Vicente gazte ausart eta bakartiak hondartzan igaroko du uda, gurasoen etxean. Lasai ederrean, uretan eta edozeinekin festan ibiltzeko egunak izango dira. Baina parrandan eta nesketan igarotako gau batek betirako aldatuko dio bizitza: arrantzale bat autoarekin harrapatzea, hiltzea eta ihes egitea leporatuko diote. "Ni ez nintzen gidaria" esango du, politikari boteretsu baten semeak gidatzen zuela esango du, baina alkoholak oroimena lausotu dio. Botereak, manipulazioak eta erruak Vicenteren opor gozoak garraztuko dituzte azkenean. Zuzendariak hirugarrenez hartzen du parte Zinema Eraikitzen sailean. Aurreko filmarekin –Matar a un hombre–, Grand Jury saria lortu zuen Sundanceko zinema-jaialdian.