Bihar, abuztuaren 18an, 10:00etan, Donostia Zinemaldiaren 74. edizioko (irailaren 18tik 26ra) Belodromoko saioetarako sarrerak ipiniko dira salgai. Programazioak Karateka eta Muguruza FM 40 Tour lanen mundu-estreinaldiak eta Go!azen telesailaren hamahirugarren denboraldiaren lehen atalaren emanaldia barne hartzen ditu. Halaber, auditoriumak —2.000 pertsonatarako edukiera duenak— Kontzertua & Emanaldia ekimen tradizionala —Euskadiko Orkestrarekin eta SGAE fundazioarekin batera antolatua— hartuko du, baita amaierako galaren emankizuna eta Ikastetxeak Belodromoan ekimeneko goizeko emanaldiak ere.

Astelehenean (irailaren 21ean), 19.00etan, Karateka emango da, Aritz Morenoren (San Sebastián,1980) hirugarren film luzea. Filmak —Andrea Ros, Patrick Criado, eta Ernesto Alterio dituena aktore-zerrendan— Sandra Sánchezen istorioa kontatzen digu: konbentzio guztiak hautsi zituen emakume horrek, karateko urrezko domina lortu batzuen Joko Olinpikoetan, kata modalitatean, 39 urterekin. Morenok Zinemira-Kimuak sailean hartu zuen parte Bucle (2011) eta Cólera (2013) lanekin, Ventajas de viajar en tren (2019) eta Moscas (2023) film luzeak zuzentzeaz gain.

Belodromoak datorren irailaren 24an hartuko du, 19.00etan, Muguruza FM 40 Tour lanaren emanaldia. Ander Merino Etxebestek (Donostia, 1995) eta Fermin Muguruzak (Irun, 1963) elkarrekin zuzendu dute dokumentala, Muguruzaren azken bira musikalaren testuinguruan sortua, artistaren 40 urteko ibilbidea deskribatzen du: konpromisoa, erresistentzia kulturala eta identitate kolektibo bihurtutako abestiak. Ez da izango musikari gipuzkoarra Zinemaldian dagoen lehen aldia, Zinemiran aurkeztu baitzituen Checkpoint Rock. Canciones desde Palestina (2009), Next Music Station: Lebanon (2011), NOLA? (2016), Black is Beltza (2018) eta Bidasoa 2018-2023 (2023); Zuloak (2012), berriz, Zabaltegi Bereziak sailean, eta Black is Beltza II: Ainhoa (2022) azkenik, Belodromoan.

Ostiralean (irailaren 25a), 18.30ean emango da, bestalde, Go!azen 13. Itziar Gómez Sarasolak (Errenteria, 1964) berriz ere eramango du Belodromoko pantaila erraldoira eta eszenatokira ikus-entzule gazteenentzat horren gustukoa den telesailetako bat. Telebistarako film gisa sortu bazen ere, telesailak jada 13 denboraldi ditu oraingoarekin, eta horietako bakoitzak uda berri bat erakusten digu Basakabi kanpamentuan.

Belodromoko emanaldietarako sarreren prezioa 8,75 eurokoa da eta bihartik (asteartea, abuztuaren 18a, 10:00ak) aurrera erosi ahalko dira Zinemaldiaren eta Kutxabanken webguneen medioz (https://sansebastianfestival.janto.es eta https://tickets.kutxabank.es, hurrenez hurren). Saio bakoitzeko lau sarrera baino ezin dira erosi, eta eragiketa bakar batean gutxienez hamar sarrera erosten dituenari % 25eko deskontua aplikatuko zaio. Donostia Kultura txartelarekin (soilik leihatilan) eta Kutxabanken Gaztetxartelarekin ere aplikatzen dira.

Halaber, Belodromoak berriz hartuko du Kontzertua & Emanaldia —Euskadiko Orkestrarekin eta SGAE fundazioarekin batera antolatua—, aurten irailaren 19an 18.00etan. Ikuskizunak soinu-banden interpretazio sinfonikoa eta horien inspirazio izandako filmen eszenen muntaketa uztartzen ditu. Sarrera doakoa da, baina ezinbestean jaso beharko da dagokion gonbidapena, eskuragarri irailaren 12tik 18ra Donostia Zinemaldiak Kursaalen duen informaziogunean, baita Donostiako Ijentea 1ean kokatutako Donostia Turismo bulegoan eta kontzertuaren egunean bertan Belodromoan.

Azkenik, Belodromoa Ikastetxeak Belodromoan ekimenaren goizeko eszenatoki ere izango da; bertan, 6-11 urteko haurrek zinema zientziarekin lotzen duen film baten emanaldiaz gozatu ahalko dute. Saio horiek Donostia Zinemaldiak, Donostia International Physics Centerrek (DIPC) eta Euskadiko Filmategiak elkarrekin antolatzen dituzte, gure lurraldeko ikasleei zientziaren irudi positiboa transmititzeko eta Donostiak ikerketa zientifikoarekin duen lotura sendoa erakusteko.

Horrez gainera, eta ohikoa den bezala, Zinemaldiaren azken egunean (aurten, irailaren 26an, larunbata), 18.00etatik aurrera, Belodromoak honako saio hauek hartuko ditu: Perlak sailari amaiera emango dion filma, amaierako galaren zuzeneko emanaldia eta Sail Ofizialari amaiera emango dion filma. Saio honek 15 euroko prezioa izango du.