Donostia Zinemaldiak eta Tabakalerako Kultura Garaikidearen Nazioarteko Zentroak topagune bat sortu dute egun bakoitzerako, 2deo Topagunea izenez, irailaren 26tik (asteartea) 29ra (ostirala) bitartean (19:00etatik 22:00etara), 2deo ikus-entzunezko laborategian. Keler, BIME eta Oso Polita taldeen lankidetza du ekimenak, eta honako hauei zuzenduta dago: zinemagileei, industria zinematografikoko profesional eta kazetariei, Zinemaldiko akreditaziodun guztiei, bereziki Zinemaldiak eta Tabakalerak bultzatutako programa eta sailetara bideratutako lana dutenei. Horien artean daude Zabaltegi-Tabakalera eta Nest sailetan hautatutako filmetako lantaldeak, Ikusmira Berriak, Noka eta 2deo serieak sailetako egoiliarrak, EQZEko ikasleak eta ikasle ohiak, inbertitzaileen topaketan eta eraikinean egiten diren beste jarduera profesional eta kultural batzuetan −adibidez, Isabel Hergueraren erakusketan− parte hartzen duten pertsonak. Akreditazioa behar da topagunean sartzeko.

BIME eta Oso Polita taldeekiko elkarlanari esker, musika-programa bat egongo da egunero: hilaren 26an (asteartea) Alfredo Ignacio izango da disc-jockeya; hilaren 27an (asteazkena), berriz, Lidna; hilaren 28an (osteguna), ordea AFU; eta hilaren 29an (ostirala), azkenik, Juan Tatorri.

Beherapenak Baga Biga Faktoria eta Curdelón establezimenduetan

Donostia Zinemaldiak beste bi topagune izango ditu akreditazioa duten pertsonentzat: batetik, Baga Biga Faktoria garagardo artisaua zerbitzatzen duen garagardotegia (Ramon Maria Lili kalea 8; astelehenetik ostegunera 17:00etatik 23:30era irekita, ostiral eta larunbatetan, berriz, 12:00etatik 00:00etara eta igandeetan, azkenik, 12:00etatik 23:30era), akreditaziodunei % 10eko beherapena eskainiko diena; eta bestetik, Curdelón ardotegia (Kolon pasealekua 35, igandetik asteazkenera 11:00etatik 22:00etara irekita, eta ostegunetik larunbatera, berriz, 11:00etatik 23:00etara), zeinak % 5eko deskontua aplikatuko baitie gourmet-produktuei eta % 10ekoa, berriz, eskaintzako gainerako produktuei.

MUSIKA-PROGRAMA 2DEO TOPAGUNEAN

Guajira Sicodélica (Dabadaba) taldeko bazkide sortzaileetako baten (Iñaki Otalora) goitizena da Alfredo Ignacio. Oraingoan, bost urte baino gutxixeago iraun duen force karibetarreko bira baten ondoren itzuli da plateretara. Twist polinesiarra, Bierzoko chachachá, abangoardiako orkestrak, eta inoiz argitara eman ez diren filmen soinu-bandak; horiexek dira musikariaren maletatik ateratzen diren soinuetako zenbaitzuk.

Lidna Donostian bizi den musikari eta artista bisual argentinarra da. 2021ean argitaratu zuen bere lehen EPa, Terrario, eta horren ondoren Transparente (2022) eta Vas a Poder (2023) singleak argitaratu zituen, bere hurrengo disko Antoditaren parte direnak. Lidnaren musika dream pop eta ambient pop generoen artean dago, pop artearen eragin askorekin. Gaur egun Artxibo Zinematografikoko masterra egiten ari da Elías Querejeta Zine Eskolan.

Jon Quiñones (AFU, León, 1993) Donostian bizi da 2014tik. Hainbat musika-proiektutan parte hartu du, hala nola Kilimak, Talah, Argi Zulo Dub Station edo Ether Ensemble delakoetan, eta sorkuntza, kudeaketa eta hedapen kulturalean parte hartu du Banda Bat (Guardetxe), Kaleko Txirrina (Masa Crítica) eta NWD (New World Disorder) taldeen bitartez. Bere setetan hainbat generotako amalgama bat atzematen da, hauen eraginarekin: jazza, hip-hopa, elektroa, UK garagea, breakak eta technoa.

Oiartzuarra, JuanTaTorrik joan-etorri bat egingo du hainbat musika-estiloko ibilbidean: rhythm and bluesa, soula, disco musika eta dance musika.