Kultura eta Kirol Ministerioak, Zinematografiaren eta Ikus-entzunezko Arteen Espainiako Erakundearen (ICAA) bitartez, eta Ekonomia Gaietarako eta Eraldaketa Digitalerako Ministerioak, ICEXen bitartez, Malagako zinema-jaialdiarekin, Donostia Zinemaldiarekin eta dagozkien udalekin batera, 'Spanish Screenings XXL. Espainiako ikus-entzunezko ekoizpenari zuzendutako nazioarteko merkatua' aurkeztu dute gaur.

'Espainia, Europako Ikus-entzunezkoen Huba' planean kokatzen da proiektua; 2021eko martxoan aurkeztu zuten, 2025erako Espainia Digitala programaren ardatz gisa, eta helburu du ikus-entzunezko ekoizpena bultzatzea, inbertsioa eta jarduera ekonomikoa erakartzea eta sektoreko enpresak eta profesionalak indartzea, haien lehiakortasuna hobetze aldera. Era berean, 25. osagaia da ('Espainia, Europako Ikus-entzunezkoen Huba') Suspertze, Eraldatze eta Erresilientzia Planaren 'Kultura-industriaren eta kirolaren sustapena' izeneko IX. politika bultzatzailean; zehazki, Espainiako ikus-entzunezko sektorea nazioartekotzeko programan.

Espainiako Zinematekaren Doré zinema-aretoan egin da ekitaldia, eta bertan izan dira Nadia Calviño, Espainiako Gobernuko lehen presidenteordea eta Ekonomia Gaietarako eta Eraldaketa Digitalerako ministroa, eta Miquel Iceta, Kulturako eta Kiroleko ministroa.

Gainera, mahai-inguru bat egin da, ICAAko zuzendari nagusi Beatriz Navasek zuzendua, eta honako hauek egon dira parte-hartzaileen artean: Malagako eta Donostiako alkateak, Francisco de la Torre eta Eneko Goia, hurrenez hurren; ICEXeko kontseilari delegatua, María Peña; Malagako zinema-jaialdiko zuzendaria, Juan Antonio Vigar, eta Donostia Zinemaldiko zuzendaria, José Luis Rebordinos.

Lau atalek osatzen dute Spanish Screenings XXL proiektua:

Martxoaren 21etik 24ra, Spanish Screenings Content merkatua egingo da Malagako zinema-jaialdian, orain arte egin den moduan. Gainera, azpiatal hauetara zabalduko da: Talent, Adaptations, Remakes, Koproduzioko Foroa eta gorabidean dauden plataformetarako (podcastak, Twich, TikTok eta formatu alternatiboak eta disruptiboak) ikus-entzunezko eduki berrien Huba.

Donostia Zinemaldiak nazioarteko inbertitzaile eta talentuen agente garrantzitsuenak erakartzeko jardunaldiak egingo ditu irailaren 17aren eta 25aren artean. Horrez gain, ikus-entzunezkoei aplikatutako teknologia berriak eta I+G+Bren garapena sustatuko ditu, baita horien balioa nabarmendu ere.

Horrela, jarraipena emango dio 2018an hasitako Zinemaldia & Technology ekimenari. Horren bidez, teknologiaren eta ikus-entzunezkoen arteko lotura sendotzeko erreferente izatera iritsi nahi du Zinemaldiak, eta aurrerapen teknologiko berriak ez ezik, sorkuntzarako eta negoziorako ematen dituzten aukerak ere ezagutzera eman.

Spanish Screenings marka nazioartean indartzeko asmoz, Espainiako ikus-entzunezkoak saltzera eta sustatzera bideratutako ekintza ibiltariak egingo dira lurralde estrategikoetan, hala nola Ekialdeko Europan eta Asian. Halaber, sustatu egingo dira aipatutako zinema-jaialdiak, jaialdi horiek hartzen dituzten hiriak eta gure kultura-industria, oro har.

Era berean, urte osoan aktibo egongo den merkatu bat ezarri nahi da, sustapenerako eta negoziorako plataforma birtual baten bitartez.

Malagako zinema-jaialdiak Spanish Screenings Content atala baliatuko du, hainbat lan-ildoren bitartez, bere helburuak lortzeko; besteak beste, edukien aniztasun handiagoa (zinema, telesailak eta onlineko eta offlineko formatu berriak) eta sail berriak izatea (bertsio berriak, literatura-egokitzapenak eta topaketak talentuen eta agenteen artean).

Horrez gain, profesional mota gehiagoko gonbidatuen kopurua handitu nahi du: nazioarteko salmenten agenteak, eskualde mailako funtsak, film office/commission zerbitzuak, ekoizleak, nazioarteko banaketa-enpresak, talentuak, prentsa, etab.

Koprodukzioko foro bat ere sortu du; proiektu berriak argitaratzeko plataforma bat.

Era berean, Spain Colorful Diversity gehitu du, autonomia-erkidegoek euren kokapenak eta filmatzeak laguntzeko planak aurkez ditzaten euren film office eta film commission zerbitzuen bitartez.

Asmoa du, baita ere, Europako, Asiako, Ipar Amerikako eta Hego Amerikako VoD plataformen topaketa sustatzeko.

Bestalde, Spanish Screenings Technology atala baliatuta, ikus-entzunezkoekin lotutako teknologia berriak sortzen dituzten Espainiako enpresen lana ikusgarri egin nahi du Donostia Zinemaldiak. Horretarako, foro bat eta azalpenetarako espazio bat izango ditu datorren iraileko edizioan.

Inbertsio berriak

Inbertsio-agentzia eta funts berriak lortzeko asmoz, Spanish Screenings Financing atala gauzatuko du Donostia Zinemaldiak.

Spanish Screenings proiektuak 4,2 milioi euro bideratuko ditu 2022ko eta 2023ko ekitaldietara, eta Malagako zinema-jaialdiari eta Donostia Zinemaldiari zuzendutako dirulaguntza izendunen bidez erabiliko dira.

Gainera, 3 milioi euro baino gehiago emango dira Spanish Screenings 360 plataforma garatzeko.

Era berean, Kultura eta Kirol Ministerioak, ICAAren bitartez, sektoreari laguntzeko ildo berriak prestatuko ditu, Espainiako ekoizpenak erostea eta nazioartean banatzea bultzatzeko. Horretarako, 6 milioi euroko zuzkidura espezifiko bat dago.

Aurrekontu hori Suspertze, Eraldatze eta Erresilientzia Planaren 25. osagaiari dagokio; 45 milioi euroko zuzkidura du, sektorea nazioartekotzeko programa handinahi baterako. Horietatik, 20 milioi euro Kultura eta Kirol Ministerioaren aurrekontukoak dira, eta, 25 milioi euro, ICEXen aurrekontukoak.