Ofiziala
Partner
"Z365" edo "Zinemaldia urte osoan" Zinemaldiaren apustu estrategiko berria da, non talentu berrien bilaketa, laguntza eta garapena (Ikusmira Berriak, Nest); formakuntza eta zinema-ezagutzen transmisioa (Elias Querejeta Zine Eskola, Zinemaldia + Plus, Zinemagileen elkarrizketa); eta ikerketa, dibulgazioa eta pentsamendu zinematografikoa (Z70 proiektua, Pentsamendua eta eztabaida, Ikerketa eta argitalpenak) elkartzen diren.
Deialdia Sartu NIRE ZINEMALDIRA 
Agenda Programa eta sarrerak 
Bilatu 
Zinemaldia Startup Challenge ikus-entzunezkoen arloan teknologia berriak sartzean oinarritutako enpresa-proiektuak proposatzen dituzten talde ekintzaile eta startup sortu berrientzako lehiaketa da, eta aurtengo edizioaren −bigarrenaren− deialdiak 40 proiektu jaso ditu Europako bederatzi herrialdetatik (Alemania, Danimarka, Espainia, Estonia, Italia, Norvegia, Herbehereak, Erresuma Batua eta Suedia).
Eusko Jaurlaritzako Ekonomiaren Garapen eta Azpiegitura Sailak sustatutako deialdi horren esparrua Europa da, eta aurten jasotako proposamenen bidez konponbide berritzaileak proposatzen dira ikus-entzunezkoen arlorako, betiere honako teknologia hauetan oinarrituta, besteak beste: big data, errealitate areagotua, errealitate birtuala, Internet of Things, blockchain, adimen artifiziala eta 3D inprimaketa.
Zinemaldia & Technology jardunaldian euren proposamena defendatuko duten bost proiektu finalistak honako hauek dira: PromoMii britainiar aplikazioa, adimen artifizialaren bidez bideoak sortzeko eta editatzeko prozesuak automatizatzen dituena; Cinesmart kataluniar plataforma, big data baliatuz eta advergamingean oinarrituta, zinema-erakustegiei zuzenduta dagoena. Compliance Management Solution for the Film and TV Industry norvegiar plataforma, adimen artifizialean eta machine learningean oinarrituta egonik hainbat lurraldetako araudi espezifikoak betetzen laguntzeko balio duena; FilmChain, Erresuma Batuko enpresa batek garatutako aplikazioa, blockchain teknologiaren bitartez ikus-entzunezkoen alorreko eragile guztien arteko finantza-transakzioak errazten dituena; eta La Quinta Pared, Alemanian garatutako aplikazioa, non erabiltzailearen mugikorra film bateko protagonistaren mugikor bihurtzen den, narratiba transmedia ekarreragileen garapena sustatzeko.
Bost finalista horiek urtebetez Euskadiko Parke Teknologikoen Sareko BICetako (Business Innovation Center) bateko inkubaziogunean integratzeko aukera izango dute, eta 500.000 eurorainoko finantzaketa ere eskuratu ahalko dute, euren proiektuak gara ditzaten. Halaber, proiektu irabazleak −epaimahai batek izendatuak− 10.000 euro jasoko ditu.
Zinemaldia & Technology jardunaldia online egingo da aurten, COVID-19ak eragindako egoera dela-eta, irailaren 25ean (ostirala), eta bost proiektu finalisten aurkezpenak barne hartuko ditu, baita laster iragarriko den eskola magistral bat ere.
Eusko Jaurlaritzak, Ekonomiaren Garapen eta Azpiegitura Sailaren bitartez, Zinemaldia Startup Challenge sustatzen du, Zinemaldia & Technology jardunaldiaren esparruan, zeina Donostia Zinemaldiak, Tecnaliak, Tabakalerak (2deo ikus-entzunezkoen laborategiaren bitartez) eta Petronorrek antolatzen baitute, eta Vicomtech ikerketa aplikatuko zentroaren laguntza ere badu.
Creative Europe MEDIA programaren babesa, European Film Forum plataformaren bidez.
Jardunaldiak, gainera, European Film Forum ekimenaren bidez, Creative Europe MEDIA programaren babesa jasotzen du; Europako industria zinematografikoa eta ikus-entzunezkoa indartzea da MEDIA programaren xedea. Zinemaldia & Technology Donostia Zinemaldiaren apustu bat da, ikus-entzunezko teknologiari eta industriari buruz hausnartzeko gune erreferente gisa finkatzeko helburua duena.
Proiektuaren deskribapena: trailerrak sortzeko zereginean lanordu- eta denbora-kostu handiagoa duten prozesuak −hala nola irudiak hartzea, transkribatzea eta analizatzea− automatizatzen dituen irtenbide teknologikoa. Automatizazio horri esker, kontzeptuan eta azken emaitzan jar dezakete arreta sortzaileek. Tresnak aukera ematen die erabiltzaileei beren ekoizpenen ikusgarritasuna handitzeko eta eskala handiko bideo pertsonalizatuak sortzeko.
Proiektuaren deskribapena: Cinesmart marketin digitaleko publizitate-plataforma bat da, big data biltzeko, zinema-erakusleei eta bestelako ekitaldiei zuzendua, advergamingean oinarritua, non ikusleek pantaila handiarekin elkarrekintzan jarduten duten beren gailu mugikorraren bidez.
Proiektuaren deskribapena: web plataforma, aukera ematen diena editoreei beren bideoak hartu eta automatikoki aztertzeko zenbateraino betetzen dituzten bideo horiek lege-baldintza jakin batzuk, eta prozesu jakin batzuk automatizatzea ere ahalbidetzen du (adibidez, adinen araberako sailkapena).
Proiektuaren deskribapena: FilmChain baliabideak eduki-sortzaileak, finantzariak, salmenta-konpainiak eta banatzaileak babesten ditu, funtsen transferentzia, eskubideen kontrola eta ekoizpen bakoitzaren errentagarritasunaren ezagutza automatizatzen baititu. Kobrantza automatizatuko zerbitzu digitala da, filmek, telebistarako ekoizpenek eta eduki digitalek sortutako diru-sarrerak bildu, banatu eta analizatzen dituena.
Proiektuaren deskribapena: gailu teknologiko bat edo bigarren pantaila bat da, pantaila nagusiarekin sinkronizatu eta elkarreragiteko balio duena, ikuslearen mugikorra istorioko protagonistaren mugikor bihurtu eta transmedia kontakizunerako aukera ugari sortzen baititu.
Astelehenetik ostegunera: 09:00 - 15:00.
Ostiraletan: 10:00 - 14:00