Jean-Gabriel Périoten (Bellac, Frantzia. 1974) lanak dokumentalaren, animazioaren eta esperimentalaren artean mugitzen dira. Bereak dira, besteak beste, Dies Irae, Eût-elle été criminelle... (lan horrek «.doc-Ez-fikzioaren bide berriak» atzera begirakoan parte hartu zuen 2010ean Donostian) eta The Devil. Périoten lehen film luze dokumentalak, Une jeunesse allemande-k, Berlinaleko Panorama sailari hasiera eman zion 2015ean, eta Zabaltegin ere proiektatu zen. Lumières d'été - Natsu no hikari, zuzendariaren lehenengo fikzio-film luzea, New Directors sailean estreinatu zen 2016an, eta Song for the Jungle film laburrarekin Zabaltegi - Tabakalera saria irabazi zuen 2018an. Nos défaites-ek Berlingo zinema-jaialdiko Forum sailean izan zuen estreinako emanaldia, eta CICAE Art Cinema saria eskuratu zuen han.