Lara Izagirrek (Amorebieta-Etxano, Bizkaia, 1985) Ikus-entzunezko Komunikazioko gradua lortu zuen Euskal Herriko Unibertsitatean, New York Film Academy ikastetxean zinema ikasten jarraitu zuen eta ESCACeko gidoi-masterra egin zuen. 2010ean Gariza Produkzioak ekoiztetxea sortu zuen, eta horren bidez idatzi, zuzendu eta ekoitzi ditu Bicycle Poem (2010), Kea (2012), Next Stop: Greenland (2012), Sormenaren Bide Ezkutuak (2013) −Donostia Zinemaldiko Culinary Zinema sailean aurkeztua− eta Larroxa (2013) film laburrak. 2015ean Un otoño sin Berlín fikziozko bere lehen film luzea estreinatu zen Donostia Zinemaldiko Euskal Zinemaren Galan. Haren protagonista nagusia antzeztu zuen aktoreak, Irene Escolarrek, emakumezko errebelazio-aktore onenaren Goya Saria eskuratu zuen. Nora hautatua izan zen Donostia Zinemaldiko Koprodukzio Fororako 2018an.