Ofizialak
Partner
"Z365" edo "Zinemaldia urte osoan" Zinemaldiaren apustu estrategiko berria da, non talentu berrien bilaketa, laguntza eta garapena (Ikusmira Berriak, Nest); formakuntza eta zinema-ezagutzen transmisioa (Elias Querejeta Zine Eskola, Zinemaldia + Plus, Zinemagileen elkarrizketa); eta ikerketa, dibulgazioa eta pentsamendu zinematografikoa (Z70 proiektua, Pentsamendua eta eztabaida, Ikerketa eta argitalpenak) elkartzen diren.
Deialdia - 2026 Sartu NIRE ZINEMALDIRA 
Agenda Programa eta sarrerak Bilatu 
Donostia Zinemaldiko Sail Ofizialean David Ayerren Heart of the Beast filma, Paramount Picturesena, emango da lehiaz kanpo, eta Brad Pitt eta Ayer bera bertan izango dira. Abenturazko thriller honetan, aktore estatubatuarrak Armadako Indar Berezietatik ofizial ohi bat hezurmamitzen du. Protagonistak, bere aspaldiko gerra-txakurrarekin batera, Alaskako natura basatitik bizirik iraun beharko du hegazkin-istripu ikaragarri baten ondoren.
Film hau programazioan sartu ondoren, Sail Ofizialeko filmen zerrenda osatuta geratu da. 74. edizioan, hala, 17 film egongo dira lehian, beste hiru lehiaz kanpo ikusi ahalko dira eta beste bost Emanaldi Berezi gisa emango dira. Filma dela-eta, halaber, Pitt Donostiara itzuliko da 2009an Inglourious Basterds filmagatik egindako bisitaren ondoren (Perlak sailean aurkeztu zuen Quentin Tarantino zuzendariarekin batera).
Oscar sarietarako izendatutako U-571 (Jonathan Mostow, 2000) eta Training Day (Antoine Fuqua, 2001) filmen gidoiak idatzi ondoren, David Ayer zuzendari, gidoigile eta ekoizle estatubatuarra (Champaign, Illinois, 1968) 2005ean hasi zen zuzendari-lanetan, eta 20 urte baino gehiago daramatza pertsonaietan oinarritutako thriller eta krimen-drama gordinak egiten; besteak beste, End of Watch (2012), Fury (2014) eta The Beekeeper (2024).
Cameron Alexanderrek idatzitako eta Ayerrek zuzendutako Heart of the Beast film luzeak Pitt eta zuzendaria berriz elkartu ditu. J.K. Simmons eta Anna Lambe aktoreek ere parte hartu dute, eta Pittek filma ekoitzi du Olivia Hamilton, Marty Bowen eta David Ayerrekin batera; Damien Chazelle ekoizle exekutiboetako bat da.
Paramounti buruz, Skydanceren konpainia bat
Paramount, Skydanceren konpainia bat (Nasdaq: PSKY), belaunaldi berriko komunikabide eta entretenimenduko enpresa handi eta globala da, hiru negozio-eremuz osatuta dagoena: Estudioak, Kontsumitzailearentzat Zuzenean eta Telebista. Konpainiaren marka-zorroak marka mitiko ugari biltzen ditu, hala nola hauek: Paramount Pictures, Paramount Television, CBS (Ameriketako Estatu Batuetako telebista katerik ikusiena), CBS News, CBS Sports, Nickelodeon, MTV, BET, Comedy Central, SHOWTIME®, Paramount+, Pluto TV, Skydance Animation, Film, Television and Interactive/Games, baita sortu berri den Paramount Sports Entertainment ere. Informazio gehiago nahi izanez gero, sartu webgune honetara: www.paramount.com.
Hegazkin istripu latz batetik bizirik atera ondoren, James Belmont Indar Berezietako ofiziala eta Odin haren gerra-txakurra Alaskako bihotz menderaezinean harrapatuta geratuko dira. Natura gupidagabeari aurre egiteko, bi izakiek bizirik irauteko gogor borrokatu beharko dute. David Ayer zuzendari txalotuaren eskutik, Heart of the Beast leialtasunari, adoreari eta soldadu batek eta haren lagunik leialenak euren erronka handienean duten lotura hautsiezinari buruzko abentura-thriller bizia da.
Bideoak
Irudiak
Astelehenetik ostiralera, 09:00etatik 14:00etara
eta 16:00etatik 19:00etara