Babesle
Ofiziala
Media
Partner

itxi
Bete formularioa zure datuekin, erregistratutako erabiltzaileentzako edukiak ikusteko
Sakatu hemen
Ez duzu pasahitza gogoratzen? Sakatu hemen

itxi


Oraindik ez duzu posta elektronikoa balioztatu. Posta elktroniko bat bidali dizugu, ondoko esteka sakatu behar duzu kontua balioztatzeko

Hemen zaude: Lehen orrialdea > 70. Edizioa 2022  > Berriak > Elena López Rierak Zinemaldia + Plus-en saio berri batean aurkeztuko ditu bere film laburrak
Elena López Rierak Zinemaldia + Plus-en saio berri batean aurkeztuko ditu bere film laburrak
Ikusmira Berriak ekimenaren babesean sortutako 'El agua' proiektua –bere lehen film luzea– Canneseko Zinema-jaialdiko Errealizadoreen Hamabostaldian estreinatu eta aste batzuetara izango da Alacanteko zinemagilea Tabakaleran
Asteartea, 2022(e)ko ekainak 7

Elena López Riera Zinemaldia + Plus-en saio berri bateko protagonista izango da larunbat honetan, ekainak 11; hots, Donostia Zinemaldiak Tabakalerako pantaila partekatuan egiten duen hileko fokuan. Alacanteko zinemagileak 2015 eta 2018 artean filmatu zituen hiru film laburrak aurkeztuko ditu bertan. Gerora filmatu zuen bere lehen film luzea, El agua (2022), Ikusmira Berriak egonaldi-programaren babesean, eta, hain zuzen ere, duela aste gutxi batzuk estreinatu zuen filma Canneseko zinema-jaialdiko Errealizadoreen Hamabostaldian.

Larunbateko saioan, zuzendariak Pueblo (2015), Las vísceras (2016) eta Los que desean (2018) film laburrak aurkeztuko ditu. Proiekzioaren ostean, solasaldi bat izango da hiru film horien inguruan, eta bertan parte hartuko du López Rierak. Film labur horietan hautematen zen jada ahozko tradizioa, emakumeen ahotsa eta landa-eremua zinema garaikidearen bidez ezagutarazteko zuzendariak zeukan interesa.

Ikus-entzunezko komunikazioan doktorea, artista bisual eta programatzailea, eta Lacasinegra kolektiboaren fundatzaileetako bat da Elena López Riera. Canneseko zinema-jaialdiko Errealizadoreen Hamabostaldian estreinatu zuen bere lehen film laburra, Pueblo, eta ondoren nazioarteko hogei bat zinema-jaialditan parte hartu zuen film horrekin. Bere hurrengo bi lanak, Las vísceras eta Los que desean, Locarnoko Zinema-jaialdian estreinatu zituen, eta azken horrek ekoizpen suitzarreko film labur onenaren Pardino d’Oro saria irabazi zuen. Los que desean film laburrak, gainera, aipamen berezi bat jaso zuen Donostia Zinemaldiko Zabaltegi-Tabakalera sailean.

Bere film laburrak, bestalde, atzerabegirakoetan egon dira ikusgai Zinemateka Frantsesean (Paris), Bogotako Zinematekan (Kolonbia), Union Docs-en (AEB) eta Gijóngo Nazioarteko zinema-jaialdian (Espainia).

2018an, El agua proiektuarekin Ikusmira Berriak atalean parte hartzeko hautatu zuten zuzendaria. Egonaldi-programa bat da atal hori, Donostia Zinemaldiak, Kultura Garaikidearen Nazioarteko Zentroa-Tabakalerak eta Elías Querejeta Zine Eskolak (EQZE) elkarrekin antolatua. Urte horretan, gainera, REC Grabaketa Estudioaren saria jaso zuen zuzendariak Donostia Zinemaldian, Ikusmira Berriak-en postprodukziorako. Errealizadoreen Hamabostaldian oraintsu estreinaldia egin baino lehen, López Riera beste egonaldi batzuetan aritu zen El agua proiektua garatzen, hala nola Canneseko zinema-jaialdiko Cinéfondation ekimenean. Bertan, CNC Proiektu Onenaren saria jaso zuen.

Elena López Riera zinema-irakaslea da Genevako Haute École d’Art et Design (HEAD) ikastetxean, baita Donostiako Elías Querejeta Zine Eskolan eta beste hainbat zentrotan ere.

Zinemaldia + Plus
Larunbata, 2022(e)ko ekainak 11 | 19:00etan. - Zinea Tabakaleraa

 

Pueblo (Film laburra)
Elena López Riera (Espainia)  2015
Ekoizpeneko herrialdea(k): Espainia - Suitza

Rafa herrira itzuliko da erbestean denbora luzez egon ondoren. Prozesio-gau atmosferiko batean, herrian geratu zirenen etsipenarekin egingo du topo.


Las vísceras / The Entrails (Film laburra)
Elena López Riera (Espainia)  2016
Ekoizpeneko herrialdea(k): Espainia

Espainia hegoaldeko herri bat. Udako arratsalde bero batean, emakume batek untxi bati helduko dio, laztandu egingo du eta kolpe lehor batez hilko du larrutu aurretik. Haurrek, zaharrek eta txakurrek heriotzaren eguneroko erritualari begiratzen diote.


Los que desean (Film laburra)
Elena López Riera (Espainia)  2018
Ekoizpeneko herrialdea(k): Suitza - Espainia

Espainiako hegoaldean, eskuz margotutako usakumeen lasterketa ez du azkarrenak irabaziko, usakume emea erakarri eta haren ondoan ahalik eta denbora luzeen hegan egitea lortzen duenak baizik.


Babesle Ofiziala
Media Partner
Laguntzaile Ofizialak:
Instituzio Kideak:
© Donostia Zinemaldia | Desarrollado por: Yo Miento Producciones
Webgune hau berezko eta kanpoko cookies-az baliatzen da, erabiltzaile gisa esperientzia hobea eskaintzeko. Informazio gehiago Onartzea