Zinema Ikasleen Nazioarteko XIV. Topaketa irailaren 22tik 25ra egingo da, 63. Donostia Zinemaldiaren barruan.

Donostia Zinemaldiak eta Tabakalera-Kultura Garaikidearen Nazioarteko Zentroak antolatu dute, elkarrekin eta Donostia 2016 - Europako Kultur Hiriburuaren laguntzarekin. Azken fundazio horren helburua, hain zuzen, babes-prozesu jarraitu bat garatzea da, Donostiako ikus-entzunezko sorkuntza bultzatzeko eta, hartara, Europan formatu erdiko eta txikiko ekoizpeneko erreferente bihurtzeko hiria.

Aukeratutako film laburrak publikoari eta Zinemaldiko gonbidatuei irekitako saioetan aurkeztuko dira; ikus-entzunezkoen sektoreko profesionalak ere izango dira saiootan. Publikoak, ikasleek eta profesionalek filmak ikusiko eta komentatuko dituzte, eta zinematografiaren praktikari eta teoriari buruz eztabaidatuko dute.

Zinema Ikasleen Nazioarteko XIV. Topaketari esker, zinemaren mundua gertutik ezagutu dezakete eskoletako ikasleek, topaldietan parte hartzen duten profesional bikainen esperientzien bitartez (zuzendariak, ekoizleak, banatzaileak, kritikariak, etab.); azken horiek ere, oraindik ikasten ari diren etorkizuneko zinemagileekin jakituria partekatzera datoz Topaketara.

Topaketan parte hartzen duten ikasleek osatutako epaimahai batek, Benedikt Erlingsson duela buru, Panavision Saria emango du. Irabazleak bi sariren artean aukeratu ahalko du: edo RED Epic kamera baten eta Primo lente estandar baten lagapena, lau astez filmatzeko, edo 10.000 euroko kreditua Panavisionen materiala alokatzeko. Film labur irabazlearen zuzendariari emango zaio saria. Orobat, Freak Agentzia / Feelsales Saria emango zaio: Freak Agentziak nazioarteko 50 zinema-jaialditara aurkeztuko eta bidaliko du film laburra, doan, eta nazioarteko salmentak kudeatuko ditu, mundu osoan, filma ekoitzi duen eskolaren herrialdean izan ezik. BioBioCine – Duoc UC Saria ere emango zaio Panavision eta Freak Agentzia / Feelsales sariak eraman dituen film laburrari; sari horri esker, zuzenean hautatuko dute Concepcióneko (Txile) BioBioCine nazioarteko zinema-jaialdian parte hartzeko. Epaimahai horrek zehaztuko du, halaber, zer hiru zuzendarik izango duten Cannes-eko hurrengo zinema jaialdian Short Film Corner sailean parte hartzeko aukera.
Bestalde, euskal zentroetako ikasleek eratutako epaimahai berezi batek Orona Saria banatuko du. HUHEZI-ko irakasle batek koordinatuko eta Orona Fundazioko Garapen Zuzendaritzak zuzenduko du epaimahaia, eta Topaketako film labur berritzaileena sarituko du, 5000 eurorekin saritu ere. Zenbateko hori zuzendariari emango zaio.

Azkenik, beste epaimahai berezi batek Torino Award saria banatuko du. Topaketan parte hartzen duen zuzendari bati emango zaio, eta sariari esker, TorinoFilmLab-eko programa batean parte hartzeko aukera izango du zuzendariak, saria eman eta hurrengo bi urteetan.
Lehiaz kanpoko hiru film labur ere aurkeztuko dira topaldian. Batetik, Atelier Ludwigsburg-Paris proiektuko bi film labur emango dira. Nazioarteko lankidetza eta ekoizpen-prozesuak sustatzeko proiektu bat da, eta Pariseko La Fémis zinema-eskolak eta Badem-Württembergeko Filmakademie zinema-eskolak hartu dute parte. Bestetik, hirugarren film labur bat, Donostia Zinemaldiaren eta Concepcióneko (Txile) BioBioCine nazioarteko zinema-jaialdiaren arteko lankidetzaren eskutik datorrena; izan ere, bai jaialdiak bai Topaketak, bi-biek dute helburu ikus-entzunezko arloko ezagueren eta esperientzien trukea sustatzea.

Topaketaren programa osatzeko, hiru master class egingo dira (aurretik izen-ematea beharrezkoa da). Lehendabizikoa Charlie Kaufman eta Duke Johnson iparramerikarrek emango dute. Venezian izan ostean, Donostiara etorriko dira Perlak sailean Anomalisa filma aurkeztera. Bigarren master classa Jia Zhangke zuzendari txinatarrak emango du; haren Mountains May Depart filma ere esandako sailean proiektatuko dute, Canneseko zinema-jaialdian aurkeztu ostean. Azkenik, João Salaviza zuzendari portuges gazteak bere film laburren aukera bat aurkeztuko du; horrez gain, ikasleei azalduko die zer-nolako esperientziak izan dituen Montanha bere opera prima zuzentzean, eta Zinemaldiaren Zabaltegi sailean parte hartuko du film horrekin.

Master Classetarako izen-emateak Tabakaleraren webgunean

http://www.tabakalera.eu/es/masterclass-charlie-kaufman-y-duke-johnson
http://www.tabakalera.eu/es/masterclass-jia-zhang-ke
http://www.tabakalera.eu/es/masterclass-joao-salaviza

Mundu zabaleko zinema eskoletatik etorritako ikasleen topaketa bat da. Ikasle hauen lanak aurrez aukeratuak izan dira, euren laburmetraiekin proiekziotan parte hartzeko baita hitzaldi eta industriako profesionalek prestatzen dituzten master class-etan jarduteko ere. Aurkeztutako laburmetraien lehiaketa bat ere antolatzen da eta ikasleak izen handiko zinemagile batek zuzenduta, Panavision Sariaren, Freak Agentzia / Feelsales Sariaren eta BioBioCine – Duoc UC Sariaren film irabazlea hautatuko dute. Epaimahaikideek gainera, Canneseko Zinemaldiko Short Film Cornerrean parte hartzerik izango duten hiru zuzendarien izenak aukeratuko dituzte. Halaber, TorinoFilmLab-eko ordezkari batek Torino Award-a esleituko du. Bukatzeko, berariazko epaimahai batek; euskal zentroetako ikasleek eratuta, HUHEZI-ko irakasle batek koordinatuta eta Orona Fundazioko Garapen Zuzendaritzak zuzenduta Orona Saria esleituko du, Topaketaren laburmetrai berritzaileenari.

Zinema Ikasleen Nazioarteko Topaketa, Tabakalera - Kultura Garaikidearen Nazioarteko Zentroaren laguntzarekin antolatzen da. Gainera, Donostia 2016 Europako Kultur Hiriburuaren babesa du eta Panavision, Freak Agentzia / Feelsales, BioBioCine Festival Internacional Concepción Chile, Short Film Corner, TorinoFilmLab eta Orona Fundazioa ditu laguntzailetzat.

Aukeratutako filmak publiko orokorrari irekitako saioetan aurkeztuko dira. 15 pertsona baino gehiago dituzten taldeak, mesedez, jarri zaitezte gurekin harremanetan eiecine@sansebastianfestival.com bidez.

• ARAUDIA - Zinema Iskasleen Nazioarteko XIV Topaketa

Berriak

• 2015/ 09/ 04
  Donostia Zinemaldiaren 63. edizioaren aurkezpena
  
• 2015 / 08/ 24
  Zinema Ikasleen Nazioarteko XIV. Topaketa irailaren 22tik 25era izango da, Donostia Zinemaldiaren 63. edizioaren barruan eta Tabakalera-Kultura Garaikidearen Nazioarteko Zentroa izango du egoitza berri bezala
  
• 2015 / 05 / 15
  Ekainaren 1ean irekiko da Donostia Zinemaldiaren Zinema Ikasleen Nazioarteko XIV. Topaketako izen-emate epea.
  2015eko irailaren 22tik, asteartea, 25era, ostirala, ospatuko da 63. Donostia Zinemaldiaren barruan.