RTVEk, aurtengo edizioan, Donostia Zinemaldiaren 73. edizioan partaidetutako bere zinemaren lau estreinaldi-gala egingo ditu; izan ere, Zinemaldiaren babesle ofiziala da RTVE. Estreinaldiz betetako aste bat izango da, Parecido a un asesinato / Hidden Murder, Ya no quedan junglas / The Gentleman, La cena / The Dinner eta La tregua / The Truce filmen jendaurreko aurkezpenarekin eta gure zinemaren izan handien presentziarekin. Zinemaldia irailaren 19tik 27ra bitartean egingo da eta RTVEk partaidetutako sei film aurkeztuko dira bertan (horietako bi, Sail Ofizialean), RTVE Play plataformako ‘Zeru ahoak / Sky Mouths’ –EITBrekin batera ekoitzitako saila– estreinatzeaz gainera.  

Duela urtebete, RTVEk hitzarmen bat sinatu zuen Donostia Zinemaldiarekin; hitzarmen horren bidez, bi erakundeek duela ia bi hamarkadaz geroztik hona duten lankidetza indartu zen, bai eta RTVEk Donostian duen presentzia ere. Akordio honen medioz, Korporazioak gala gehiago egiten ditu Zinemaldian.

Zinemaz eta galez betetako aste bat

Antonio Hernándezek Parecido a un asesinato thriller psikologikoa aurkeztuko du. Blanca Suárez, Eduardo Noriega, Tamar Novas eta Claudia Mora gazte hasiberria ditu protagonista, eta iragan ilun baten ondoren bizitza berregiteko borrokan ariko den emakume bati buruzkoa da. Ez zaio hain erraza izango. Emakumearen paradisua arriskuan egongo da Josérekin –bere senar ohi eta polizia posesibo eta biolentoarekin– jasandako izugarrikeria itzultzean, baina ezer ez da dirudien bezalakoa. Aktore-zerrenda osatzen dute Joaquín Climent, Marián Álvarez eta Raúl Prieto antzezleek.

Ya no quedan junglas lana Luis Gabriel Beristáin zinemagile mexikarrak zuzendu du, eta nazioarteko aktore-zerrenda du, Ron Perlman aktore iparramerikarra izanik protagonista, Megan Montaner, Hovik Keuchkerian eta Karra Elejalde antzezleekin batera. Istorioak hiru ardatz ditu, maitasuna, indarkeria eta mendekua, Gentlemanaren –Ron Perlmanek interpretatutako militar zahar baten– bitartez, thrillerra, eta akzioa eta emozioak uztartzen ditu.

Manuel Gómez Pereiraren La cena komedia gisako filma da, pantailan inoiz ikusi ez den gerraosteko une bat irudikatzen duena, hain justu. Mario Casas eta Alberto San Juan dira protagonistak, Asier Etxeandia, Nora Hernández, Óscar Lasarte, Martín Páez, Elvira Mínguez, Carlos Serrano, Carmen Balagué, Eva Ugarte eta Antonio Resinesekin batera, besteak beste. Gerra Zibila amaitu eta bi astera, Francok afari bat eskatu zuen Palace hotelean. Teniente gazte batek, maître arretatsu batek eta sukaldaritzan adituak diren preso errepublikarren talde batek oturuntza bikain bat prestatu beharko dute denbora errekorrean. Badirudi dena oso ondo doala, baina sukaldean menua baino zerbait gehiago ari dira antolatzen. Ihesa gauza segurua da.

Azkenik, La tregua, Espainiaren eta Kazakhstanen arteko lehen koprodukzioa, Miguel Ángel Vivas Morenoren drama belikoa da, Miguel Herrán eta Arón Piper dituena protagonista Javier Pereira, Fernando Valdivieso, Alejandro Jato, José Pastor, Manel Llunel, Federico Pérez Rey, Sergey Ufimtsev eta Dina Tasbulatova aktoreez gainera; II Mundu Gerran girotuta eta benetako jazoeretan oinarrituta dago pelikula. Filmean, Reyes eta Salgado Espainian aurkako bandoetan borrokan aritu ziren bi gazte dira, baina sufrimendua eta itxaropena partekatu beharko dituzte Kazakhstango gulag sobietar batean. Elkarrekin bizitzera eta hotzaren, gosearen eta izugarrikeriaren aurrean indarrak batzera behartuta egongo dira bi gizonak.

RTVEren bi film ariko dira lehian Urrezko Maskorra lortzeko

RTVEk Donostian izango duen presentzia osatzeko, sei film aurkeztuko dira, lehiaketaren sail desberdinetan: horietako bi, lehian Sail Ofizialean (Maspalomas eta Historias del buen valle / Good Valley Stories); beste bat, lehiaz kanpo, Sail Ofizialeko Emanaldi Berezietan (Karmele) eta bat New Directors sailean (Aro berria); beste bat Perlak sailean (Ciudad sin sueño / Sleepless City); eta azkenekoa Belodromoan (Rondallas / Band Together).

RTVE Play plataforman ‘Zeru ahoak’ estreinatuko da

Donostian, gainera, RTVE Play telesail berria aurkeztuko da, Zeru ahoak, RTVEk eta EITBk batera ekoitzia. Koldo Almandozen thriller honek lau atal ditu, eta Nagore Aranburu, Josean Bengoetxea, Miren Gaztañaga, Ramon Agirre eta Sara Cozar dira protagonistak. Sail Ofizialeko Emanaldi Berezietan estreinatuko da.