Lumière! L’aventure commence filmaren iazko aurkezpen gogoangarriaren ondoren –Canneseko zinema-jaialdiko eta Lumière Institutuko zuzendari Thierry Frémauxen emanaldi iruzkinduna barne–, zaharberritutako klasiko baten emanaldia urteroko hitzordu bihurtzeko elkarlanean hasi dira Donostia Zinemaldia eta Lyongo Lumière zinema-jaialdia.

Klasikoa ekimenari hasiera emateko, Vittorio De Sicaren Ladri di biciclette / Bycicle Thieves (1948) ekoizpena aukeratu dute, Italiako neoerrealismoaren film enblematikoa.

Filma zaharberritu du Boloniako Cineteca Fundazioko L’imagine Ritrovata laborategiak (Italia), ikerketa, kontserbazio eta zaharberritze zinematografikoaren alorrean mundu-mailan erreferentzia den zentroak. Zaharberritutako filma Canneseko aurreko zinema-jaialdiko Cannes Classics sailean aurkeztu zen eta handik gutxira Boloniako II. Cinema Ritrovato zinema-jaialdian proiektatu zen, Ritrovati e Restaurati 2018 / Recovered & Restored 2018 sailaren barruan.

Urtero, Zinemaldiak eta Lumière zinema-jaialdiak elkarrekin aukeratutako film bat proiektatuko da Donostian.

Ladri di biciclette filmaren emanaldia Frémauxek aurkeztuko du, Tabakalerako zinema-aretoan, irailaren 24an (astelehena).

Zinemaren historiako lan onenen artean dagoela irizten zaio filmari, eta atzerritar hizkuntzako film onenaren Oscar sari bat irabazi zuen 1949an. Gizon baten zoritxarraren berri emango digu; izan ere, laneko lehenengo egunean, lan egiteko ezinbesteko bitartekoa lapurtuko diote: bizikleta. ¿Qué es el cine? lanean, filmari buruzko azterketa ospetsua egin zuen André Bazinek; filma zinema purutzat deskribatu, eta zera ondorioztatu zuen argumentuari buruz: “Langilea bizi den mundu horretan, pobreek, aurrera ateratzeko, elkarri lapurtu behar diote”.