2020an egindako beste hainbat ekitaldi bezalaxe, Donostia Zinemaldia ezin izango da egin aurreko urteetako baldintza berberetan. COVID-19aren pandemiak Zinemaldia egokitzera behartu du, bi helburu nagusi lortze aldera: lehenik eta behin, gune seguru bat sortzea, eta bigarrenik, ahalik eta zinema-esperientzia atseginena proposatzea. Zinemaldiak, Eusko Jaurlaritzaren Osasun Sailarekin koordinatuta, honako neurri nagusi hauek hartu ditu, besteak beste:

• Edukiera txikiagoak izango dituzte aretoek: Kursaaleko auditorioan % 40koa izango da (gehienez, 600 ikus-entzule); Victoria Eugenia Antzokian, Antzoki Zaharrean eta Kursaal 2n, berriz, % 50ekoa; eta gainerako zinema-aretoetan (Tabakalera, Trueba, Príncipe eta Antiguo Berri), azkenik, % 60koa. edukiera-murrizketa hori Zinemaldiko jarduera guztietan aplikatuko da (prentsaurrekoak, argazki-saioak, aurkezpenak, etab.).

• Emanaldien kopurua txikiagoa izango da (2019an baino 159 emanaldi gutxiago, %23 gutxiago), baita filmena ere (2019an baino 65 gutxiago, %31), sarbide ordenatuagoak ahalbidetzeko eta husteko denbora irabazteko. Zinema-industriarako eta Pentsamendua eta eztabaida izeneko arlo berrirako jarduera gehienak online egingo dira, eta aurrez aurreko formatua emanaldietarako baino ez da gordeko.

• Zinema-aretoak desinfektatu egingo dira saioen artean: Kursaal Auditorioan, Kursaal 2n, Victoria Eugenia Antzokian eta Antzoki Zaharrean –edukiera handieneko aretoetan– emanaldien arteko tarteak 90 minutu iraungo du, eta gainerako guneetan, ordea, ordubetekoak izango dira tarteak. 

• Egoitza (Belodromoa eta San Telmo Museoa) eta ekitaldi sozialak (inaugurazio- eta itxiera-jaiak, euskal zinemaren jaia) bertan behera utziko dira.

• Maskara nahitaez erabili beharko da uneoro. Emanaldia lau ordutik gorakoa bada (adibidez, Patria, We Are Who We Are eta Andisturbios telesailen emanaldiak), derrigorrezkoa izango da maskara profesional homologatu bat eramatea (KN95 edo FFP2), Osasun Sailak emandako aginduan egoera berezietarako ezarritakoari jarraikiz.

• Sarrerak zenbakidunak izango dira eta online erosiko dira, kutsadurarik gerta ez dadin eta trazabilitatea errazte aldera, hots, positibo bat erregistratuz gero arrastoa identifikatzeko eta hari jarraipena egiteko aukera izate aldera. Zinemaldia Plaza zerbitzua kendu da eta zinema-aretoetako txarteldegiak bakarrik mantenduko dira hilaren 18tik; gainera, kreditu-txartelarekin ordaintzea gomendatzen da.

• Salmenta mailakatua izango da publikoarentzat: ohi bezala, sarreren salmenta Zinemaldiaren aurreko igandean hasiko da, irailaren 13an (9:00etan), baina Zinemaldiaren lehen hiru egunetarako sarrerak baino ezingo dira erosi (18a –ostirala–, 19a –larunbata– eta 20a –igandea–). Hilaren 14an, berriz, 21erako, 22rako eta 23rako (astelehena, asteartea eta asteazkena, hurrenez hurren) sarrerak erosi ahal izango dira, baita aurreko egunetako gainerako sarrerak ere. Hilaren 15ean, azkenik, 24ko, 25eko eta 26ko –hurrenez hurren, osteguna, ostirala 25 eta larunbateko– saioetarako txartelak erosi ahalko dira, baita aurreko egunetako gainerako sarrerak ere. Hilaren 16tik aurrera, saio guztietarako sarrerak erosten jarraitu ahal izango da. Ikus-entzule bakoitzak gehienez bi sarrera erosi ahal izango ditu saio bakoitzeko, eta erosketa bakoitzean gehienez 20 txartel. Aurretiko salmentan, Kutxabankeko Gazte Txartelarekin bakarrik egingo dira deskontuak. Zinemaldiak egunero eskainiko dizkie sarrerak, % 25eko deskontuarekin, posta-zerrendan harpidetzen diren pertsonei, eta bertan jakinaraziko zaie egunero halako zenbat sarrera geratzen diren libre.

• Publikorik gabe egongo dira alfonbra gorriak: zoritxarrez, aurten zinemazaleek ezingo dizkiete autografoak eskatu izarrei, ezta horien zain egon ere argazki-saioetan eta alfonbra gorrietan. Edizio honetan, profesionalek baino ezingo dituzte erabili gune horiek; zehazki, berri-emaile grafikoak ibilbidean zehar egongo dira, eta derrigorrezko distantzia fisikoari eutsiko diote.

• Programazioa online ipiniko da: Zinemaldiak ahalegin berezia egingo du webgunea prestatzeko, erabiltzaileei aukera emate aldera jarduerei haren bidez jarraitzeko. Egunero argitaratuko da online egongo den programazioa: Sail Ofizialeko eta Donostia Sariko prentsaurreko guztiak, zinema-industriako profesionalen galak, aurkezpenak eta eskola magistralak. Halaber, Donostia bisitatuko duten izarrek zinemazaleekin egingo diren topaketetan parte hartuko dute Zinemaldiko sare sozialen bidez.

Sarreren salmenten inguruko xehetasun eta baldintzak Donostia Zinemaldiaren webgunean kontsultatu daitezke Sarreren salmentari buruzko informazioa atalean.