Babesle
Ofiziala
Media
Partner

itxi
Bete formularioa zure datuekin, erregistratutako erabiltzaileentzako edukiak ikusteko
Sakatu hemen
Ez duzu pasahitza gogoratzen? Sakatu hemen

itxi


Oraindik ez duzu posta elektronikoa balioztatu. Posta elktroniko bat bidali dizugu, ondoko esteka sakatu behar duzu kontua balioztatzeko

Hemen zaude: Lehen orrialdea > 69. Edizioa 2021  > Berriak > Igandean jarriko dira salgai Donostia Zinemaldiaren 69. edizioko sarrerak
Igandean jarriko dira salgai Donostia Zinemaldiaren 69. edizioko sarrerak
Hilaren 12an ‘online’ erosi ahalko dira lehen hiru jardunaldietarako txartelak
Ostirala, 2021(e)ko irailak 10

Iaz bezala, covid-19aren pandemiak Zinemaldia egokitzera behartu du, bi helburu nagusi lortze aldera: lehenik eta behin, gune seguru bat sortzea, eta bigarrenik, ahalik eta zinema-esperientzia atseginena proposatzea. Infekzio-fokuak saihesteko eta trazabilitatea errazteko, sarreren aldez aurreko salmenta online baino ez da gauzatuko, Zinemaldiaren eta Kutxabanken webgunearen bidez. Hilaren 17tik aurrera sarrerak erosi ahal izango dira zinema-aretoetako leihatiletan.

Zinemaldiak berriro salmenta mailakatua gauzatzea erabaki du. Ohi bezala, sarreren salmenta Zinemaldiaren aurreko igandean hasiko da, irailaren 12an (9:00etan), baina Zinemaldiaren lehen hiru egunetarako sarrerak baino ezingo dira erosi (17a –ostirala–, 18a –larunbata– eta 19a –igandea–). Hilaren 13an, berriz, 20rako, 21erako eta 22rako (astelehena, asteartea eta asteazkena, hurrenez hurren) sarrerak erosi ahal izango dira, baita aurreko egunetako gainerako sarrerak ere. Hilaren 14an, azkenik, 23ko, 24ko eta 25eko –hurrenez hurren, osteguna, ostirala eta larunbateko– saioetarako txartelak erosi ahalko dira, baita aurreko egunetako gainerako sarrerak ere. Hilaren 15etik aurrera, saio guztietarako sarrerak erosten jarraitu ahal izango da. Ikus-entzule bakoitzak gehienez bi sarrera erosi ahal izango ditu saio bakoitzeko, eta erosketa bakoitzean gehienez 20 txartel.

Aurretiko salmentan, Kutxabankeko Gazte txartelarekin bakarrik egingo dira deskontuak. Donostia Zinemaldiko leihatila guztietan deskontua egingo zaie Donostia Kulturako erabiltzaileei. Azkenik, Zinemaldiak egunero eskainiko dizkie sarrerak % 50eko deskontuarekin postako zerrendan harpidetzen diren pertsonei, eta egunero emango zaie horien eskuragarritasunaren berri.

Zinemaldiak gogorarazten du maskara uneoro erabiltzea derrigorrezkoa izango dela. Emanaldia lau ordutik gorakoa bada (adibidez, La Fortuna telesailaren emanaldiak), derrigorrezkoa izango da maskara profesional homologatu bat eramatea (FFP2 edo KN95), Osasun Sailak emandako aginduan egoera berezietarako ezarritakoari jarraikiz.

Zinemaldiak hartutako beste neurri batzuk:

  • Edukiera txikiagoak izango dituzte aretoek: Kursaalean, Victoria Eugenia Antzokian eta Antzoki Zaharrean % 50ekoa izango da; eta gainerako zinema-aretoetan (Tabakalera, Trueba, Príncipe eta Antiguo Berri), berriz, % 60koa. Edukiera-murrizketa hori Zinemaldiko jarduera guztietan aplikatuko da (prentsaurrekoak, argazki-saioak, aurkezpenak, etab.).
  • Emanaldien kopurua txikiagoa izango da (2019an baino 124 emanaldi gutxiago, 2020an baino 28 gehiago), baita filmena ere (2019an baino 29 gutxiago, 2020an baino 33 gehiago), sarbide ordenatuagoak ahalbidetzeko eta husteko denbora irabazteko.
  • Zinema-aretoak desinfektatu egingo dira saioen artean. 
  • Belodromoa eta ekitaldi sozialak (inaugurazio- eta itxiera-jaiak, euskal zinemaren jaia) bertan behera utziko dira.
  • Publikorik gabe egongo dira alfonbra gorriak: zoritxarrez, aurten ere zinemazaleek ezingo dizkiete autografoak eskatu izarrei, ezta horien zain egon ere argazki-saioetan eta alfonbra gorrietan. Profesionalek baino ezingo dituzte erabili gune horiek; zehazki, berri-emaile grafikoak ibilbidean zehar egongo dira, eta derrigorrezko distantzia fisikoari eutsiko diote.
  • Programazioa online ipiniko da. Egunero argitaratuko da online egongo den programazioa: Sail Ofizialeko eta Donostia Sarietako prentsaurreko guztiak, zinema-industriako profesionalen galak, aurkezpenak eta eskola magistralak.
 

© Donostia Zinemaldia | Desarrollado por: Yo Miento Producciones
Webgune hau berezko eta kanpoko cookies-az baliatzen da, erabiltzaile gisa esperientzia hobea eskaintzeko. Informazio gehiago Onartzea