Ofiziala
Partner
"Z365" edo "Zinemaldia urte osoan" Zinemaldiaren apustu estrategiko berria da, non talentu berrien bilaketa, laguntza eta garapena (Ikusmira Berriak, Nest); formakuntza eta zinema-ezagutzen transmisioa (Elias Querejeta Zine Eskola, Zinemaldia + Plus, Zinemagileen elkarrizketa); eta ikerketa, dibulgazioa eta pentsamendu zinematografikoa (Z70 proiektua, Pentsamendua eta eztabaida, Ikerketa eta argitalpenak) elkartzen diren.
Deialdia Sartu NIRE ZINEMALDIRA 
Agenda Programa eta sarrerak 
Bilatu 
Lan hauek aurkeztuko dira Antonio Elorza Belodromoan, 2.500etik gora ikuslerentzat lekua duen zinema-aretoan: Leticia Dolerak sortutako Vida perfecta telesail osoa, Víctor Monigote eta Eduardo Gondell zuzendarien La gallina Turuleca animazio-filma, eta Sua – Irabazi arte dokumentala, Realak Erreginaren kopa lortu aurreko asteari buruzkoa.
Igandean, hilak 22, 17:00etan, osorik estreinatuko da Vida perfecta / Perfect Life telesaila. Leticia Dolera (Bartzelona, 1981) da sortzailea. Aurrez, zenbait film labur eta Requisitos para ser una persona normal film luzea (Made in Spain, 2015) zituen eginak. Lehenengo bi atalak proiektatuta telesail onenaren saria lortu zuen Vida perfecta-k Canneseries zinema-jaialdian, eta antzezpen-sari berezia eraman zuten Dolerak berak, Aixa Villagránek eta Celia Freijeirok, gizartearen estandarren araberako ‘bizitza perfektua’ eraman ezinari aurre egin behar dioten hiru emakumeek. Elena Martín, Ginesta Guindal eta Dolera izan dira telesailaren zuzendariak.
Larunbatean, hilak 21, 17:30ean, La gallina Turuleca animazio-filma proiektatuko da arratsaldean. Víctor Monigote (Madril, 1967) eta Eduardo Gondell (Buenos Aires, 1961) dira zuzendariak. Monigotek, besteak beste, Cándida, Camino eta Mortadelo y Filemón: Misión salvar la Tierra filmen storyboard-akegin ditu. Gainera, Mortadelo y Filemón contra Jimmy el Cachondo filmean zuzendaritza artistikoaz arduratuta Goya sarirako hautagaitza eskuratu zuen. Bestalde, Eduardo Gondell Gaturro, Boogie el aceitoso eta Don Gato y su pandilla animazio-film luzeetan aritu da zuzendaritza- eta ekoizpen-lanetan.
Joan den maiatzaren 11n, Granadan finala jokatu eta Erreginaren Kopa lortu zuen Realeko emakumeen taldeak. Aurreko egunetan ikus-entzunezkoen arloko talde bat izan zen haiekin, eta Aurkene Arizak eta Mikel Fuentesek zuzendutako dokumental hau izan da emaitza. Bertan jaso dira Donostiako kluberako historikoa izan den garaipen horri bide eman zioten gogoa eta giroa. Emanaldia ostiralean izango da, irailak 27, 19:30ean.
Gainera, larunbatean, hilak 21, 12:00etan, Euskadiko Orkestrak, SGAE Fundazioak eta Zinemaldiak berak antolatutako kontzertua hartuko du Belodromoak. Ikuskizunak soinu-banden interpretazio sinfonikoa eta musika hori oinarritu zuten eszenen muntaia uztartzen ditu.
Azkenik, eta ohikoa den bezala, Zinemaldia itxiko duen ekitaldiaren emanaldia egingo da Belodromoan. Perlak saila itxiko duen filma (The Climb), Sail Ofiziala itxiko duena (The Song of Names) eta 67. edizioko sari-banaketa proiektatuko dira 18:15etik aurrera.
Turulecak itxura xelebrea du eta arrautzak erruteko zailtasunak ditu. Horregatik, gainontzeko oiloek burla egiten diote. Baina egun batean, Isabel musika-irakasle ohiak bere etxaldera eramango du bizitzera, eta han bere talenturik handiena aurkituko du Turulecak: hitz egiteko gai izateaz gain, bikain abesten du! Baina zorionak gutxi iraungo du. Isabel hiri handi bateko ospitalera eramango dute istripu bat izan ondoren. Turulecak lagunaren bila joatea erabakiko du, eta, horretarako, Daedalus zirkuko artista taldean sartuko da. Elkarrekin, bidaia zoragarri bati ekingo diote, eta Turulecak ospe handia lortuko du bere talentu musikalari eta karismari esker. Bidaia ez da samurra izango, ordea, Armando Tramas maltzurrak zirkuaren eta oilo miresgarriaren jabe izan nahi duelako.
Realak berriz du historiarekin hitzordua. 80ko hamarkadako talde txapeldunaren arrakasten ondoren, 30 urte geroago final handi batera iritsi da gure taldeetako bat. Hauxe da txapela berriz lortzeko aukera. Emakumeen taldea Atletico Madrilen aurka lehiatuko da Granadako Erreginaren Koparen finalean. Jokalariek, talde teknikoak eta familia txuri-urdin osoak urduri, tentsioan eta ilusio handiz biziko dituzte final handiaren aurreko egunak. Gure jokalarien anbizioa eta borroka funtsezkoak izango dira. Guztiok dakigu nola amaitu zen. Ikus dezagun orain bidea nolakoa izan zen.
María, Esther eta Cristina emakume heldu eta konplexuak dira, eta bizi-krisia pasatzen ari dira. Egindako planekin desiratutako zoriona lortu ez dutela konturatu dira. Elkarrekin, ordezko bideak hartzen ikasiko dute, eta gizarteak tradizioz haiengandik espero duenetik aldenduko dira. Hala jakingo dute bizitza ez dela nahitaez imajinatu zutena izan behar. Zortzi kapituluko telesaila.
Irudiak
Astelehenetik ostegunera: 09:00 - 15:00.
Ostiraletan: 10:00 - 14:00