tve movistar+
Babesle
Ofizialak
65. Donostia Zinemaldia
22/30 Iraila 2017 - #65ssiff

itxi
Bete formularioa zure datuekin, erregistratutako erabiltzaileentzako edukiak ikusteko
Sakatu hemen
Ez duzu pasahitza gogoratzen? Sakatu hemen

itxi


Oraindik ez duzu posta elektronikoa balioztatu. Posta elktroniko bat bidali dizugu, ondoko esteka sakatu behar duzu kontua balioztatzeko

Hemen zaude: Lehen orrialdea > 68. Edizioa 2020  > Berriak > We Are One: A Global Film Festival-ek munduko zinema-jaialdi garrantzitsuenetako 21ek elkarlanean landutako lehen programazioa iragarri du
We Are One: A Global Film Festival-ek munduko zinema-jaialdi garrantzitsuenetako 21ek elkarlanean landutako lehen programazioa iragarri du
Hamar eguneko zinema-jaialdi digitalak –Tribeca Enterprisesek eta YouTubek ekoitzi eta antolatu dute– Cannes, Berlin, Venezia eta Donostiako zinema-jaialdien programazioa edukiko du, besteak beste

Honako hauek nabarmentzen dira: ‘Ricky Powell’ filmeko ‘online’ estreinaldia (Natasha Lyonne-rekin eta LL Cool J-ekin), Third Eye Blind-en ‘Motorcycle Drive By’-ren munduko estreinaldia, eta hauen arteko solasaldiak: Francis Ford Coppola eta Steven Soderbergh; Song Kang-ho eta Bong Joon-ho, eta Jackie Chan, baita Questlove DJaren saio bat ere
Asteartea, 2020(e)ko maiatzak 26

Tribeca Enterprisesek eta YouTubek We Are One: A Global Film Festival ekimenaren programazioa iragarri dute gaur. 100 film baino gehiago izango ditu programaturik, 35 herrialdetako 21 zinema-jaialdi garrantzitsurekin elkarlanean. Elkarrizketak, errealitate birtualeko edukiak eta musika-emanaldiak ere egongo dira. Hamar eguneko ekitaldi digitala ahots globalen ospakizun bat izango da: aldaketak eragiteko ahalmena duten filmak nabarmenduko ditu eta mundu osoko audientziak bilduko ditu konexio adierazgarriak sortzeko. Zinema-jaialdia YouTuben bakarrik egingo da, maiatzaren 29tik ekainaren 7ra bitartean (YouTube.com/WeAreOne), eta munduko talentu handieneko artista, narratzaile eta programatzaile batzuk bilduko ditu ahalegin komunaren inguruan, entretenimendua eskaintzeko eta COVID-19aren pandemia borrokatzen ari diren erakundeei laguntzeko.

We Are One: A Global Film Festival zinema-jaialdiak kultura ezberdinak irizpide artistikoetatik ezagutzeko aukera eskainiko die ikusleei: sail ofizial bakoitza prestatzeko orduan, parte hartu duen zinema-jaialdi bakoitzaren berezitasunak nabarmentzea izan dute helburutzat, eta, aldi berean, zinemagileei agertoki globalean ahotsa ematea. Film askok debuta egingo dute zinema-jaialdian; programazioak 100dik gora film ditu, tartean munduko 13 estreinaldi, 31 'online' estreinaldi eta nazioarteko bost 'online' estreinaldi barne hartuta.

Zinema-jaialdiaren programazioak nazioarteko bokazioa du zinez; 35 herrialde baino gehiago egongo dira ordezkatuta eta honako hauek hartuko ditu barnean: fikzioko 23 film luze eta zortzi dokumental; fikzioko 57 film labur eta 15 film labur dokumental; artxibategietako 15 solasaldi (baita zinema-jaialdiko lau solasaldi esklusibo ere) eta errealitate birtualeko bost pieza.

Programazioan honako hauek nabarmentzen dira: Ricky Powell: The Individualisten aurkezpena, kaleko argazkilari gogoangarriari buruzko dokumentala, Natasha Lyonne eta LL Cool J-en elkarrizketekin; Eeb Allay Ooo!ren 'online' estreinaldia, "tximino-uxatzaile" profesionalei buruzko satira paregabea, Mumbaiko zinema-jaialdiko Young Critics Choice sariaren irabazlea; eta Iron Hammer, Jenny Lang Ping Txinako boleibolaren izar olinpikoari buruzko dokumental liluragarria (aitzindari bat izan zen eta loturak sortu zituen mundu osoan zehar). Ikusleek 50 film labur narratibo eta dokumental baino gehiago ikusi ahal izango dituzte, proposamen interesgarriak tartean. Honako hauek, besteak beste: The Yalta Conference Online fikzioko film labur japoniarraren munduko estreinaldia, Koji Fukada zuzendariak zinema-jaialdirako berariaz sortua; Third Eye Blind ekoiztetxearen Motorcycle Drive By film labur dokumentalaren munduko estreinaldia, bai eta Dreamworks Animation-en lehen film laburrak ere: Bilby, Marooned eta Bird Karma. Telesailen programazioari dagokionez, Losing Aliceren munduko estreinaldia nabarmendu beharra dago, protagonistak emakumeak diren Israelgo thriller psikologiko neo-noir bat, eta And She could be next, bi ataleko telesail dokumentala, kargu publiko baterako aurkezten diren emakume beltzen esperientziei buruzkoa (Stacey Abrams eta Rashida Tlaib ere ageri dira).

We Are One: A Global Film Festivalek ekitaldi honetarako hautatutako zenbait solasaldi antolatuko ditu; horietako batzuk zinema-jaialdien aurreko edizioetan egin dira, eta ekitaldi honetarako bereziki antolatuak dira beste batzuk. Ikusleek zinemaren une garrantzitsuak berriz bizitzeko aukera izango dute horiei esker. Elkarrizketotan honako hauek egongo dira: Francis Ford Coppola eta Steven Soderbergh, Song Kang-ho eta Bong Joon-ho, Guillermo del Toro, Jane Campion eta Claire Denis. 360 errealitate birtualeko sailean Emmyrako izendatutako Travelling While Black dokumentala dago, eta Atlas V, Bill Skarsgård protagonista duen zientzia-fikzioko istorio bat, bai eta protagonista ezagunak dituzten beste batzuk ere, hala nola John Legend, Oprah Winfrey eta Lupita Nyong'o. Musika-emanaldi bereziak ere egongo dira, 30 minutuko DJ saio bat ere, Questlove-ren eskutik.

"Oso pozik gaude aste honetan munduarekin partekatu ahal ditugulako zinema-jaialdiaren gure bazkideen eta YouTuberen baterako ahaleginak", adierazi du Jane Rosenthalek, Tribeca Entreprises eta Tribeca Film Festivalen sortzaile eta zuzendari exekutiboak. "Elkarrekin programazio erakargarria hautatu ahal izan dugu, zinema-jaialdi bakoitzaren bereizgarri diren irizpideen adierazle argia. We Are One: A Global Film Festivalek zinema ez ezik, ikusten dugun istorio bakoitza gogoangarri izatera daramaten ezaugarri paregabeak ospatzeko aukera ere eskainiko die ikusleei".

"Filmen eta ikus-entzunezko beste eduki batzuen gauza ederrenetako bat istorioak kontatzeko eta pertsonak –non bizi diren edo nongoak diren axola izan gabe– batzeko gaitasuna da. Fenomeno hori urte askoan ikusi dugu YouTuben, baina bereziki gaur egun, pertsonek elkarren arteko lotura eta entretenimendua bilatzen baitituzte", adierazi du Robert Kyncl-ek, YouTubeko zuzendari komertzialak. "Tribeca Enterprises-ek We Are One: A Global Film Festivalerako koordinaturiko programazioak badu mundu osoko ikusleak, zinema-jaialdiaren gure bazkide estimatuen ikuspegi bereziaren bitartez, denborako une berezi batera garraiatzeko ahalmen magiko hori".

Zinema-jaialdi globalak parte hartzen duten zinema-jaialdi hauen nortasunaren arabera hautatutako programazioa izango du: Annecy, Berlin, Londres, Cannes, Guadalajara, Macao, Rotterdam, Jerusalen, Mumbai, Karlovy Vary, Locarno, Marrakex, New York, Donostia, Sarajevo, Sundance, Sydney, Tokio, Toronto, Tribeca eta Venezia.

"Zinema ez da lan kolektibo bat soilik, esperientzia partekatua ere bada. Urruntze sozialeko garaiotan, lankidetzarako espiritua eta komunitate-sena inoiz baino beharrezkoagoak dira. Horrenbestez, atsegin handiz parte hartu dugu We Are One ekimenean. Artista zoragarri horiei guztiei opa diegu ikusleek haien lana laster pantaila handian berriz ikusi ahal izatea", esan dute Mariette Rissenbeek eta Carlo Chatrian Berlinaleren arduradunek.

"Ohoratuta eta zoriontsu gaude We Are One ekimenarekin bat egiteko aukeragatik, Tribecako gure lagunekiko adiskidetasun eta elkartasunaren adierazle, eta, aldi berean, munduko audientziari erakutsiko diogu Venezian zinemagile hasiberriak babesteko zehazki zer egiten dugun", gehitu du Veneziako zinema-jaialdiaren zuzendari Alberto Barberak.

Donostia Zinemaldiaren zuzendari José Luis Rebordinosen hitzetan, We Are One "aparteko esperientzia" da, "garai oso zail hauetan" zinema-jaialdien arteko lankidetza ahalbidetzen duena. Era horretan, "zinemagileek irudi eta soinuekin kontatzen dizkiguten istorio horiek mundu osoko etxe guztietara eta pertsona guztiengana iritsi ahal dira".

Bere xedeari jarraikiz, We Are One: A Global Film Festivalek artistak, sortzaileak eta programatzaileak bilduko ditu nazioarteko ekitaldi baten inguruan, istorioak kontatzearen arte paregabea goraipatzeko. Helburua da ikusleei, gehien behar den unean, lasaibidea eta entretenimendua ematea, baina baita pertsona horiek dohaintzak egiteko aukera izatea ere; hain zuzen ere, honako erakunde hauei, besteak beste: Osasunaren Mundu Erakundea (OME), UNICEF, ACNUR, Save the Children, Mugarik Gabeko Medikuak, Leket Israel, GO Foundation eta Give2Asia. Ikusleek COVID-19aren aurka borrokatzen lagundu ahal izango dute film bakoitzaren orrian egongo den dohaintza egiteko botoi edo esteka baten bitartez.

Zinema-jaialdiaren programa osoa hemen ikus daiteke: www.weareoneglobalfestival.com.


Urrezko Maskor bat eta euskal kulturari eta gastronomiari buruzko ekoizpenak

Donostia Zinemaldiak hiru izenburu hautatu ditu We Are One ekimenean proiektatzeko: Los pasos dobles / The Double Steps  (Oinkada bikoitzak, 2011), Urrezko Maskorra irabazi zuen Isaki Lacuestaren film luzea, eta euskal kulturari eta gastronomiari buruzko bi produkzio, Dantza (Telmo Esnal, 2018) eta Mugaritz BSO (Felipe Ugarte, Juantxo Sardon, 2011). Donostia Zinemaldiaren zuzendari José Luis Rebordinosen hitzetan, hautatutakoak film "garrantzitsuak" dira Donostiako lehiaketaren duela gutxiko historian eta, bere iritziz, We Are One "aparteko esperientzia" da, "garai oso zail hauetan" zinema-jaialdien arteko lankidetza ahalbidetzen duena. Era horretan, "zinemagileek irudi eta soinuekin kontatzen dizkiguten istorio horiek mundu osoko etxe guztietara eta pertsona guztiengana iritsi ahal dira".
 

LOS PASOS DOBLES / THE DOUBLE STEPS  (Oinkada bikoitzak) (Sail Ofiziala –Urrezko Maskorra–, 2011)
Isaki Lacuesta (Girona, 1975) Donostia Zinemaldiko ohiko izenetako bat da. Urrezko Maskorra irabazi zuen François Augiéras (1925-1971) margolari eta idazte frantsesaren nobela-itxurako biografian oinarritutako fikzio honekin. Artistak basamortuko bunker militar bat pinturez estali zuen, eta hareatzan hondoratzen utzi zuen, XXI. mendera arte inork aurkitu ez zezan. Bunkerraren bilaketak mitoa elikatzen du oraindik... Nor da Augiéras? Legionarioa, pintorea, idazlea, pistolaria, santua, lapurra, deabrua, edo horren guztiaren nahasketa bat? Miquel Barceló artistaren partaidetza du filmak, rol nagusietako batean. "Funtsean abentura-film bat da, mami erdi dokumentala baduen arren. Arte afrikar eta espainiarrarekin zerikusia duen altxor baten bila Afrikara egindako bidaia bat kontatzen du", gogorarazi du José Luis Rebordinosek.
 

DANTZA (Sail ofiziala –emanaldi berezia–, 2018)
Telmo Esnalek (Zarautz, 1967) Sail Ofizialean parte hartu zuen film honen emanaldi bereziarekin, eta Glocal in Progress Industria sariaren irabazle izan zen Europan hizkuntza ez-hegemonikoetan egindako ekoizpenetarako jardueraren lehen edizioan. Dantza film musikala da, zeinak euskal dantzen eta haien sinbologiaren bitartez gizakiaren bizitzaren zikloari eta eboluzioari buruzko istorio bat kontatzen duen: existentziaren mirariari buruzko kontakizuna, tradizioari, lurrari, bere jendeari, mitoei eta ohiturei eskainitako kantu poetikoa ere badena. "Dantzak urtaroen eta maitasunaren joana kontatzen du... Fikzio-istorio bat da, osotasunean euskal abesti, musika eta dantza tradizionalaren bitartez kontatua", azaldu du Donostia Zinemaldiaren zuzendariak.
 

MUGARITZ BSO (Culinary Zinema, 2011)
Culinary Zinemak, Berlingo nazioarteko zinema-jaialdiarekin elkarlanean sortutako lehiaz kanpoko sailak, zinema eta gastronomia batzen ditu, eta Felipe Ugarte musikaria eta Andoni Luis Aduriz sukaldaria zuzendari dituen euskal film hau hartu zuen. Mugaritz jatetxeko chefak eta txalapartariak gastronomia-menu bat esperientzia musikal bihurtu nahi dute: errezetak soinu-mundu fidel eta gardena erreproduzitzen saiatzen dira, eta musika-konposizio bihurtzen dituzte dastamenaren bitartez aditutako sentipenak. "Mugaritz jatetxearen lerroan, zortzi plater zortzi konposizio musikal bihurtzen dira, eta horietan gure sukaldaritza hurbilenaren onenaz gain, munduko beste sukaldaritza batzuk ere badaude ordezkatuta", azaldu du Rebordinosek.


ZINEMALDIAREN EMISIOAK ESPAINIAKO ORDUTEGIAN

  • Mugaritz BSO: 2020/5/30 (17:00etan).
  • Dantza: 2020/6/4 (18:15ean).
  • Los Pasos Dobles (Oinkada bikoitzak): 2020/6/5 (16:15ean).

Tribeca Enterprises konpainiari buruz
Tribeca Enterprises istorioak kontatzeko plataforma anitzeko konpainia da, Robert De Nirok eta Jane Rosenthalek 2003an sortua. Artistei egiten dituzten lanen audientzia zabaltzeko plataforma apartak eskaintzen dizkie eta, kontsumitzaileei, istorioak kontatzeko esperientziara, film independentetara eta ikus-entzunezko ekoizpenatara gerturatzeko modu berriak. Konpainiak entretenimenduarekin lotutako negozio sare bat du, besteak beste, honakoak barnebiltzen dituena: Tribecako zinema-jaialdia, Tribecako telebista-jaialdia eta entretenimendu produktuak ekoizten dituen Tribeca Studios.

YouTuberi buruz
2005eko maiatzean martxan jarri zenetik, YouTubek jatorrizko sorkuntzako bideoak ezagutu, ikusi eta partekatzeko aukera eskaintzen die dituen milaka miloi erabiltzaileei. YouTubek konektatzeko, informatzeko eta gainontzekoak inspiratzeko foro bat eskaintzen du, eta jatorrizko edukien sortzaileen eta iragarle handi eta txikien banaketa plataforma bat bezala funtzionatzen du. Googleren menpeko enpresa bat da YouTube.

We Are One ekimenari buruz
Zinema-jaialdi globalak parte hartzen duten zinema-jaialdi hauen nortasunaren arabera hautatutako programazioa izango du: Annecy, Berlin, Londres, Cannes, Guadalajara, Macao, Rotterdam, Jerusalen, Mumbai, Karlovy Vary, Locarno, Marrakex, New York, Donostia, Sarajevo, Sundance, Sydney, Tokio, Toronto, Tribeca eta Venezia. Programazio osoa YouTuben doan proiektatuko da. Jaialdia jarraitzeko, programazioa kontsulta daiteke, eta egutegia We Are One ekimenaren kanal ofizialetan dago: www.weareoneglobalfestival.com

 

 

FAQ - WE ARE ONE: OHIKO GALDERAK


ZER DA WE ARE ONE: A GLOBAL FILM FESTIVAL?
We Are One: A Global Film Festival 10 eguneko 'online' zinema-jaialdi bat da. YouTuben bakarrik izango da, eta ideia hau du sorburuan: zinemaren munduko komunitateak krisi-garaietan bat egin dezake, hala zinema ospatzeko nola COVID-19aren aurkako borrokari laguntzeko.

ORDAINDU BEHAR AL DUT FILMAK IKUSTEKO?
Film eta programa guztiak doan eskura daitezke denbora mugatuan COVID-19aren kontrako borrokarako funtsak biltzeko.

NORI ZUZENDUKO ZAIO DIRUA?
We Are Onek eta parte hartzen duten zinema-jaialdiek helburu goraipagarriak dituzten zenbait erakunde aukeratu dituzte, hala nola Osasunaren Mundu Erakundearen (OME) COVID-19 Laguntza Funtsa, UNICEF, ACNUR, Mugarik gabeko Medikuak, Save The Children, Go Foundation, Artist Relief Fund eta Give2ASIA.

NOIZ DA ZINEMA-JAIALDIA ETA NON IKUS DEZAKET?
Hamar eguneko 'online' zinema-jaialdia maiatzaren 29tik ekainaren 7ra bitartean izango da, helbide honetan: www.youtube.com/weareone. Film edo programa bakoitzaren lehen emanaldia egingo da zehaztutako orduan, baina orduan ikusterik ez baduzu, film asko eskuragarri egongo dira VoD sisteman (eskatu ahalako bideoa), zinemaldiaren iraunaldian nahi duzunean ikusteko.

ZER FILM MOTA PROGRAMATUKO DIRA?
Zinema-jaialdiaren programatzaileek filmak aukeratzeko orduan, 'online' estreinaldia haien ibilbidean beste urrats estrategiko bat gehiago izatea hartuko dute kontuan batez ere. Hori horrela, filmen artean honelakoak egongo dira: berriak eta aurretik eman gabeak, 2020ko zinema-jaialdietan estreinatu behar zituztenak, bai eta ikasle ohien lanak eta zinema-jaialdiaren herrialdeko filmak ere, nazioartean gutxi erakutsitakoak. Horren guztiaren osagarri hitzaldiak, solasaldiak eta emanaldiak ere egongo dira. 'Online' zabalpen handia izan ez duten lanetan jarriko da arreta. Aukera bat da mundu osoko zinema-jaialdiak aurretik inoiz ez bezala biltzeko, eta ikusleek oro har erraz eskuratzeko moduko programazioa egiteko. Era horretan, bertako filmetan eta talentuan jarriko dugu arreta, eta plataforma global batean erakutsiko dizkizuegu, baina, horrekin batera, zinema-jaialdi bakoitzaren ildo artistikoaren lagin bat ere eskainiko diegu ikusleei.

ETA INORK GALDETZEN BADU NON EMATEN DUTEN?
Bideratu We Are One-ren YouTube kanalera: https://www.youtube.com/WeAreOne.

ETA INORK ORDUTEGIAZ GALDETZEN BADU?
Hemen dago ordutegia: www.weareoneglobalfestival.com..

ETA INORK GALDETZEN BADU NOIZ ESTREINATUKO DUTEN FILM ZEHATZ BAT?
Filmei buruzko informazioa hemen dago: www.weareoneglobalfestival.com..

PROGRAMAZIOA ESKURAGARRI EGONGO DA ZINEMA-JAIALDIA AMAITU ONDOREN?
Zinema-jaialdiaren amaiera ofiziala ekainaren 7an izango da; halere, zinema-jaialdian estreinatutako programazioa 10 egun egongo da eskuragarri. Hortaz, programazioa ekainaren 14ra arte egongo da eskura. Egun horretatik aurrera, programazioa ez da dagoeneko eskura egongo We Are One-ren YouTube kanalean.

NON DAGO PROGRAMAZIO GUZTIA JASOTZEN DUEN EGUTEGIA?
Programazio guztia ikus dezakezu hemen: www.weareoneglobalfestival.com.

NOREKIN JARRI BEHAR DUT HARREMANETAN LAGUNTZA TEKNIKOA BEHAR BADUT?
support@weareoneglobalfestival.com
 


Babesle Ofizialak:
Laguntzaile Ofizialak:
Instituzio Kideak:
© Donostia Zinemaldia | Desarrollado por: Yo Miento Producciones

Webgune hau berezko eta kanpoko cookies-az baliatzen da, erabiltzaile gisa esperientzia hobea eskaintzeko. Informazio gehiago Onartzea