunak izango ditu.


Maixabel
Iciar Bollaín (Espainia)
Ekoizpeneko herrialdea(k): Espainia
Antzezleak: Luis Tosar, Blanca Portillo, Urko Olazabal, María Cerezuela

2000. urtean, Maixabel Lasaren senarra, Juan María Jáuregui hil zuen ETAk. Hamaika urte geroago, ezohiko eskaera bat jaso zuen: bere senarra hil zuten gizonetako batek berekin hitz egiteko eskatu zion Langraiz Okako espetxean (Araba), zigorra betetzen ari deneko kartzelan, talde terroristarekin zituen harremanak eten ostean. Zalantzak zalantza eta atsekabe handia izan arren, Maixabel Lasak onartu egin zuen aurrez aurre ikustea 16 urte zituenetik bere bikote izandakoa hil zuten pertsonekin. "Mundu guztiak merezi du beste aukera bat", erantzun ohi du emakumeak galdetzen diotenean zergatik erabaki zuen hitz egitea bere senarra hil zuen gizonarekin.


NEW DIRECTORS
Nich’ya / Unwanted
Lena Lanskih
Ekoizpeneko herrialdea(k): Errusia
Antzezleak: Olga Malahova, Vladimir Shabelnikov, Tatiana Tihmeneva, Slava Baranov, Ivan Ivashov, Tatiana Vorotnikova

Vikak 14 urte ditu eta Uraletako eskualde errusiarreko hiri txiki batean bizi da, hiriburutik kanpo. Basoan, hezeguneetan hazten diren fruituak bildu eta amari laguntzen dio kaleko merkatu batean fruitu horiek saltzen. Eskolako koreografia-eskolak gustatzen zaizkio. Eta haurtxo bat dauka, baina inork ez luke sekula horren berri izan beharko.


Noche de fuego / Prayers for the Stolen
Tatiana Huezo (El Salvador - Mexico)
Ekoizpeneko herrialdea(k): Mexiko - Alemania - Brasil - Qatar
Antzezleak: Ana Cristina Ordóñez González, Marya Membreño, Mayra Batalla

Mexikoko mendietan kokaturiko herri bakarti batean, neskatoek mutilen tankerara mozten dute ilea eta lurpean ezkutalekuak dituzte. Anak eta bere bi lagun onenek ihesitako pertsonen etxeak okupatu eta emakumez mozorrotzen dira inork ikusten ez dituenean. Magia eta alaitasunezko unibertso zeharkagaitz batean bizi dira; bien bitartean, amek esklabo edo mamu bihurtzen dituztenengandik ihes egiteko prestatzen dituzte. Baina, egun batean, nesketako bat ez da ezkutalekura garaiz iritsiko.


ZABALTEGI-TABAKALERA
Cenzorka / 107 Mothers
Péter Kerekes (Eslovakia)
Ekoizpeneko herrialdea(k): Eslovakia - Txekiako Errepublika - Ukraina
Antzezleak: Maryna Klimova, Iryna Kiryazeva, Lyubov Vasylyna

Lesyak pasio-hilketa bat gauzatu du eta zazpi urte Odesako emakume-zentzategi batean igarotzeko zigorra ezarri diote. Lehen umea erditu berri, soilik emakumez osatutako mundu batean sartu da: presoak, erizainak eta zaindariak, adin guztietako emakumeak, emazteak eta alargunak, alabak, ahizpak, arrebak, haurdunak eta seme-alabak dituzten emakumeak. Uniformearen koloreagatik ez balitz, batzuetan zaila izango litzateke bakoitza nor den zehaztea.


Razzhimaya kulaki / Unclenching the Fists
Kira Kovalenko (Errusia)
Ekoizpeneko herrialdea(k): Errusia
Antzezleak: Milana Aguzarova, Alik Karaev, Soslan Khugaev, Khetag Bibilov, Arsen Khetagurov, Milana Pagieva

Ipar Osetiako mendietan, harkaitz malkartsuen artean, Mizur meatze-herri txikia dago. Jazoera dramatiko batzuen ondorioz, Zaur horra joan zen bizitzera seme-alaba Ada, Akim eta Dakkorekin. Zaur aita zorrotza da, diziplina da beretzat garratzitsuena, eta ez da gai zaintza eta gehiegizko babesa bereizteko. Seme nagusiak, Akimek, jada ihes egin zuen aitarengandik Rostovera −Mizurretik gertueneko hirira− lan egitera joan zenean. Akimen anaia gazteak, Dakkok, oraindik ez du erabaki zer nahi duen egin bizitzan, eta arreba, Ada, aktiboki ari da ihesaldia prestatzen. Jada emakumea bada ere, aitak ume gisa tratatzen jarraitzen du. Ada laster konturatuko da oso zaila izango zaiola aitarengandik ihes egin eta bizitza berri bat hastea. Akim itzultzean, argitara aterako dira familia-traumak, oraindik sendatzeke daudenak, sekula ez baitute horiei buruz hitz egin.


PERLAK
Benedetta
Paul Verhoeven (Herbehereak)
Ekoizpeneko herrialdea(k): Frantzia- Herbehereak
Antzezleak: Virginie Efira, Charlotte Rampling, Daphné Patakia, Lambert Wilson, Olivier Rabourdin

XV. mendearen amaieran, izurritea herrialdea suntsitzen ari dela, Benedetta Carlini Pesciako komentuan (Toscana) sartuko da nobizia gisa. Benedettak gazte-gaztetatik mirariak egiteko gaitasuna izan du; komunitatera iritsi eta berehalako eragina izango du, transzendentala.


Ouistreham / Between Two Worlds
Emmanuel Carrère (Frantzia)
Ekoizpeneko herrialdea(k): Frantzia
Antzezleak: Juliette Binoche, Didier Pupin, Emily Madeleine, Evelyne Porée, Hélène Lambert, Léa Carne

Marianne Winckler autore ezagunak lan-kolokatasunari buruzko liburu bat idaztea eta errealitate hori bertatik bertara bizitzea erabaki du. Horretarako, nortasuna ezkutatuz Normandiako (Frantzia iparraldean) herri batean garbitzaile-lana lortu eta gizarteko gainerakoek ezagutzen ez duten bizitza bat ezagutuko du, non irabazitako eta gastatutako euro oro garrantzitsua baita. Esperientzia gogorra bada ere, lankideen arteko solidaritateak adiskide bihurtuko ditu Marianne eta lankideak. Elkarri laguntzeak adiskidetasuna dakar, eta adiskidetasunak, konfiantza. Baina zer gertatuko zaio konfiantza horri egia argitara ateratzen denean?


Titane
Julia Ducournau (Frantzia)
Ekoizpeneko herrialdea(k): Frantzia
Antzezleak: Agathe Rouselle, Vincent Lindon
Lehiaketatik kanpo

Esplikaziorik gabeko krimen batzuen ondoren, aita batek duela 10 urte desagertutako semea aurkituko du berriz. TITANIOA: bero eta korrosioari erresistentzia handia dion metala, egoki-egokia aleazio erresistenteetarako.


© Donostia Zinemaldia | Desarrollado por: Yo Miento Producciones
Webgune hau berezko eta kanpoko cookies-az baliatzen da, erabiltzaile gisa esperientzia hobea eskaintzeko. Informazio gehiago Onartzea