Ofiziala
Partner
"Z365" edo "Zinemaldia urte osoan" Zinemaldiaren apustu estrategiko berria da, non talentu berrien bilaketa, laguntza eta garapena (Ikusmira Berriak, Nest); formakuntza eta zinema-ezagutzen transmisioa (Elias Querejeta Zine Eskola, Zinemaldia + Plus, Zinemagileen elkarrizketa); eta ikerketa, dibulgazioa eta pentsamendu zinematografikoa (Z70 proiektua, Pentsamendua eta eztabaida, Ikerketa eta argitalpenak) elkartzen diren.
Deialdia Sartu NIRE ZINEMALDIRA 
Agenda Programa eta sarrerak 
Bilatu 
Sailak errealizadoreen hiru lehen lan bilduko ditu, baita Zinemaldian jada izan diren beste zuzendari batzuen lan berriak ere, hala nola Paz Fábregarena, Alonso Ruizpalaciosena eta Lorenzo Vigasena
Horizontes Latinos sailaren 2021eko edizioko hautaketak hamar film latinoamerikar bilduko ditu Donostia Zinemaldian; zehazki, Argentina, Brasil, Kolonbia, Costa Rica, Mexiko, Suitza, Uruguai eta Venezuelako zinemagileek zuzendutako hamar film izango dira, besteak beste, Zinemaldiko work in progress latinoamerikarreko bost film eta hiru lehen lan; halaber, beste edizio batzuetan ere sailean izan ditugun errealizadoreak itzuliko dira, hala nola, Paz Fábrega, Alonso Ruizpalacios eta Lorenzo Vigas.
Iván Funden Piedra noche / Dusk Stone –2020ko WIP Latam Industria Sariaren irabazlea– Horizontes Saria irabazteko lehiatuko da, Veneziako Giornate degli Autori atalean egon ondoren. Cannes, BAFICI eta Mar del Platako lehiaketetan saritu dute zinemagile argentinarra ekoitzi dituen aurreko filmengatik, eta bikote ezkondu baten doluari buruzko istorioa kontatuko digu oraingoan.
El empleado y el patrón / The employer and the employee filmak –2020ko WIP Latam onenaren Egeda Platino Industria Sariaren irabazleak– Horizontes sailari amaiera emango dio. Zuzendariak (Manuel Nieto Zas uruguaitarra, Rotterdam eta Habanako jaialdietan saritua) Canneseko Quinzaine des Réalisateurs atalean estreinatu zuen bere hirugarren filma, Nahuel Pérez Biscayart protagonista duena.
WIP Latam harrobiko beste film batek, Jesús López izenekoak, munduko estreinaldia izango du Donostian, eta saila irekiko du. Maximiliano Schonfeld film-zuzendari argentinarrak Berlinen aurkeztu ditu bere aurreko lanak, eta Abel izeneko mutiko batek bere lehengusu Jesús zirkulazio-istripu batean hil ondoren izango duen eraldaketa kontatuko digu oraingo honetan. Jesús López Proyecta ekimenean –Ventana Sur eta Donostia Zinemaldiaren arteko lankidetzan– ere hautatu zuten, 2018an.
Madalena pelikulak Rotterdamgo lehiaketa ofizialean parte hartu zuen Zinema Eraikitzen 36 ekimenean hautatua izan ondoren. Madiano Marcheti zuzendari brasildarraren lehen film luzeak Madalenaren desagerpenak lotzen dituen hiru pertsonaiaren istorioa kontatzen du.
Aurora, Paz Fábregaren film berria, Zinema Eraikitzen 37 lankidetza-jardueraren hautaketan egon zen (Desasosiego / Restless izena zuen orduan) eta Rotterdamen ere lehiatu zen. Zuzendari costarricarrak bigarren aldiz hartuko du parte Horizontes Latinos sailean, oraingoan Aurorarekin, 2010ean Agua fría de mar film luzea hautatu baitzen.
Lorenzo Vigas ere Horizontes Latinosera itzuliko da bere bigarren filma aurkeztera, La caja / The Box; izan ere, film horrekin, irailean Veneziako zinema-jaialdiko Urrezko Lehoia lortzeko lehiatuko da berriz ere zinemagilea, Desde allá filmarekin (2015ean bere debuta) lortu ondoren. Venezuelako errealizadoreak La caja filmarekin itxiko du aitatasunaren inguruko trilogia, Los elefantes nunca olvidan (2004) film laburrarekin hasi zuen hori.
Alonso Ruizpalacios mexikarrak Horizontes Saria irabazi zuen bere lehen filmarekin (Güeros, 2014), eta Una película de polícias / A Cop Movie filmarekin izango dugu gurenean aurten ere. Azken Berlinalean Urrezko Hartza lortzeko lehiatu zen errealizadorearen film berria eta Yibrán Asuaden muntaiagatik aparteko ekarpen artistikoren Zilarrezko Hartza lortu zuen.
Azor, Zinemaldiak programatuko duen beste film bat, Berlingo zinema-jaialdian izan zen baita ere (Encounters sailean). Europa-Latinoamerika V. Koprodukzio Foroan hautatua izan zen Azor. Andreas Fontana zuzendari suitzarraren lehen film luzeak Argentinako diktaduraren testuinguruan kokatzen ditu bi bankari, eta bankari horien desagerpena kontatzen digu.
Tatiana Huezo zuzendari mexikarrak Noche de fuego / Prayers for the Stolen aurkeztuko digu, Canneseko zinema-jaialdiko Un Certain Regard sailean aipamen berezia jaso zuen filma, hain zuzen. Noche de fuego Huezoren fikziozko lehen film luzea da, baina ez da egilea Donostian izan den lehen aldia, El lugar más pequeño bere ez-fikziozko filma 2011n programatutako 4 + 1: Mexikoko Zinema Garaikidea atzerabegirakoan jaso baitzen.
Amparok, Simón Mesa Sotok ekoitzitako lehen film luzeak, Cannesko Semaine de la Critique atalaren aurreko hautaketan bildu zenak, emakume bat du protagonista, eta Armadak haren semea erreklutatzen dueneko istorioa kontatzen digu. Zuzendari kolonbiarrak film labur onenaren Urrezko Palmorria irabazi zuen bere graduazioko film laburrarekin (Leidi, 2014).
Horizontes Latinos saila Donostia Zinemaldiak Latinoamerikarekin duen lotura sendoaren isletako bat da. Hautatutako film luze guztiak Espainian eman gabeak izaten dira, Latinoamerikan osorik edo partzialki ekoitziak, jatorri latinoko zinemagileek zuzenduak, edota marka edo gai gisa komunitate latinoak dituztenak; hautaturiko filmak Horizontes Saria (35.000 euro zuzendariarentzat eta filma Espainian merkaturatzeko ardura duen banatzailearentzat) irabazteko lehiatzen dira.
Horizontes Sariaren epaimahaiak du film horiek baloratu eta saritzeko ardura. Horizontes Latinos saileko filmak, zuzendariaren lehen edo bigarren lana badira, Gazteriaren TCM saria lortzeko hautagai ere badira. Sari hori 18 eta 25 urte bitarteko ikasleek osatutako epaimahaiak erabakitzen du.
|
FILMAK
Jesús López, lasterketetako pilotu gazte bat, istripuz hil eta herria hunkituta utziko du. Abel bere lehengusua da, norabiderik gabeko nerabea, eta pixkanaka Jesúsen lekua hartzeko tentazioa sentituko du. Jesúsen gurasoekin bizitzera joango da, haren arropa jantziko du, eta haren lagun eta neska-lagun ohiarekin irteten hasiko da. Hasieran, jendeak onartu egingo du jarrera hori, eta Abelek gogoko du rol hori. Baina bere lehengusuaren antza kezkagarri bihurtuko da, Jesús López bihurtzeraino. Herrian Jesúsen omenezko lasterketa antolatuko da. Bere lehengusuaren izpirituak bultzatuta, Abel hildakoaren autoa gidatzen hasiko da. Lasterketa horren emaitzak erabakiko du eraldaketa behin betikoa izango den ala ez.
Nagusia, itxuraz, dena alde duen gizon gazte bat da, baina arazo larri bat du: bere haurtxoaren osasun txarra. Langilea lan bila dabil bere ume jaioberria mantendu behar duelako, eta beraz, ez du zalantzarik izango nagusiak bere lurretan lan egiteko kontratatzea eskaintzen dionean, nahiz eta esperientziarik ez izan. Batak besteari lagunduko diote, baina egun batean istripu bat gertatuko da. Ezusteko gertaera horrek bi gizonen arteko harremana arriskuan jarriko du, bai eta bi familien etorkizuna ere.
Gaueko txanda luze baten ondoren, Amparo, bi seme-alaba dituen ama ezkongabea, etxera itzuliko da, baina seme-alabak ez daude han. Laster jakingo du Elías semea armadak errekrutatu duela, eta frontera bidaliko dutela, mugatik gertu dagoen gerra-eremu arriskutsu batera. Semearen patuak argia dirudi. Elías frontera joan baino egun bat lehenago, Amparok semearen artxiboak aldatu eta handik ateratzea eskainiko dion gizon batekin harremanetan jartzea lortuko du. Ia besterik ezer ere ez duela, Amparok denboraren aurkako lasterketa bati ekingo dio semea askatzeko, ustelkeriazko gizarte batean.
Luisa arkitekto gaztea batzuetan dantzaria da, eta beste batzuetan, maistra, eta haren bizitzaren bitartez, amatasun subrogatuak eta istorio txiki-txikiak korapilatzen dira. Zein da amatasunaren, noraezean ibiltzearen eta desiraren arteko lotura? Auroran, hainbat emakume maitagarriren bizitzez osatutako uhartedi intimoa zeharkatu eta kartografiatzen du galdera horrek, uhartedi horren erdi-erdian Yuliana egonik, amari bere haurdunaldia ezkutatu eta, horretarako, Luisaren konplizitatea aurkitzen duen nerabe bat.
Luzian, Cristiano eta Biancak ez dute ia zerikusirik, baina hirurak landa-eremuko udalerri berean bizi dira, Brasil mendebaldean, soja-zelaiez inguraturik. Elkar ezagutzen ez duten arren, Madalenaren desagerpenak guztiei eragingo die. Udalerriko hainbat lekutan, bakoitzak bere erara erreakzionatuko du Madalenaren absentziarekin.
Mexikoko mendietan kokaturiko herri bakarti batean, neskatoek mutilen tankerara mozten dute ilea eta lurpean ezkutalekuak dituzte. Anak eta bere bi lagun onenek ihesitako pertsonen etxeak okupatu eta emakumez mozorrotzen dira inork ikusten ez dituenean. Magia eta alaitasunezko unibertso zeharkagaitz batean bizi dira; bien bitartean, amek esklabo edo mamu bihurtzen dituztenengandik ihes egiteko prestatzen dituzte. Baina, egun batean, nesketako bat ez da ezkutalekura garaiz iritsiko.
Sina kostaldera joango da bere lagun Gretari udako etxea saltzen laguntzeko. Duela urtebete baino gutxiago, Gretak bere seme bakarra galdu zuen itsaso horretan eta Sinaren laguntza behar du. Dena biltzen eta giltza entregatzeko prestatzen ari diren bitartean, Brunok, Gretaren senarrak, bertako jendearen arteko zurrumurruak –izaki bitxi bat agertu dela– baieztatzen dituen zerbait ikusi duela esango die.
Esperimentu dokumental eta narratibo baten helburua Mexikoko erakunderik eztabaidatuenetako bat, polizia, argitzen saiatzea da, baita justizia-sistema txikitzen duen zigorgabetasunaren kausak ere.
Bideoak
Irudiak
Astelehenetik ostegunera: 09:00 - 15:00.
Ostiraletan: 10:00 - 14:00