Gaur aurkeztu dute Ikusmira Berriak 2015-2025 liburua, Zinemaldian eta talentu zinematografiko emergenteari eskainitako Kabia jardunaldian. Donostia Zinemaldiak, Tabakalerak eta Elías Querejeta Zine Eskolak babestutako egoitza-programaren barnean, ikus-entzunezko sorkuntzari eta talentu emergenteari laguntzeko hamarkada bateko lana biltzen du. Oroitzapen-lan honetan, bildurik daude Ikusmira Berriak programaren hamar edizioetako gonbidatuen eta programa ahalbidetu duten erakundeen testuak, bai eta haren ordezkari diren zinemagileei egindako elkarrizketak ere. Argitalpenak, hamarkada bateko laguntza ospatzeaz gainera, programatik igaro diren filmen inpaktuaren testigantza ere eskaintzen du. Hala, batera eginiko ibilbide batean jartzen du arreta, zeina ezin baita ulertu historian zehar parte hartu duten zinemagileak kontuan hartu gabe.

Liburua egoitza babesten duten hiru erakundeen artikuluekin irekitzen da: Maialen Beloki Berasategui, Donostia Zinemaldiaren zuzendariordea; Carlos Mugiro, Elías Querejeta Zine Eskolako zuzendari akademikoa; eta, Tabakaleraren aldetik, Clara Montero Tellechea, Kulturako zuzendaria; eta Sara Hernández Askasibar, Ikus-entzunezko Programaren koordinatzailea. Maialen Beloki Berasateguiren hitzetan: «Hamargarren urteurrenean, balantzea egitea dagokigu». Zenbakiei erreparaturik, programan 1.800 proposamenek baino gehiagok eman dute izena. Guztira ikus-entzunezko 56 proiekturi eskaini zaie babesa. Horietatik 28 amaitu dira, eta zinema-jaialdien nazioarteko zirkuitu zabal batean hautatu dituzte. Besteak beste, aintzatespen hauek jaso dituzte: Cannesko Hamabostaldiko Europako Film Onenaren sari bat, Veneziako Bienaleko Orizzonti saileko Epaimahaiaren Sari Berezi bat, Berlinaleko Encounters saileko FIPRESCI sari bat, DocLisboa jaialdiko Film Onenaren sari bat, Punto de Vista jaialdiko Film Onenaren sari bat, Veneziako Kritikaren Asteko Ekarpen Tekniko Onenaren sari bat, Goya sari bat, sei Gaudí sari, eta, Donostia Zinemaldiaren barruan, Euskal Zinemaren Irizar Sari bat, bi aipamen berezi Zabaltegi-Tabakaleran eta Urrezko Maskor bat. 

Ondorio kualitatiboen artean, baiezta daiteke, batetik, filmak programatzeko zirkuitu horrek eta lortutako sariek label bilakatu dutela Ikusmira Berriak programa, eta arreta handiz begiratzen diotela sektoreko eragileek —ekoizpen-etxeek zein jaialdiek—. Bestetik, egoitza-programa baliagarria izan da euskal zineman belaunaldien arteko erreleboa egiteko, batez ere emakumezko euskal zinemagileekin (Maider Oleaga, Amaia Merino, Maider Fernández Iriarte, Arantza Santesteban, Aitziber Olaskoaga, Jaione Camborda, Marina Palacio, Irati Gorostidi, Maddi Barber, Mikele Landa, Maria Elorza eta Joana Moya).

EQZEko zuzendariak George Steiner aipatu du eskolaren ideala aldarrikatzeko: «Eskola horretan ikasleak baimena izango luke akats handi bat egiteko; alegia, itxaropena izateko». Muguirok ondorioztatzen duenez, «egiaz, ez dago itxaropen ariketa handiagorik, oraindik existitzen ez den film bat imajinatzea baino. Eskola deitu ala ez (izan daiteke eskola ondokoa, eskola ideala, eskola transmutatua), Ikusmira Berriak da leku hori». Tabakalerako Clara Monterok eta Sara Hernándezek gogorarazi dutenez, berriz, «laguntza ez da mugatzen egoitzaren aldira». Aitzitik, Ikusmira Berriak sailean «harremana jarraitua da, eta horrek egoitzaren garapen optimoa ahalbidetzen du. Horrek erraztu egiten die sortzaileei sorkuntza puntualetik irtetea eta ikus-entzunezkoen industrian karrera bat eraikitzeko trantsizioa egitea».

Era berean, industria zinematografikoko profesionalek ere parte hartzen dute liburuan: Albertina Carri zinemagileak, Eugenia Mumenthaler ekoizleak eta Carlo Chatriain programatzaileak —Berlin eta Locarnoko jaialdien zuzendari ohia eta Turingo Zinema Museoko egungo arduraduna—. Horiek guztiak lehen hautaketako batzordeko kide izan dira edo tutore-lanetan aritu dira. Era berean, Víctor Iriartek ere parte hartzen du, zeinak programaren sorreran esku hartu baitzuen —halaber, hautaketan ere aritu da zenbait ediziotan, eta tailerrak eman dizkie zinemagileei—. Carrik honela definitzen du Ikusmira Berriak sailean izaniko esperientzia: «Zinemagile berriei beren ahotsa aurkitzeko odisean laguntzea funtsezko alterazioa da gero eta alienatzaileagoa eta enkriptatuagoa bihurtzen ari den kontsumo-sistema batean». Ildo beretik mintzo da Mumenthaler: «Programari esker, kontakizun berrietan barna ibil daiteke; haietan, gizartea ordezkaturik sentituko da, oro har, garaikidetasunetik abiatuta sentituko da kuestionatuta». Chatrianek ondo gogoan du bere lehen inpresioa: «Aztertu nituen proiektuak apartak ziren arren, energia sortzaile partekatua izan zen feedback indartsuena. Nolabait esateko, zinema-jaialdien mendean erortzen hasi nintzenean izaniko sentsazio kutsakor bera izan nuen: kanpoko munduaren kaosetik at, iruditzen zitzaidan zerbait forma hartzen ari zela, hemen eta orain». Iriartek berariazko gonbidapen bat egiten du: «Etorkizuneko zinemagileek etxea eta abezea aurkituko dute hemen. Egin magia. Asmatu hitzak eta filmak. Bizi. Egin su».

Liburuak barnean hartzen ditu edizio bakoitzeko zinemagileei egindako hamar elkarrizketa. Halaber, sortze-prozesuei, erreferentziazko zinemagileei eta film inspiratzaileei buruzko galderak eta erantzunak biltzen dira, bai eta egoitzari lotutako oroitzapenak ere: Xacio Baño (2015), Kiro Russo (2016), Helena Girón eta Samuel M. Delgado (2017), Arantza Santesteban (2018), Raven Jackson (2019), Jaione Camborda (2020), Eduardo Crespo (2021), Meritxell Colell (2022), Naomi Pacifique (2023) eta Mikele Landa (2024). «Hainbat lekutatik etorritako zinemagileak —izan toki horiek lurraldeak, belaunaldiak edo emozioak—, bulkada berak partekatzen dituztenak: hau da, zergatik eta zertarako egin zinema». Halaxe jasotzen du Ikusmira Berriak sailaren arduradun Maialen Franco Dávilak epilogoan. Hain zuzen, hark koordinatu du Diego Zarrabeitiak diseinatutako liburukia.

Testuez gainera, liburuak material grafiko ugari du: egindako proiektuen fotogramen irudiez aparte, ageri dira storyboard baten zatiak, eskuz idatzitako apunteak dituzten gidoi-orriak, argazkiak, oharrak, marrazkiak eta are herbario baten zatiak.

Tabakalerako zinema eta ikus-entzunezko laborategian eginiko aurkezpenean izan dira, batetik, Jaume Claret Muxart (Ikusmira Berriak 2022), zeinak Zabaltegi - Tabakalera sailean aurkezten baitu Ikusmira-Berriak programan garaturiko Estrany Riu / Strange River (Extraño río) lana, Venezian aurkeztu ondotik, eta, bestetik, Jaione Camborda, zeinak Urrezko Maskorra eskuratu baitzuen 2020ko egoitzan garaturiko O Corno lanarekin. A Estrany Riu eta O Cornodira oroitzapen-liburuaren azalean jasotako irudiak. Hirugarren irudia, berriz, AEBko zinemagile Raven Jacksonen All Dirt Roads Taste of Salt (Ikusmira Berriak 2019) lanari dagokio, zeina Sundancen estreinatu eta Donostian saritu baitzuten.

Parte hartu duten zinemagileak (59):

Pablo Álvarez, Tamyka Smith, Maider Oleaga, Xacio Baño, Kiro Russo, Leo Calice, Gerhard Treml, Aitor Merino, Amaia Merino, Mikel Gurrea, Julia Pesce, Leonardo van Dijl, Maider Fernández Iriarte, Samuel M. Delgado, Helena Girón, Arantza Santesteban, Grigory Kolomytsev, Nele Wohlatz, Elena López Riera, Manuel Abramovich, Raven Jackson, Alberto Martín Menacho, Aitziber Olaskoaga, Michael Wahrmann, Martina Juncadella, Gabriel Azorín, Elena Martín Gimeno, Diego Céspedes, Jessica Sarah Rinland, Jaione Camborda, Magdalena Orellana, Eduardo Crespo, Manuel Muñoz Rivas, Mina Kim Fitzpatrick, Marina Palacio Burgueño, Irati Gorostidi Agirretxe, Jaume Claret Muxart, Maximiliano Schonfeld, Ana Cristina Barragán, João Paulo Miranda Maria, Meritxell Colell Aparicio, Naomi Pacifique, Maddi Barber, Sameh Alaa, David Pérez Sañudo, María Alché, Hikaru Uwagawa, Marieke Elzerman, Lucy Kerr, Maria Elorza, Mikele Landa, Cande Lázaro, Felipe Gálvez, Alexandra Latishev, Kathy Mitrani, Jaime Puertas, Fede Gianni, Daniel Soares eta Joana Moya.