Movistar Plusek eta Donostia Zinemaldiak gaur berritu dute haien lankidetza-akordioa hurrengo hiru urteetarako (2027-2029). Horrela, plataforma hori sariketaren kide nagusietako bat izaten jarraitzea ahalbidetzen duen aliantza estrategikoa sendotu dute, eta berretsi egin dute bi entitateek zinemaren sustapenarekin, serieekin eta ikus-entzunezko sorkuntzarekin duten konpromisoa.

Akordio hori Donostiako Victoria Eugenia Antzokian sinatu da, eta honako hauek parte hartu dute: Alfonso Gómez Palacio Movistar Pluseko Zuzendari Exekutiboak, José Luis Rebordinos Donostia Zinemaldiko zuzendariak eta Maialen Beloki zuzendariordeak (eta urtarriletik aurrera zuzendariak).

Movistar Plus komunikabide-laguntzaile izateko akordio-berritze horrek indartu egiten du horien arteko lankidetza, 2013az geroztik Donostiako Zinemaldia Europako eta Latinoamerikako ikus-entzunezko industrien topaketa-gune nagusietako bat izaten lagundu duena, bai eta talentuaren, sormen-elkarrizketaren eta obra berrien sustapenaren deskubrimendu-eremu ere.

Movistar Plus hertsiki lotuta dago Jaialdiarekin, eta agertoki pribilegiatua da sortzaileei, ekoizleei, gionistei, interpretatzaileei eta sektoreko profesionalei lagun egiteko zein haren ikus-entzunezko proiektu nagusietako batzuk aurkezteko. Plataformak uste du sariketa ezinbesteko hitzordua dela industriarekin duen harremana indartzeko eta talentua zein gaztelaniaz egindako sorkuntzak bultzatzen jarraitzeko. Aurten, Movistar Plusek Jatorrizko film hauek aurkeztuko ditu: 5 minutos más (Sail Ofiziala), La bola negra (Perlak) eta El ser querido (Made in Spain). Horiez gain, El castillo (Lehiaketaz kanpoko Sail Ofiziala) seriea eta El otro Chiquito (Made in Spain) dokumentala ere aurkeztu ditu.

Donostiako Zinemaldiak funtsezko rola izaten dihardu nazioarteko talentuaren erakusleiho gisara, zein proiektu berriak kaleratzeko plataforma eta ikus-entzunezko industriaren profesionalen topaketa-foru gisara.

Azkeneko hamarkadan zehar, Jaialdia agertoki izan da plataformako Jatorrizko ekoizpen arrakastatsuenetako batzuentzat. 2017an, adibidez, Movistar Plusek lehiaketaz kanpo aurkeztu zuen La peste, Jaialdiaren Sail Ofizialean zegoen plataformaren lehenengo Jatorrizko seriea. Horren atzetik etorri ziren Gigantes (2018), Antidisturbios (2020), La Fortuna (2021), Apagón (2022), La Mesías (2023), Querer (2024) edo Anatomía de un instante (2025).

Sail Ofizialetik igaro diren Movistar Plusen Jatorrizko film luze nabarmenduenen artean daude Alejandro Amenabarren Mientras dure la guerra (2019), Alberto Rodríguezen Modelo 77 (2022) eta Los tigres (2025), Elena Molina eta Isaki Lacuestaren Flores para Antonio (2025) eta Alauda Ruiz de Azúaren Los domingos (2025), Urrezko Maskorraren irabazlea.

Beste atal batzuetan Movistar Plusen Jatorrizko beste eduki batzuk ere estreinatu dira, hala nola Raphaelismo (Movistar Gala, 2021), Las huellas de elBulli (Culinary Zinema, 2021), Mugaritz, sin pan ni postre (Culinary Zinema, 2024) y Hasta que me quede sin voz (Belodromoa, 2025), además de series como Vergüenza (Zabaltegi-Tabakalera, 2017), Arde Madrid (Belodromoa, 2018), Vida perfecta (Belodromoa, 2019), Dime quién soy (Movistar Gala, 2020), Fácil (Movistar Gala, 2022), El otro lado (Belodromoa, 2023), Esta ambición desmedida (Belodromoa, 2023) eta Celeste (Belodromoa, 2024).

Akordioa berritzearen bidez, bi entitateek batera lan egiten jarraitzeko borondatea erakutsi dute, hala, sormena babesten, sortzaileentzako aukera berriak sustatzen eta ikus-entzunezko industriaren garapena sendoagoa, askotarikoagoa eta lehiakorragoa izan dadin laguntzen jarraitzeko.