Babesle
Ofiziala
Media
Partner

itxi
Bete formularioa zure datuekin, erregistratutako erabiltzaileentzako edukiak ikusteko
Sakatu hemen
Ez duzu pasahitza gogoratzen? Sakatu hemen

itxi


Oraindik ez duzu posta elektronikoa balioztatu. Posta elktroniko bat bidali dizugu, ondoko esteka sakatu behar duzu kontua balioztatzeko

Hemen zaude: Lehen orrialdea > 69. Edizioa 2021  > Berriak > Besarkadak eta Marion Cotillardi emango zaion Donostia Saria izango dira protagonistak Zinemaldiaren inaugurazio-ekitaldian
Besarkadak eta Marion Cotillardi emango zaion Donostia Saria izango dira protagonistak Zinemaldiaren inaugurazio-ekitaldian
Jon Mayak zuzenduko ditu oraingoan ere galak Harkaitz Cano eta Ane García gidoilariek eta Luis Mari Moreno Urretavizcaya Pirata musikariak lagunduta
Asteazkena, 2021(e)ko irailak 15

2020an distantziaren kontzeptua izan zen inaugurazio-galaren ardatza, baina urtebete geroago, Marion Cotillard aktore frantziarrak jasoko duen Donostia Sariarekin batera, besarkadak izango dira Donostia Zinemaldiaren 69. edizioaren hasierako protagonistak Kursaal Auditoriumean.

Bigarren urtez jarraian, Jon Maya dantzari eta koreografoak inaugurazio-gala eta amaierako gala zuzenduko ditu, baita Johnny Deppi Donostia Saria emateko gala eta Euskal Zinemaren gala ere. Berriz ere, Harkaitz Cano idazlea izango da gidoilaria, oraingo honetan Ane Garcíak lagunduta, eta aurten ere Luis Mari Moreno Urretavizcaya Pirata jardungo da musika-zuzendari.

Elena Iruretak, Asier Etxeandiak, Anne Igartiburuk eta Cayetana Guillén Cuervok ezustekoz beteriko gala bat aurkeztuko dute, non berariaz aipatuko baitira pandemiak debekatu zizkigun besarkadak. Kukaiko dantzariek, halaber, pieza koreografiko ugari egingo dituzte, baita Zea Mays taldeak musika-emanaldiak ere, Rozalének, Etxeandiak berak eta beste zenbait musikarik lagunduta.

"Diotenez, jatorrian, besarkadaren garapena edo ordezkoa izan zen txaloa: urrun dagoena besarkatzeko modurik ez dugulako jotzen diogu txalo. Besarkatu nahi genukeenari jotzen diogu txalo, alegia. Gustatuko litzaiguke irekiera galak berak, eta Zinemaldiko film bakoitzak, nahi baino gehiago atzeratzen ari zaigun besarkada horretara iristeko falta zaigun tartea txikitzen laguntzea", adierazi du Harkaitz Canok. 
Orobat, Marion Cotillardi Donostia Saria emango zaio zeremoniaren amaieran, bere ibilbide luzea aintzateste aldera, baina horretarako ez ezik, zeremoniak Zinemaldiarekin estuki lotuta zeuden bi pertsona omentzeko ere balioko du, hil eta gutxira: Batetik, Luis Gasca, 70eko hamarkadaren amaieran eta 80ko hamarkadaren hasieran Zinemaldiaren zuzendaria izan zena; eta bestetik, Bertrand Tavernier zinemagilea. Aurten, gainera, FIPRESCI Sari Nagusia berreskuratu eta Días de Cine TVEko programak telebistan daramatzan hiru hamarkadak aitortuko dira.

Carlos Saura zinemagileak Rosa rosae. La Guerra Civil / Rosa rosae. A Spanish Civil War Elegy film laburra aurkeztuko du, zeina lehiaz kanpo emango baita, Sail Ofizialean lehiatuko den lehen film luzea –Zhang Yimouk zuzendutako Yi miao zhong / One Second– eman aurretik. Gala Televisión Española katearen La 2 kanalean, ETB1 kanalean, eitb.eus atarian eta Zinemaldiko webgunean emango dira zuzenean.


Antonio Banderas eta Emmanuel Carrère Zinemaldian izango dira

Antonio Banderas eta Cécile de France aktoreek Zinemaldiaren inaugurazio-egunean parte hartuko dutela baieztatu dute. Hona hemen 69. ediziora joango direla aurretik baieztatu duten beste pertsona batzuk: Javier Bardem, Jessica Chastain, Marion Cotillard, Penélope Cruz, Johnny Depp, Emmanuelle Devos, Dolores Fonzi, Charlotte Gainsbourg, Louis Garrel, Vincent Lindon, T'Nia Miller eta Simon Rex. Jason Isaacsek, aldiz, adierazi du ezingo duela Zinemaldira etorri agenda-arrazoiak direla eta.

Noémie Merlant aktore eta zuzendaria eta Xavier Giannoli zinemagilea ere ezin izango dira Donostiara etorri, baina Emmanuel Carrère euren filmak Donostian aurkeztuko dituzten zinemagileen zerrendan sartuko da: Sean Baker, Laurent Cantet, Xavier Giannoli, Lucile Hadzihalilovic, Ryusuke Hamaguchi, Radu Jude, Kira Kovalenko, Joachim Lafosse, Gaspar Noé, Todd Haynes, Carlos Saura, Céline Sciamma, Claire Simon eta Paolo Sorrentino, besteak beste. Emakumezko zuzendarien dagokienez, hauek dira nabarmentzekoak: Cannesko Urrezko Palmorriaren irabazle Julia Ducournau, Titane bere filma Perlak sailean aurkeztuko duena; Veneziako Urrezko Lehoiaren irabazle Audrey Diwan, Epaimahai Ofizialeko kide gisa arituko dena; eta Urrezko Maskorraren azken irabazle eta Epaimahai Ofizialeko buru Dea Kulumbegashvili.

 

Babesle Ofiziala
Media Partner
Laguntzaile Ofizialak:
Instituzio Kideak:
© Donostia Zinemaldia | Desarrollado por: Yo Miento Producciones
Webgune hau berezko eta kanpoko cookies-az baliatzen da, erabiltzaile gisa esperientzia hobea eskaintzeko. Informazio gehiago Onartzea