Tribeca Enterprises eta YouTubek elkarrekin iragarri dute gaur We Are One: A Global Film Festival ekimena, aurrekaririk ez duen eta esklusiboki YouTube bitartez jarraitu ahal izango den 10 eguneko zinema-jaialdi digitala. Nazioarteko istorio narratzaileen komunitatea bilduko duen ekimenak dohainik eskainiko die mundu guztiko audientziei jaialdiaren programazioa. Jaialdia maiatzaren 29an hasiko da YouTube.com/WeAreOne Interneteko helbidean eta, besteak beste, honako zinema-jaialdiek hautatutako programazioa eskainiko du: Annecy, Berlin, Cannes, Donostia, Guadalajara, Jerusalem, Karlovy Vary, Locarno, Londres, Macao, Marrakex, Mumbai, New York, Sarajevo, Sundance, Sydney, Tokio, Toronto, Tribeca eta Venezia, besteak beste. Zinemagileei agertoki global batean ahotsa eskainiko dien jaialdiari esker, publikoak mundu guztiko istorioetan murgiltzeko aukera izango du.

Zinema-jaialdien funtsezko osagaietako bat artista eta sortzaileek pertsonak batu eta lotura esanguratsuak sortzeko ahalmena duten ustea da; bada, orain, munduak gehien behar duen uneetako batean egingo dute. We Are One: A Global Film Festival jaialdiari esker, publikoak ez du soilik munduan zeharreko kulturetara gerturatzeko aukera izango agertoki global berri baten bitartez, baizik eta tokian tokiko komunitateak lagundu ahal izango ditu COVID-19ak kaltetutakoei asistentzia eskaintzen dieten erakundeen aldeko dohaintza zuzenen bitartez. Jaialdiak bai Osasunaren Mundu Erakundea bai eskualde bakoitzean asistentzia eskaintzeko dituen bazkideei eskainiko die laguntza.

«Sarri hitz egiten dugu mugen eta ezberdintasunen gainetik filmek herritarrak inspiratu eta batzeko duten ahalmen bereziki boteretsuaz, mundua sendatzen laguntzeko duten gaitasunaz. Bada, uneotan, mundu guztiak du osatzeko beharra», nabarmendu du ekimenaren aurkezpenean Jane Rosenthalek, Tribeca Enterprises eta Tribecako zinema-jaialdiaren sortzailekidea eta zuzendari exekutiboa hurrenez hurren. «We Are One: A Global Film Festival jaialdiak programatzaileak, artistak eta narratzaileak biltzen ditu mundu guztiko audientziei entretenimendua eta gozamena eskaintzeko asmoz. Jaialdia aurrera eramateko ditugun kide bikainekin eta YouTuberekin eskuz esku ari gara lanean, guztiek zinema-jaialdi bakoitza hain berezi egiten duena bizitzeko aukera izan dezaten, eta zinemaren arteaz eta ahalez goza dezaten», gaineratu du.

Robert Kyncl YouTubeko zuzendari komertzialak, berriz, nabarmendu du «guztiok etxean geratzearen alderdi berezi eta inspiratzaileenetako bat guztiok elkartu eta ekitaldi bat batuta esperimentatzeko dugun gaitasuna da. Bada, We Are One: A Global Film Festival horretarako aukera izango da». Gaineratu duenez, «Tribeca Enterprises eta gure kide bikainekin elkarlanean, zinema-jaialdi bakoitzak hautatu eta eskainitako programazioa ezagutzeko aukera eskainiko diegu zaleei antolatu dugun hamar eguneko ekitaldiaren barnean. Aurretik inoiz egin gabeko zerbait da eta harro gaude mundu guztiko zaleek dohainik ikusi ahal izango dituzten edukion etxea izateaz».

Pierre Lescure eta Thierry Frémaux ere, hurrenez hurren Canneseko zinema-jaialdiko lehendakaria eta zuzendaria, pozik azaldu dira ekimenarekin bat egiteko aukerarekin. «Harro gaude beste zinema-jaialdiekin bat egin izanaz film eta talentu benetan bikainak eskaintzeko. Publikoari aukera emango diogu mundu guztiko narrazioen eta zinema-jaialdi bakoitzaren nortasun artistikoen ñabardurak ezagutzeko», nabarmendu dute. 

We Are One: A Global Film Festival jaialdia maiatzaren 29tik ekainaren 7ra egingo da YouTube.com/WeAreOne Interneteko helbidean. Programazioa doakoa izango da eta filmak, film laburrak, dokumentalak, musika, umorea eta elkarrizketak barnebilduko ditu. Programazio osoa jaialdia hasi aurretik jarriko da eskuragarri.

Tribeca Enterprises konpainiari buruz

Tribeca Enterprises istorioak kontatzeko plataforma anitzeko konpainia da, Robert De Nirok eta Jane Rosenthalek 2003an sortua. Artistei egiten dituzten lanen audientzia zabaltzeko plataforma apartak eskaintzen dizkie eta, kontsumitzaileei, istorioak kontatzeko esperientziara, film independentetara eta ikus-entzunezko ekoizpenatara gerturatzeko modu berriak. Konpainiak entretenimenduarekin lotutako negozio sare bat du, besteak beste, honakoak barnebiltzen dituena: Tribecako zinema-jaialdia, Tribecako telebista-jaialdia eta entretenimendu produktuak ekoizten dituen Tribeca Studios.

YouTuberi buruz

2005eko maiatzean martxan jarri zenetik, YouTubek jatorrizko sorkuntzako bideoak ezagutu, ikusi eta partekatzeko aukera eskaintzen die dituen milaka miloi erabiltzaileei. YouTubek konektatzeko, informatzeko eta gainontzekoak inspiratzeko foro bat eskaintzen du, eta jatorrizko edukien sortzaileen eta iragarle handi eta txikien banaketa plataforma bat bezala funtzionatzen du. Googleren menpeko enpresa bat da YouTube.

#WeAreOne      #WeAreOneGFF

YouTube.com/WeAreOne