Bihar, abuztuaren 19an, 10:00etan jarriko dira salgai Donostia Zinemaldiaren 73. edizio honetan Belodromoan egingo diren emanaldietarako sarrerak. Programazioak Go!azen telesailaren hamabigarren denboraldiko lehen atalaren bi emanaldi hartuko ditu barne, Rondallas –Daniel Sánchez Arévaloren film berria– eta Hasta que me quede sin voz –Leiva musikariari buruzko ez-fikzioa– estreinatzeaz gainera. Halaber, auditoriumak –2.000 pertsona baino gehiago har ditzakeenak– itxiera galaren emankizuna ere hartuko du, EITB Gala, Kontzertua & Proiekzioa –Euskadiko Orkestrarekin eta SGAErekin batera antolatutako ekimen tradizionala– eta Ikastetxeak Belodromoan jardueraren goizeko emanaldiez gain.

Asteartean, hilaren 23an, 19:00etan estreinatuko da Rondallas / Band Together –Daniel Sánchez Arévaloren (Madril, 1970) itzulera zinemara–. Javier Gutiérrez, María Vázquez, Judith Fernández, Tamar Novas eta Fer Fraga dira komedia dramatiko honen protagonistak; filmak kontatzen digu nola Galiziako udalerri batek erabakiko duen herriko errondaila –musika-talde tradizionala– berreskuratzea; erresilientziari eta garai gogorretan komunitateak duen garrantziari eskainitako oda bat.

Ostegunean, hilaren 25ean, 19:00etan, Hasta que me quede sin voz filma emango da pantaila erraldoian. Bertan, Leiva musikariaren bizi-unea, zurrunbiloa eta bere ahots-kordetako batean duen lesio konponezin baten ondorioz bizi duen egoera labaina azaltzen dira. Hiru egileren lan kolektiboa da filma: lehenik, Mario Forniés dugu (Madril, 1976), proiektu ugari ekoitzi dituena, besteak beste, kantautore madrildarraren bideoklipak; bigarrenik, Lucas Nolla (Madril, 1978), hainbat filmetan muntatzaile-lanak egin dituena; eta, hirugarrenik, Sepia (Ushuaia, 1980), argazkilaria eta musika-bideoen zuzendaria.

Gainera, lehen aldiz, Go!azen telesailaren bi emanaldi egongo dira: bata, asteazkenean, hilaren 24an; bestea, ostiralean, hilaren 26an; bi saioak 18:30etan. Go!azen telesailaren hamabigarren denboraldiko lehen atala aurkeztuko da, eta, iaz bezala, emanaldiaren aurretik zuzeneko funtzio bat egingo dute protagonistek. Itziar Gomez Sarasolak (Errenteria, 1964) zuzendu du Basakabi udalekuko musika-abenturen denboraldi berri hau.

Belodromoko emanaldietarako sarrera bakoitzak 8,75 euro balio du eta bihartik aurrera (abuztuaren 19a, 10:00etan) erosi ahalko dira Zinemaldiaren webgunearen bidez (https://sansebastianfestival.janto.es), bai eta Kutxabanken webgunearen medioz ere (https://tickets.kutxabank.es). Emanaldi bakoitzeko lau sarrera baino ezin dira erosi, eta erosketa bakarrean hamar sarrera edo gehiago erosiz gero, % 25eko deskontua aplikatuko da. Halaber, Donostia Kulturaren txartelarekin eta Kutxabanken Gaztetxartelarekin ere aplikatzen dira deskontuak.

EITB galarako eta Kontzertua & Proiekzioa ekimenerako gonbidapenak

EITB Gala Belodromoan egingo da lehen aldiz. Bertan, datorren udazkenean ETB1en ematen hasiko den Euskal Herria Hegan programaren lehen atala estreinatuko da, Gipuzkoa hegan izenekoa, eta Olatz Salvadorren, Goikobalu abesbatzaren eta Fernando Velázquez konpositoreak zuzendutako Nafarroako Orkestra Sinfonikoaren funtzioarekin batera emango da. Gipuzkoa hegan –Javi Gutierrezek (Bilbo, 1965) eta Lorea Perez de Albenizek (Elgoibar, 1974) zuzendua–, lurraldearen sekretuak azalduko ditu aireko bidaia baten bitartez. Emanaldia igandean izango da (hilaren 21a), arratsaldeko 18:00etatik aurrera.

Era berean, Belodromoak Euskadiko Orkestrarekin eta SGAE Fundazioarekin batera antolatutako Kontzertua & Proiekzioa hartuko du, irailaren 20an (larunbata), 18:00etan. Ikuskizunak soinu-banden interpretazio sinfonikoa eta horiek inspiratu zituzten filmen eszenen muntaketa batzen ditu.

Nola EITB Galarako hala Kontzertua & Proiekzioa ikuskizunerako sarrera doakoa da, baina beharrezkoa izango da dagokion gonbidapena jasotzea. Gonbidapena irailaren 13tik 19ra egongo da eskuragarri Donostia Zinemaldiak Kursaalen prestatutako informaziogunean, baita Donostiako Boulevardean kokatutako turismo-bulegoan eta Belodromoko kontzertuaren egun berean ere. EITB Galaren kasuan, gonbidapenak Zinemaldiaren webgunean eskuratu ahalko dira, bai eta Kutxabanken webgunean ere, bihartik aurrera (abuztuaren 19a).

Azkenik, Ikastetxeak Belodromoan ekimenaren –6 eta 11 urte bitarteko milaka haurri zinema eta zientzia lotzen dituen pelikula baten proiekzioaz gozatzeko aukera ematen diena– goizeko agertokia ere izango da Belodromoa. Donostia Zinemaldiak, Donostia International Physics Centerrek (DIPC) eta Euskadiko Filmategiak batera antolatutako saio horien jomuga lurraldeko ikastetxeetako ikasleei zientziaren irudi positiboa ematea da, hiriak ikerketa zientifikoarekin duen lotura handia erakusteaz gain. Ohi denez, Zinemaldiaren azken egunean –aurten, hilaren 27an (larunbata)– Belodromoak itxiera galaren zuzeneko emanaldia hartuko du. Halaber, Sail Ofizialari amaiera emango dion filma eta laster iragarriko den beste pelikula bat ere proiektatuko dira.