Rifkin’s Festival Woody Allenen film berriaren munduko estreinaldiak emango dio hasiera, lehiaketatik kanpo, 68. Donostia Zinemaldiari, irailaren 18an, Kursaal auditoriumean.

Filma, The Mediapro Studio, Gravier Productions eta Wildside ekoiztetxeena, joan den udan filmatu zen, Donostian eta Gipuzkoako beste herri batzuetan. Donostia Zinemaldira joango den bikote ezkondu estatubatuar baten istorioa kontatzen du: senar-emazteak liluratuta geratuko dira zinema-jaialdiarekin, hiriaren edertasun eta xarmarekin eta zinemaren munduaren fantasiarekin; emazteak affaire bat izango du zinema-zuzendari frantziar batekin eta senarra hirian bizi den emakume batekin maiteminduko da. 

Woody Allenek idatzi eta zuzendu duen komedia erromantiko honetan aktore hauek aritu dira: Elena Anaya –Wonder Woman, La piel que habito–, Louis Garrel –J’accuse, L’homme fidèle–, Gina Gershon –The Insider–, Sergi López –A Perfect Day, El laberinto del fauno–, Wallace Shawn –Radio Days, Princess Bride, Marriage Story– eta Christoph Waltz –Spectre, Django Unchained eta Inglourious Basterds (azken bi film horiengatik bi Oscar® eskuratu ditu)–.

Bigarren aldia da Allenek Donostia Zinemaldia inauguratzen duena; 2004an, Melinda and Melinda lanarekin ere hala egin zuen. Urte hartan, Zinemaldiak Donostia saria eman zion, eta Zuzendariaren obraren atzerabegirakoa antolatu zuen: Woody Allen ezagutu. New Yorkeko zinemagile honekin 1970eko hamarkadaren amaieran hasi zen harremana: garai hartan Sail Ofizialean, lehiaz kanpo, zein gainerako sailetan zinemagilearen filmak eman ziren: Manhattan (1979), Zelig (1983) eta Manhattan Murder Mistery (1993). 1985ean, Zabaltegi sortu berria The Purple Rose of Cairo filmarekin inauguratu zen. Azken urteetan, bere filmetako batzuk eman dira Perlak sailean: Match Point (2005), Vicky Cristina Barcelona (2008, orduan ere zuzendaria Zinemaldian egon zen, Javier Bardem eta Penélope Cruz lagun), Whatever Works (2009) eta Irrational Man (2015).

Rifkin’s Festival Mediaprok eta zuzendari eta gidoigileak elkarlanean egin duten laugarren lana da. Lehenago, Espainiako enpresa horrek Midnight in Paris (2011), You Will Meet a Tall Dark Stranger (2010) eta Vicky Cristina Barcelona (2008) filmak ekoitzi ditu, bi Oscar® sari eskuratu zituztenak, beste hainbat aitorpen eta garaikurrez gain. Espainian, TriPictures arduratuko da banaketaz eta The Mediapro Studio Distribution atzerrian saltzeaz.