"Z365" edo "Zinemaldia urte osoan" Zinemaldiaren apustu estrategiko berria da, non talentu berrien bilaketa, laguntza eta garapena (Ikusmira Berriak, Nest); formakuntza eta zinema-ezagutzen transmisioa (Elias Querejeta Zine Eskola, Zinemaldia + Plus, Zinemagileen elkarrizketa); eta ikerketa, dibulgazioa eta pentsamendu zinematografikoa (Z70 proiektua, Pentsamendua eta eztabaida, Ikerketa eta argitalpenak) elkartzen diren.
(H)emen, ikus-entzunezko eta arte eszenikoetako emakumezko profesionalen EAEko elkarteak, eta 50/50 2025erako, Ikus-entzunezkoetan Berdintasuna lortzeko Lurraldearteko Lantaldeak eskatuta, Donostia Zinemaldiak genero-identifikazioari buruzko txostenaren ikerketa-eremua handitu egin du. Agiriak orain beste eranskin bat izango du, bigarrena, Euskadin eta Espainian ekoitzitako filmei buruzkoa, hautaketa-batzordeak ikusitakoak eta 67. edizioko programaziorako hautatu zirenak barnean hartuta.
Emakumezko profesionalen parte-hartzea % 30ekoa da zuzendaritzan, produkzioan, gidoigintzan, muntaketan, argazkian eta musikan, hala EAEko filmetan nola Estatukoetan, nazioarteko produkzioetan gertatzen den eran. Ikusitako 3.000 filmetan eta azkenean programatutako 150etan bezala, emakumezko profesionalen parte-hartze txikiena argazki-zuzendaritzan eta musika-konposizioan edo -interpretazioan hauteman da, eta batezbestekotik zertxobait gora daude gidoigintzan eta produkzioan.
Zinemaldiak Parekidetasunaren eta emakumezkoak zinemagintzan sartzearen aldeko gutunarekin bat egin zuen 66. edizioan, eta edizio bakoitzeko filmen gainean profesionalen generoaren araberako urteko txostena egiteko konpromisoa hartu zuen. Zinemaldiaren nahia da ikerlan hori hurrengo urtetan aldaketa esanguratsu bat gertatzeko abiapuntu eta eragile izatea.